ނަސްރުގެ ދުވަސް ފާހަގަކުރާއިރު، އެ ދުވަހުގެ ބަތަލުންނަން ނުހައްގުން ދައުވާކުރަނީ: ރައީސް ނަޝީދު
4 ނޮވެމްބަރު 2017 | ހޮނިހިރު 17:01ޓެރަރިޒަމްގެ ދައުވާ އުފުލާފައި ވަނީ އަބްދުﷲ ގާޒީ ހައްޔަރުކުރި ކަމަށް ބުނާ މައްސަލައިގައި
މޫސާ އަލީ ޖަލީލް އާއި އިބްރާހިމް ދީދީއާ ރައީސް ނަޝީދު ސަލާމް ކުރައްވަނީ
ރައީސް އަބްދުﷲ ޔާމީންގެ ސަރުކާރުން ނަސްރުގެ ދުވަސް ފާހަގަކުރާއިރު، އެދުވަހުގެ ބަތަލުންނަން ޓެރަރިޒަމްގެ ތުހުމަތުކޮށް ނުހައްގުން ދައުވާކޮށްފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަސްރުގެ ދުވަހާ ގުޅިގެން ރައީސް ނަޝީދު ޓްވީޓެއް ކުރައްވާފައި މި ވަނީ އިއްޔެ ފާހަގަކުރި ނަސްރުގެ ދުވަހާ ގުޅިގެން އެއްވެސް އެއްޗެއް ވިދާޅުނުވާތީ ބައެއް ފަރާތްތަކުން ފާޑުކިޔަމުން ދަނިކޮށެވެ.
ރައީސް ނަޝީދުގެ ޓްވީޓާއި އެޓޭޗްކޮށްފައިވާ ފޮޓޯގައި ވަނީ ކުރީގެ ޑިފެންސް މިނިސްޓަރ މޭޖާ ޖެނެރަލް ރިޓަޔަޑު މޫސާ އަލީ ޖަލީލާއި އަދި ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު ބްރިގޭޑިއަރ ޖެނެރަލް (ރޓޑ) އިބްރާހީމް މުހައްމަދު ދީދީއާ އެމަނިކުފާނު ސަލާމް ކުރައްވަނިކޮށެވެ. އަބްދުﷲ ގާޒީ ހައްޔަރުކުރި ކަމަށް ބުނާ މައްސަލާގައި އެ ދެ ބޭފުޅުންނަން ވެސް ރައީސް ޔާމީންގެ ސަރުކާރުގައި ވަނީ ޓެރަރިޒަމްގެ ދައުވާކޮށްފައެވެ. އަދި ބްރިގޭޑިއަރ ޖެނެރަލް (ރޓޑ) އިބްރާހީމް މުހައްމަދު ދީދީގެ މައްޗަށް އުފުލާފައިވާ ޓެރަރިޒަމްގެ ދައުވާގެ ޝަރީއަތް ކްރިމިނަލް ކޯޓުގައި މިހާރު ވެސް ދަނީ ކުރިއަށެވެ.
އަބްދުﷲ ގާޒީ ހައްޔަރުކުރި ކަމަށް ބުނާ މައްސަލައިގައި މީގެ ކުރިން ފަސް ބޭފުޅެއްގެ މައްޗަށް ޓެރެރިޒަމްގެ ދައުވާ ދައުލަތުން އުފުލާފައި ވެއެވެ. އެގޮތުން އިބްރާހިމް ދީދީ އާއި، ކުރީގެ ރައީސް ނަޝީދާއި، ކުރީގެ ޑިފެންސް މިނިސްޓަރު މޫސާ އަލީ ޖަލީލާއި، ކުރީގެ ޑިފެންސް މިނިސްޓަރު ތޮލްހަތު އިބްރާހިމް ކަލޭފާނުގެ އިތުރުން ކާނަލް (ރޓޑ) މުހައްމަދު ޒިޔާދުގެ މައްޗަށް ދައުވާ އުފުލި އެވެ.
މި މައްސަލައިގައި ރައީސް ނަޝީދުގެ މައްޗަށް ކުރި ޓެރެރިޒަމްގެ ދައުވާއާ ގުޅިގެން އެމަނިކުފާނުގެ މައްޗަށް ކުށް ސާބިތުވާ ކަމަށް ނިންމައި 13 އަހަރުގެ ޖަލު ހުކުމެއް ވަނީ ކޮށްފައެވެ. އަދި ރައީސް ނަޝީދު ސަރުކާރުގެ ޑިފެންސް މިނިސްޓަރު ތޮލްހަތު އިބްރާހީމްގެ މައްޗަށް ކުށް ސާބިތުވާ ކަމަށް ނިންމައި 10 އަހަރުގެ ޖަލު ހުކުމެއް ވަނީ ކޮށްފައެވެ.
މޫސާ އަލީ ޖަލީލް އާއި އިބްރާހިމް ދީދީއަކީ ނޮވެމްބަރ 1988 ގައި ރާއްޖެއަށް ކުރިމަތިވި ޢުދުވާނުން ސަލާމްކުރުމަށްޓަކައި ބޮޑެތި ގުރުބާނީތަކެއް ވެވަޑައިގެންނެވި ބޭފުޅުންނެވެ.
