ކޮރަޕްޝަންގެ ތުހުމަތުގައި ސައުދީ 11 އަމީރަކާއި 4 ވަޒީރަކު ހައްޔަރުކޮށްފި
5 ނޮވެމްބަރު 2017 | އާދީއްތަ 03:34އެންޓި ކޮރަޕްޝަން ކޮމިޓީ އެކުލަވާލީ ރަސްގެފާނުގެ ޝާޙީ ޤަރާރަކުން ހޮނިހިރު ދުވަހު
ސައުދީ ރަސްގެފާނު ސަލްމާން އަދި ވަލީއަޙުދު މުޙައްމަދު ބިން ސަލްމާން
ކޮރަޕްޝަންގެ ތުހުމަތުގައި ސައުދީ އަރަބިއްޔާގެ 11 އަމީރަކާއި ހަތަރު ވަޒީރަކު ހައްޔަރު ކޮށްފި އެވެ.
ސައުދީ ޝާހީ އާއިލާ އަދި ސައުދީ ސަރުކާރުގެ އިސްބޭފުޅުން ހައްޔަރު ކޮށްފައިވަނީ ސައުދީ އެންޓި ކޮރަޕްޝަން ކޮމިޓީގެ އަމުރަކަށް ކަމަށް ރިޕޯޓްތައް ބުނެއެވެ.
ސައުދީ އެންޓި ކޮރަޕްޝަން ކޮމިޓީ އަކީ ސައުދީ ރަސްގެފާނު ސަލްމާން ބިން އަބްދުލްއަޒީޒް އަލް ސައުދުގެ ޝާޚީ ޤަރާރަކުން އާދީއްތަ ދުވަހު އެކުލަވާލި ކޮމިޓީ އެއް ކަމަށް ސައުދީގެ ރަސްމީ ނިއުސް އޭޖެންސީން ބުނެ އެވެ.
ކޮރަޕްޝަންގެ މައްސަލަތަކާއި ގުޅިގެން ބޮޑެތި ބާރުތަކާއެކު އެކުލަވަލާލި މިކޮމިޓީގެ ޗެއަރމަނަކަށް އައްޔަން ކޮށްފައިވަނީ ވަލީއަޙުދު މުޙައްމަދު ބިން ސަލްމާން އެވެ. މިކޮމިޓީގައި ދެން ތިއްބަވަނީ ސައުދީ ނޭޝަނަލް އެންޓި ކޮރަޕްޝަން އޮތޯރިޓީގެ ޗެއަރމަން، ޖެނެރަލް އޯޑިޓް ބިއުރޯގެ ޗެއަމަންގެ އިތުރުން އެޓާނީ ޖެނެރަލް އަދި ދައުލަތުގެ ސަލާމަތާއިބެހޭ އިސްވެރިޔާ އެވެ.
މިކޮމިޓީ އަށް ދީފައިވާ ބާރުތަކުގެ ތެރޭގައި ތަހުގީގު ހިންގުމާއި، ހައްޔަރު ކުރުމާއި، ދަތުރުފަތުރު ކުރުން މަނާ ކުރުމާއި، އެކައުންޓްތަކާއި ޕޯޓްފޯލިއާ ފްރީޒް ކުރުމާއި، ފައިސާގެ މުއާމަލާތްތަކާއި، މުދާ ހޯދާފައިވާ ގޮތުގެ ތަފްސީލް ހޯދުން ހިމެނެއެވެ.
ކޮމިޓީ އެކުލަވާލިތާ މަދު ގަޑިއިރުތަކެއްގެ ތެރޭގައި 11 އަމީރަކާއި ސައުދީ ސަރުކާރުގެ ހަތަރު ވަޒީރަކު ހައްޔަރުކޮށްފައިވާއިރު، ކުރީގެ ވަޒީރުންގެ ތެރެއިން ގިނަ ބަޔަކު ހައްޔަރުކޮށްފައިވާ ކަމަށް ސައުދީ ޓީވީއެއް ކަމަށްވާ އަލް އަރަބިއްޔާ އިން ރިޕޯޓްކޮށްފައިވެއެވެ. ހައްޔަރުކޮށްފައިވާ ބޭފުޅުންގެ ނަމާއި، އެބޭފުޅުން ހައްޔަރުކޮށްފައިވަނީ ކޮރަޕްޝަންގެ ކޮން މައްސަލައަކާއި ގުޅިގެންކަން އަދި ހާމަކޮށްފައެއްނުވެއެވެ.
އެހެންނަމަވެސް މިމައްސަލާގައި ހައްޔަރު ކޮށްފައިވާ އަމީރުންގެ ތެރޭގައި ޕްރިންސް އަލްވަލީދު ބިން ތަލާލް ހިމެނޭ ކަމަށް ބައެއް ނޫސްތަކުން ރިޕޯޓްކޮށްފައިވެއެވެ. އަލްވަލީދު ހައްޔަރުކޮށްފައިވާ ކަމަށް ރިޕޯޓްކޮށްފައިވާ ފަރާތްތަކުގެ ތެރޭގައި ވޯލް ސްޓްރީޓް ޖާރނަލް، ނިއު ޔޯކް ޓައިމްސް އަދި ސީއެންބީސީ ހިމެނެއެވެ. ބިލިއަނަރެއް ކަމަށްވާ އަލްވަލީދު ހައްޔަރާއި ގުޅިގެން ސައުދީ އަރަބިއްޔާ އަދި ދުނިޔޭގެ ބޮޑެތި މާލީ އިދާރާތަކަށް ލޮޅުން އަރާނެ ކަމަށް ބެލެވޭ ކަމަށް ނިއު ޔޯކް ޓައިމްސް އިން ބުނެއެވެ.
ދުނިޔޭގެ އެންމެ މުއްސަނދި މަހުޖަނުންގެ ތެރޭގައި ހިމެނޭ އަލްވަލީދުގެ ވިޔަފާރިތަކުގެ ތެރޭގައި ކިންގްޑަމް ހޯލްޑިންގ ފާހަގަ ކުރެވެއެވެ. މީގެ އިތުރުން އެމެރިކާގެ ބޮޑެތި ވިޔަފާރިތައް ކަމަށްވާ ނިއުސް ކޯޕް، ސިޓީގްރޫޕް، ޓްވިޓަރ، އެޕަލް އަދި ޓްވެންޓި ފަސްޓް ސެންޗަރީ ފޮކްސް ފަދަ ކުންފުނިތަކުގައި އަލްވަލީދު އިންވެސްޓް ކުރައްވާފައިވާ ކަމަށް ރިޕޯޓްތައް ބުނެއެވެ.
އަލަށް އެކުލަވާލި ސައުދީ އެންޓި ކޮރަޕްޝަން ކޮމިޝަނުން ތަހުގީގު ފަށާފައިވާ މައްސަލަތަކުގެ ތެރޭގައި ހިމެނެނީ 2009 ވަނަ އަހަރު ޖިއްދާގައި ފެންބޮޑުވުމުގެ މައްސަލައާއި، 2012 ވަނަ އަހަރު ސައުދީ އަރަބިއްޔާގައި މާރސް ވައިރަސް ފެތުރުމުގެ ހާދިސާ އާއި ގުޅުންހުރި މައްސަލަތަކެއް ކަމަށް އަލް އަރަބިއްޔާ އިން ރިޕޯޓް ކުރެއެވެ.
