ތާރީޚީ ދަތުރުފުޅެއްގައި ސައުދީ ރަސްގެފާނު ސަލްމާން ރަޝިއާ އަށް ވަޑައިގަންނަވަނީ

ތެލާއި އިންވެސްޓްމަންޓް އަދި ސީރިއާ އާގުޅޭ މަޝްވަރާތައް ބޭއްވުމަށް ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒް އާލް ސައުދު، ތާރީޚީ ދަތުރުފުޅެއްގައި ރަޝިއާ އަށް ވަޑައިގެންނެވުމަށް ތައްޔާރުވެއްޖެ އެވެ.

ސައުދީ ރަސްގެފާނު ސަލްމާން ރަޝިއާ އަށް ވަޑައިގަންނަވަނީ ރަޝިއާގެ ލީޑަރުންނާއެކު ބާއްވާ މަޝްވަރާތަކަށް ކަމަށް ރިޕޯޓްތައް ބުނެ އެވެ. ބުރާސްފަތި ދުވަހު ފަށާ މިމަޝްވަރާތަކުގައި ތެޔޮ އުފެއްދުމުގައި ދެޤައުމުގެ ދެމެދުގައި އެއްބާރުލުން ދިނުމުގެ އިތުރުން، ސީރިއާ އަދި އީރާނުގެ މައްސަލަ އާގުޅޭ ގޮތުން މަޝްވަރާ ކުރުމަށް ވަނީ ހަމަޖެހިފަ އެވެ.

މިއީ ތަޙުތުގައި އިންނެވި ސައުދީ ރަސްކަލަކު ރަޝިއާ އަށް ވަޑައިގެންނެވި ފުރަތަމަ ފަހަރެވެ.

ސައުދީ އަރަބިއްޔާ އާއި ރަޝިއާ އަކީ ދުނިޔޭގައި އެންމެ ގިނައިން ތެޔޮ އެކްސްޕޯޓް ކުރާ ދެ ޤައުމެވެ. ސައުދީ ރަސްގެފާނުގެ މިދަތުރުފުޅުގައި ރަޝިއާ އާއެކު ބާއްވާ ވާހަކަތަކުގެ ތެރޭގައި ޤުދުރަތީ ގޭހުގެ ޕްރޮޖެކްޓާއި، ޕެޓްރޯކެމިކަލް ޕްލާންޓް އާއި ގުޅޭ ގޮތުން މަޝްވަރާ ކުރުމަށް ހަމަޖެހިފައިވާއިރު، ހަކަތައިގެ މަޝްރޫޢުތަކުގައި ދެޤައުމު ގުޅިގެން އެއް ބިލިއަން ޑޮލަރު އިންވެސްޓް ކުރުމުގެ ރޭވުމާއިމެދު ގޮތެއް ނިންމާނެ ކަމަށް ބެލެވެ އެވެ.

ސައުދީ ރަސްގެފާނުގެ ރަޝިއާ ދަތުރުފުޅުގައި ރަޝިއާގެ ރައީސް ވްލަޑިމިއާ ޕޫޓިން އާއެކު ކްރެމްލިންގައި ބައްދަލު ކުރެއްވުމަށް ހަމަޖެހިފައިވާއިރު، ދެ ޤައުމުގެ ގުޅުން ބަދަހި ކުރުމާއި، ތެލުގެ އަގު ދަށްވަމުންދާ މައްސަލާގައި މަޝްވަރާ ކުރުމަށް ވަނީ ހަމަޖެހިފަ އެވެ. ސައުދީ އާއި ރަޝިއާ ގުޅިގެން ތެލުގެ ސިނާޢަތާއި ބެހޭ ޖަމިއްޔާ (އޯޕެކް) އިން ވަނީ، ތެލުގެ އަގު ވެއްޓެމުންދާ މައްސަލައިގައި އަންނަ މާޗް މަހުގެ ނިޔަލަށް ތެޔޮ އުފައްދާ މިންވަރު ދަށް ކުރުމަށް ތެޔޮ އުފައްދާ އެހެން ޤައުމުތަކާއެކު އެއްބަސްވެފަ އެވެ.

އެހެންނަމަވެސް ސީރިއާގެ މައްސަލާގައި މި ދެޤައުމުގެ ޚިޔާލު ތަފާތެވެ. ސީރިއާގެ ރައީސް ބައްޝާރުލް އަޞަދުގެ ސަރުކާރާއި ދެކޮޅަށް ހަނގުރާމަކުރާ އިދިކޮޅު ފަރާތްތަކަށް ސައުދީގެ ތާޢީދު އޮތްއިރު، ރަޝިއާ އަދި އީރާނުންގެ އަސްކަރިއްޔާ އިން ވާގިވެރިވަނީ ބައްޝާރުގެ ސަރުކާރަށެވެ. އީރާނަކީ މެދުއިރުމަތީގައި ސައުދީގެ އެންމެ ބޮޑު ހަތުރެވެ.

ހޯމަ ދުވަހު ދިން އިންޓަރވިއުއެއްގައި ރަޝިއާގެ ހަކަތައާއި ބެހޭ ވަޒީރު އެލެގްޒެންޑަރ ނޯވާކް ވަނީ، ހަކަތައިގެ މަޝްރޫޢުތަކުގައި އެއް ބިލިއަން ޑޮލަރު އިންވެސްޓް ކުރުމަށް ރާވާފައިވަނީ ތެލާއި ގޭސް އަދި ކަރަންޓާއި އިޢާދަކުރަނިވި ހަކަތައާއި އެހެނިހެން މަޝްރޫޢޫތަކުގައި ދެޤައުމުގެ ގުޅުން ވަރުގަދަ ކުރުމުގެ ބައެއްގެ ގޮތުގައި ކަމަށެވެ.

އަދި ރަޝިއާގެ ކުންފުނިތަކުން ސައުދީ އަރަބިއްޔާގައި ތެޔޮ ވަޅުތައް ކޮނުމުގެ ޚިދުމަތް ދިނުމާއި ގުޅޭ ގޮތުން ސައުދީ އެރަމްކޯ އާއެކު މަޝްވަރާ ކުރުމަށް ހަމަޖެހިފައިވާއިރު، ސާފުނުކުރާ ތެލުގެ ވިޔަފާރީގައި ރަޝިއާގެ ތެޔޮ ކުންފުނި ރޮސްނެފްޓްގެ ޝައުޤުވެރިކަމާއި ގުޅޭގޮތުން މަޝްވަރާ ކުރުމަށް ހަމަޖެހިފައިވެއެވެ.

ރަޝިއާގެ އިޤްތިޞާދީ ވަޒީރު މެކްސިމް އޮރެޝްކިން އަންގާރަ ދުވަހު ވިދާޅުވީ، ސައުދީން ބިނާ ކުރުމަށް މަސައްކަތް ކުރަމުންދާ ނިއުކްލިޔަރ ހަކަތައިގެ ޕްލާންޓަށް އިންވެސްޓަރުންގެ ޝައުގުވެރިކަން އެބަހުރި ކަމަށާއި، މީގެ އިތުރުން ރަޝިއާގެ ޝިޕިންގ ކުންފުނި ސޮވްކޮމްފްލޮޓްގައި ހުރި އިންވެސްޓްމަންޓްގެ ފުރުޞަތުތައް ސައުދީ އަށް ހުށަހަޅާނެ ކަމަށެވެ.

ރަސްގެފާނަށް މަރުޙަބާ ކިޔުމަށް މޮސްކޯގެ މަގުތައް ވަނީ އަރަބި ބަހާއި ރަޝިއާ ބަހުން މަރުޙަބާގެ މެސެޖުތަކާއެކު ބިލްބޯޑުތަކުން ޒީނަތްތެރި ކޮށްފައެވެ.

ރަސްގެފާނުގެ ދަތުރުފުޅުގައި ރަޝިއާގައި ބާއްވާ ވިޔަފާރީގެ ފޯރަމްގައި، ސައުދީގެ އިސް ވަޒީރުންނާއި ސަރުކާރު ޙިއްސާވާ ހަކަތައިގެ ކުންފުނިތައް ކަމަށްވާ ސައުދީ އަރަމްކޯ އާއި ގެޒްޕްރޮމްގެ އިސް ވެރިން ބައިވެރިވެވަޑައިގެން ވާހަކަ ދެއްކެވުމަށް ވަނީ ހަމަޖެހިފައެވެ. މީގެ އިތުރުން ސައުދީގެ އިޤްތިޞާދު ތެލަށް ބަރޯސާ ވުން ނިމުމަކަށް ގެނައުމަށް އެކުލަވާލާފައިވާ 2030ގެ ތަސައްވުރާއި ގުޅޭ ޕްރެޒެންޓޭޝަނެއް ހުށަހެޅުމަށް ވަނީ ހަމަޖެހިފަ އެވެ.

ސައުދީ ރަސްގެފާނުގެ ދަރިކަލުން މުޙައްމަދު ބިން ސަލްމާން، އެޤައުމުގެ ވަލީޢަޙުދުގެ މަޤާމަށް އައްޔަން ކުރުމުގެ ކުރިން މިދިޔަ މެއި މަހު ވަނީ ރަޝިއާ އަށް ވަޑައިގަންނަވާފައެވެ.