ސަލްމާން ރަސްގެފާނާ ސާދު ހަރީރީ ބައްދަލުކުރައްވައިފި
6 ނޮވެމްބަރު 2017 | ހޯމަ 13:55ސާދު ހަރީރީގެ އިސްތިއުފާއަކީ ސަޢޫދީއިން އަޑީގައި ތިބެގެން ކުޅޭ ޑްރާމާއެއްކަމަށް އިރާނުން ބުނޭ
ރަސްގެފާނު ސަލްމާން (ކ) އާއި ސާދު ހަރީރީ (ވ) ރިޔާޒްގައި ބައްދަލުކުރައްވަނީ
މިދިޔަ ހޮނިހިރު ދުވަހު އިސްތިއުފާ ދެއްވި ލުބްނާނުގެ ބޮޑުވަޒީރު ސާދު ހަރީރީ، ސަޢޫދީގެ ރަސްގެފާނު ސަލްމާން ބިން އަބްދުލްޢަޒީޒްއާ ބައްދަލުކުރައްވައިފިއެވެ.
މިބައްދަލުކުރެއްވުން އޮތީ ސަޢޫދީގެ ވެރިރަށް ރިޔާޒްގައެވެ. ރިޔާޒްގައި ހުންނަވައިގެން ހަރީރީ އިސްތިއުފާދެއްވިއިރު، އެމަނިކުފާނު ވިދާޅުވީ އެމަނިކުފާނު އަވަހާރަކޮށްލަން ރޭވުންތަކެއް ރާވަމުންދާ ކަމަށާއި، މެދުއިރުމަތީގެ ސުލްހަ ނަގާލުމަށް އީރާނާއި، އީރާނުން ވާގިވެރިވާ ލުބްނާނުގެ ހަތިޔާރު އެޅި ހިޒްބުﷲ ޖަމާޢަތުން މަސައްކަތްކުރަމުންދާ ކަމަށެވެ.
ހަރީރީގެ އިސްތިއުފާއާ ގުޅިގެން ސަޢޫދީގެ ގަލްފް އެފެއަރޒް މިނިސްޓަރ ތަމީރް އަލްސަބްޙާން ވިދާޅުވީ ސާދު ހަރީރީގެ އިސްތިއުފާއަށް ފަހު ލުބްނާނު ވެގެންދާނީ ކުރީގެ ލުބްނާނަށް ނޫން ކަމަށެވެ. އަދި ޓެރަރިޒަމަށް ވާގިވެރިވާ ޤައުމަކަށް ލުބްނާން ވާން އަރަބި ޤައުމުތަކުން ނުރުހޭނެ ކަމަށް އޭނާ ވިދާޅުވިއެވެ.
ލުބްނާނުގައި މިހާރު އޮތީ ހިޒްބުﷲއަށް ވާގިވެރިވާ ސަރުކާރެކެވެ. މިދިޔަ އަހަރު ލުބްނާނުގެ ވެރިކަމަށް ސާދު ހަރީރީ ވަޑައިގެންނެވީ އެޤައުމުގައި ސަރުކާރެއް އެކުލަވާނުލެވި ގިނަ ދުވަސްތަކެއްވެ، މަސްރަހު ގޯސްވުމާ ގުޅިގެން، ބާރުތައް ހިއްސާކުރާ ސަރުކާރެއްގެ ތެރެއިންނެވެ. ސާދު ހަރީރީއަކީ އަވަހާރަކޮށްލެވިފައިވާ ލުބްނާނުގެ ކުރީގެ ބޮޑުވަޒީރު ރަފީޤުލް ޙަރީރީގެ ދަރިކަލެކެވެ. ލުބްނާނުގެ ވެރިރަށް ބެއިރޫތުގައި 2005 ވަނަ އަހަރު ދިން ކާރު ބޮމުގެ ހަމަލާއެއްގައި ރަފީޤުލް ޙަރީރީ އަވަހާރަކޮށްލީ ހިޒްބުﷲއިން ކަމަށް ތުހުމަތުކުރެއެވެ. އެހެންކަމުން ހިޒްބުﷲއަށް ވާގިވެރިވާ ސަރުކާރެއްގައި ސާދު ހަރީރީ މާގިނަ ދުވަސްތަކެއް ވަންދެން ހުރެދާނެކަމާ މެދު އޭރު ވެސް އޮތީ ސުވާލު އުފެދިފައެވެ.
