އިސްތިއުފާ ދެއްވި ކުވެއިތުގެ ބޮޑުވަޒީރު އަލުން އެ މަގާމަށް

ކުވެއިތުގެ ބޮޑުވަޒީރުގެ މަގާމަށް، މިދިޔަ ހޯމަ ދުވަހު އިސްތިއުފާ ދެއްވި ކުރީގެ ބޮޑުވަޒީރު ޝެއިޚް ޖާބިރު އަލް މުބާރަކް އަލް ސަބާހް އަލުން އައްޔަން ކުރައްވައިފި އެވެ.

ބޮޑުވަޒީރުގެ މަގާމަށް ޝެއިޚް ޖާބިރު އަލުން އައްޔަން ކުރެއްވުމަށް ކުވެއިތުގެ އަމީރު ޝެއިޚް ސަބާހް އަލް އަހުމަދު އަލް ޖާބިރު އަލް ސަބާހް ބުދަ ދުވަހު ނިންމަވާފައި ވަނީ، ޤާނޫނު ހަދާ މަޖިލީހާ މެދު އުފެދުނު ނުތަނަވަސް ކަމެއްގައި ބޮޑުވަޒީރުގެ މަގާމުން ޝެއިޚް ޖާބިރާއި އޭނާގެ ކެބިނެޓް އިސްތިއުފާ ދެއްވިތާ ތިން ދުވަސް ވެސް ނުވަނީހެވެ.

ކުވެއިތުގެ ބޮޑުވަޒީރު ޝެއިޚް ޖާބިރު އަލް މުބާރަކް އަލް ސަބާހްގެ އިސްތިއުފާ، އެޤައުމުގެ އަމީރަށް ހުށަހަޅުއްވާފައި ވަނީ ހޯމަ ދުވަހުގެ މެންދުރުފަހުގެ ވަގުތެއްގައެވެ. ބޮޑުވަޒީރު ޝެއިޚް ޖާބިރާއި އޭނާގެ ކެބިނެޓްގެ އިސްތިއުފާ ކުވެއިތުގެ އަމީރު ޝެއިޚް ސަބާޙް އަލް އަހުމަދު އަލް ޖާބިރު އަލް ސަބާޙް ވަނީ ހަމަ އެދުވަހު ގަބޫލު ކުރައްވާފައެވެ.

ކުވެއިތުގެ ބޮޑުވަޒީރު އިސްތިއުފާ ދެއްވީ، އެޤައުމުގެ މިނިސްޓަރ އޮފް ސްޓޭޓް ފޯ ކެބިނެޓް އެފެއަރޒް އަދި ވަގުތީ ގޮތުން އެގައުމުގެ އިންފޮމޭޝަން މިނިސްޓްރީ ހިންގެވުމާއި ހަވާލުވެވަޑައިގެން ހުންނެވި ޝެއިޚް މުޙައްމަދު އަބްދުﷲ އަލް މުބާރަކް އަލް ސަބާހްއާ ދެކޮޅަށް އިތުބާރު ނެތް ކަމުގެ ދެ މައްސަލައެއްގެ ވޯޓު، މިދިޔަ އަންގާރަ ދުވަހާއި ބުދަ ދުވަހު ބާއްވާ ގާނޫނު ހަދާ މަޖިލީހުގެ ޖަލްސާއަށް ތާވަލް ކޮށްފައިވަނިކޮށް ކަމަށް ކުވެއިތު ނިއުސް އޭޖެންސީ (ކޭޔޫއެންއޭ) އިން ރިޕޯޓް ކުރިއެވެ.

ޤާނޫނު ހަދާ މަޖިލީހުގެ ޖަލްސާގެ އެޖެންޑާގައިވާ ގޮތުން، ޤާނޫނު ހަދާ މަޖިލީހުގެ ޖަލްސާ އަށް ޝެއިޚް މުޙައްމަދު އަބްދުﷲގެ އިތުބާރު ނެތް ކަމުގެ ވޯޓަށް އަހަނީ، ތަފާތު އެކި މައްސަލަތަކާ ގުޅިގެން އޭނާގެ މައްޗަށް އިތުބާރު ނެތް ކަމުގެ ވޯޓެއް ނެގުމަށް ޤާނޫނު ހަދާ މަޖިލީހުގެ 10 މެމްބަރަކު ހުށަހަޅާފައިވާ ހުށަހެޅުމަކާ ގުޅިގެންނެވެ.

އެޖަލްސާ އަށް އެޖެންޑާ ކުރި މައްސަލަތަކުގެ ތެރޭގައި ޒުވާނުންނާ ކުޅިވަރު، އަދި ޙާއްސަ އެހީއަށް ބޭނުންވާ މީހުންނަށް ޙާއްސަ ބޯހިޔާވަހިކަމާއި، ވިޔަފާރީގެ މާހައުލެއް ގާއިމް ކުރުމާއި، އަންހެނުންނާއި އާއިލީ ކަންކަމާއި ތިމާވެށްޓާ ގުޅޭ މައްސަލަތަކަށް ހާއްސަ ވަގުތީ ކޮމިޓީތަކެއް އެކުލަވާލުން ހިމެނެއެވެ.

އެހެންނަމަވެސް ބޮޑުވަޒީރުގެ އިސްތިއުފާއާއެކު، އާ ސަރުކާރެއް އެކުލަވާލެވެންދެން ޤާނޫނު ހަދާ މަޖިލީހުގެ ޖަލްސާތައް ވަނީ މެދުކަނޑާލާފައެވެ.

ކުވެއިތުގެ ބޮޑުވަޒީރުގެ މަގާމާއި ޝެއިޚް ސަބާހް ހަވާލުވެވަޑައިގެންނެވީ 2011 ވަނަ އަހަރުގެ ޑިސެމްބަރު މަހު، އޭރު ހުންނެވި ބޮޑުވަޒީރު ނާސިރު މުޙައްމަދު އަލް އަހުމަދު އަލް ސަބާހް އިސްތިއުފާ ދެއްވުމާއި ގުޅިގެންނެވެ. އޭރު ޝެއިޚް ޝަބާހް ހުންނެވީ ބޮޑުވަޒީރުގެ ނައިބުގެ މަގާމުގައެވެ. އޭގެ ފަހުން ޖެހިގެން އައި އަހަރު ބޭއްވި ޤާނޫނު ހަދާ މަޖިލީހުގެ އިންތިޚާބު ކާމިޔާބުކޮށް، ޝެއިޚް ސަބާހް ވަނީ ބޮޑުވަޒީރުގެ މަގާމް ދިފާއު ކުރައްވާފައެވެ.

ފަހުގެ ތާރީޚުގައި ކުވެއިތުގެ ކެބިނެޓްގެ މަގާމްތަކަށް އަވަސް އަވަހަށް، ބޮޑެތި ބަދަލުތަކެއް އައިސްފައިވެއެވެ. އެންމެ ފަހުން ކުވެއިތުގެ ކެބިނެޓަށް ބޮޑު ބަދަލެއް އައިސްފައިވަނީ މިދިޔަ ފެބްރުއަރީ މަހުގެ ތެރޭގައެވެ.