އަލީ އާރިފް އެންދެރިމާގެއަށް ވަޑައިގެން ފާރިސްއާ ބައްދަލުކޮށްފި
14 މާރިޗު 2017 | އަންގާރަ 18:56މަޝްވަރާކުރެވުނީ ކޮންކަމަކާއި ގުޅިގެންކަމެއް ސާފެއް ނުވޭ
ރައްޔިތުންގެ މަޖިލީހުގެ ކެލާ ދާއިރާގެ މެމްބަރު އަލީ އާރިފް ޕީޕީއެމްގެ ޖަލްސަގައި ވާހަކަދައްކަވަނީ
ރައީސް އަބްދުﷲ ޔާމީންގެ ފެކްޝަނަށް ނިސްބަތްވާ، ކެލާ ދާއިރާގެ މެމްބަރު އަލީ އާރިފް، ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާ ބައްދަލުކުރައްވައިފި އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ ކައިރިވެފައިވަނިކޮށް، ކުއްލިގޮތަށް ރައީސް އަބްދުﷲ ޔާމީންގެ ފެކްޝަނަށް ނިސްބަތްވެވަޑައިގަންނަވާ، ކެލާ ދާއިރާގެ މެމްބަރު އަލީ އާރިފް، ފާރިސް މައުމޫނާ ބައްދަލުކުރައްވާފައި ވަނީ އަންގާރަ ދުވަހުގެ (މިއަދު) ހަވީރުގެ ވަގުތެއްގަ އެވެ. އެ ބައްދަލުވުން ކުރިއަށް ގެންގޮސްފައިވަނީ އެންދެރިމާގޭގައިކަން ވެސް ރާއްޖެޓީވީއަށް އެނގިފައިވެއެވެ. ނަމަވެސް މި ބައްދަލުވުމުގައި މަޝްވަރާކުރެވުނީ ކޮންކަމެއް ކަމެއް އަދި، މަޝްވަރާކުރެވިފައިވަނީ ކޮން ބޭނުމެއްގައި ކަމެއްވެސް އެނގިފައެއް ނުވެއެވެ.
މި ބައްދަލުވުމާ ގުޅޭ ގޮތުން އަލީ އާރިފްގެ ބަހެއް ހޯދުމަށް އޭނާއަށް ގުޅާލުމުން، ފޯނަށް ޖަވާބު ނުދެއްވާތީ ބަހެއް ލިބޭ ގޮތް ވަނީ ނުވެފަ އެވެ.
ފާރިސް މައުމޫނަކީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުއްވުމުގައިވެސް އިސްކޮށް ހުންނެވި ބޭފުޅެކެވެ. އަދި ފާރިސް އިސްކޮށް ހުންނަވާ އެ މަސައްކަތް ފެށުމާއެކު، ފާރިސްއަށް ބިރުދެއްކުމަށް ސަރުކަރުން އަންނަނީ ގިނަ ކަންތައްތަކެއް ކުރަމުންނެވެ. އެގޮތުން ފާރިސް ވަނީ ކުއްލިގޮތަށް އޭސިސީއަށް ހާޒިރުކޮށް ސުވާލުވެސް ކޮށްފަ އެވެ.
ފާރިސް، މީގެކުރިން ވިދާޅުވެފައި ވަނީ، ކޮންމެ ބިރެއް ދެއްކި ކަމުގައިވީ ނަމަވެސް ކުރާ މަސައްކަތަށް އެއްވެސް ބަދަލެއް ނުގެންނާނެ ކަމަށެވެ. މަޖިލީހުގެ ރައީސްގެ އިތުބަރު ނެތްކަމަށް ފާސްކުރުމަށް ބޭނުންވާ އަދަދަށް ވޯޓް ލިބިފައިވާ ކަމަށް އޭނާ ވިދާޅުވެފައިވެއެވެ.
