ޕެރިސް އެގްރީމެންޓުން އެމެރިކާ ވަކިވުމުން ތިމާވެށީގެ ރޮނގުން ވެސް ޗައިނާ ލީޑަރޝިޕް ނަގަނީ

މިދިޔަ އަހަރު ފަރަންސޭސީވިލާތުގެ ވެރިރަށް ޕެރިހުގައި އެކުލަވާލި ތިމާވެށީގެ މުޢާހަދާ ނުވަތަ ޕެރިސް އެގްރިމެންޓުން ވަކިވާން އެމެރިކާގެ ރައީސް ޑޮނަލްޑް ޓްރަމްޕް ނިންމެވުމާ ގުޅިގެން ތިމާވެށީގެ މައްސަލަތަކުގައި ދުނިޔޭގެ ލީޑަރޝިޕް ނަގަން ޗައިނާއަށް ފުރުސަތު ލިބިއްޖެއެވެ.

ޖަރުމަންވިލާތުގެ ބޮންގައި، މޫސުމަށް އަންނަމުންދާ ބަދަލުތަކާ ބެހޭ އދ. ގެ ސަމިޓްގެ ފެށިގެންދާއިރު، އެމެރިކާ މިފަހަރު އޮތީ ހަމަހިމެނޭނުންނެވެ. ޕެރިސް އެގްރިމެންޓް އެކުލަވާލުމަށް އެމެރިކާގެ ކުރީގެ ރައީސް ބަރަކް އޮބާމާ ބުރަ މަސައްކަތްތަކެއް ކުރެއްވި ނަމަވެސް، މިހާރުގެ ރައީސް ޑޮނަލްޑް ޓްރަމްޕްއަކީ މޫސުމަށް އަންނަމުންދާ ބަދަލުތައް ގަބޫލުކުރައްވާ ބޭފުޅެއް ނޫނެވެ. އަދި އެއީ ޗައިނާއިން އެމެރިކާގެ އިގްތިޞާދު ހަލާކުކޮށްލުމަށް ދައްކައިގެން އުޅޭ ފުލޯކު ވާހަކައެއް ކަމަށް ޓްރަމްޕް ގަބޫލުކުރައްވައެވެ.

ޕެރިސް އެގްރީމެންޓް ތަންފީޒުކުރާނެ އުޞޫލުތަކެއް މިފަހަރުގެ ސަމިޓްގައި ކަނޑައެޅުމަށް ނިންމާފައިވާއިރު، މިފަހަރުގެ ސަމިޓްގައި ނަގާ ކިޔާނީ ޗައިނާއިންނާއި ކުދި ޖަޒީރާ ހައުމުތަކުގެ ޖަމްއިއްޔާ، އަޔޯސިސްއިންނެވެ. މިފަހަރުގެ ސަމިޓްގެ ރިޔާސަތު ބަލަހައްޓާނީ އަޔޯސިސްގެ މެމްބަރު ގައުމެއް ކަމަށްވާ ފިޖީންނެވެ. މިއީ މޫސުމަށް އަންނަމުންދާ ބަދަލުތަކާ ގުޅޭ މަޝްވަރާތަކުގައި ކުޑަ ގައުމަކަށް ރިޔާސަތު ބަލަހައްޓަން ލިބޭ ފުރަތަމަ ފަހަރެވެ.

ޕެރިސް އެގްރިމެންޓުން ވަކިވާން އެމެރިކާއިން ނިންމި ނަމަވެސް މި މުޢާހަދާގައި ސޮއެކުރި އަނެއް 194 ގައުމުން ވަނީ އެއްބަސްވުމުން ވަކިނުވާނެ ކަމަށް ބުނެފައެވެ. އަދި ޗައިނާއިން ވެސް ވަނީ ޖައްވަށް ދޫކުރާ ވިހަ ގޭސް މަދުކޮށް، މޫސުމަށް އަންނަމުންދާ ބަދަލުތަކާ ދެކޮޅަށް މަސައްކަތްކުރުމަށް އެގައުމުން ތައްޔާރަށް އޮތްކަން ހާމަކޮށްފައެވެ.