ވަރުންގެ "އޮކްޓޯބަރ" އަންނަ އަހަރުގެ އެޕްރީލްގައި
"އޮކްޓޯބަރ" ބެލުންތެރިންނަށް ފެނިގެންދާނީ އެޕްރީލް މަހުގެ 13 ވަނަ ދުވަހުގައި
ވަރުން ދަވަން ފިލްމެއްގެ މަންޒަރެއްގައި އާލިއާ ބަޓް އާއި އެކީ
ވަރުން ދަވަންގެ ފިލްމް "އޮކްޓޯބަރ" އަންނަ އަހަރުގެ އެޕްރީލް މަހު ރިލީޒް ކުރަން ހަމަޖެހިފައިވާ ކަމަށް ވަރުން ބުނެފިއެވެ.
ވަރުން ވަނީ އޭނާގެ އިންސްޓަރގްރާމުގައި އެކަން ހިއްސާކޮށްފައެވެ. ވަރުން ބުނީ އޭނާގެ "އޮކްޓޯބަރ" ބެލުންތެރިންނަށް ފެނިގެންދާނީ އެޕްރީލް މަހުގެ 13 ވަނަ ދުވަހުގައި ކަމަށެވެ.
މި ފިލްމު ޑައިރެކްޓް ކޮށްފައިވަނީ ސުޖިތު ސިރްކާސްއެވެ.
މި ފިލްމުގައި ވަރުންއާއި އެކު ފެނިގެންދާނީ ބިނީތާ ސަންދޫ އެވެ. ބިނީތާ ސަންދޫއަކީ ބޮލީވުޑަށް އަލަށް ތައާރަފް ވާ ތަރިއެކެވެ.
"އޮކްޓޯބަރު" ގެ ބައެއް މަންޒަރުތައް މޭކަޕް ނުކޮށް ގްލިސަރިން ވެސް ބޭނުން ނުކޮށް ވަރުން ވަނީ ޝޫޓް ކޮށްފައި ކަމަށް ރިޕޯޓްތައް ބުނެއެވެ. އަދި ދެރަވާ މަންޒަރުތަކުގައި ރޯލުމަށް ވަރުން ގްލިސަރިން ބޭނުން ނުކުރާކަމަށް ވަނީ ރިޕޯޓް ކޮށްފައެވެ.
މިހާރުވެސް ވަރުން ދަނީ "އޮކްޓޯބަރ" ގެ ޝޫޓިން ކުރިއަށް ގެންދަމުންނެވެ.
