އީޔޫގެ ވަފުދުން އިދިކޮޅު ޕާޓީތަކާ ބައްދަލުކޮށްފި
29 އޮކްޓޯބަރު 2017 | އާދީއްތަ 21:05އެބޭފުޅުން ވަރަށް ރަނގަޅަށް ކަންކަން އޮޅުން ފިލުއްވި
އީޔޫގެ ވަފުދާއެކު އިދިކޮޅު ޕާޓީތައް
ރާއްޖޭގެ ހާލަތާމެދު އިދިކޮޅު ފަރާތްތަކާއެކު އީޔޫގެ ވަފުދުން އާދީއްތަ ދުވަހުގެ ރޭ މަޝްވަރާކޮށްފި އެވެ.
ހޮޓެލް ޖެންގައި ބޭއްވި ބައްދަލުވުމަށް ފަހު، ޖުމްހޫރީ ޕާޓީގެ ޑެޕިއުޓީ ލީޑަރު އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވީ މި ބައްދަލުވުމުގައި ރާއްޖޭގެ ސިޔާސީ ހާލަތު ވަރަށް ރަނގަޅަށް ކިޔައި ދެއްވުނު ކަމަށެވެ. ރައްޔިތުންގެ މަޖިލީހުގެ ހާލަތާއި ސިޔާސީ ބޭފުޅުންނަށް ކުރަމުންދާ ދުއްތުރާތަކާއި ޖަލުގައި ތިއްބެވި ސިޔާސީ ލީޑަރުންގެ މައުލޫމާތު ހިއްސާ ކުރެއްވި ކަމަށެވެ.
ރާއްޖެ ވަޑައިގެން އުޅުއްވީ އީޔޫ ޕާލަމެންޓުގެ ތިން މެމްބަރުންނާއެކު ބޭއްވި ބައްދަލުވުމުގައި ރައީސް އަބްދުﷲ ޔާމީންގެ ސަރުކާރުގެ އަމަލުތަކާއި އިދިކޮޅު މެމްބަރުންނާ ދޭތެރޭ އަޅާ ފިޔަވަޅުތަކުގެ އިތުރުން އަންނަ އަހަރު މިނިވަން ރިޔާސީ އިންތިޚާބެއް ބޭއްވުމާ ގުޅޭ ގޮތުން މަޝްވަރާ ކުރެއްވި ކަމަށްވެސް ރިޔާޒް ވިދާޅުވިއެވެ.
މި ބައްދަލުވުމުގައި އިދިކޮޅު ފަރާތްތަކުން ބައިވެރިވީ ރިޔާޒުގެ އިތުރުން މަޑުއްވަރީ ދާއިރާގެ މުހައްމަދު އަމީތާއި ކުރީގެ ރައީސް މައުމޫން އަބްދުލް ގައްޔޫމްގެ ދަރިކަނބަލުން ޔުމްނާ މައުމޫނާއި މައްޗަންގޮޅި އުތުރު ދާއިރާ މެމްބަރު މާރިޔާ އަހުމަދު ދީދީ އާއި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އާއި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އަދި އަދާލަތު ޕާޓީގެ ފޮރިން ރިލޭޝަންސް ކޮމެޓީގެ ޗެއާ ޝިދާތާ ޝަރީފެވެ.
އީޔޫ ވަފުދުގެ ބޭފުޅުން ހޯމަ ދުވަހު ސަރުކާރުގެ އިސްވެރިންނާ ވެސް ބައްދަލު ކުރުމަށް ވަނީ ނިންމައިފަ އެވެ. އޭގެ ތެރޭގައި ރައީސުލް ޖުމްހޫރިއްޔާ ޔާމީން ޢަބްދުލް ޤައްޔޫމާވެސް ބައްދަލު ކުރުމަށް ހަމަޖެހިފައިވާކަމަށް ރާއްޖެ އެމްވީއަށް ވަނީ މައުލޫމާތު ލިބިފައެވެ.
އީޔޫ ޕާލަމެންޓްރީ ގުރޫޕުގެ އިސް ވަފުދެއް ރާއްޖެ އައިސްފައިވާއިރު، ފްރާންސްގެ ސްޓްރަސްބާގްގައި މި މަހުގެ ފަސްވަނަ ދުވަހު ބޭއްވި ޕާލަމަންޓުގެ ބައްދަލުވުމުގައި ވަނީ ރާއްޖެއަށް ފިޔަވަޅު އެޅުމަށް ގަރާރެއް ފާސްކޮށްފަ އެވެ.
