އޮފީސް ބެޑްމިންޓަން ޗެމްޕިއަންޝިޕް: ފިރިހެން ބައިގެ ޗެމްޕިއަންކަން އެމްއެންޑީއެފްއަށް، އަންހެން ބައި ބީއެމްއެލްއަށް

ސަރުކާރު އޮފީސް/ކުންފުނިތަކަށް ހުޅުވާލައިގެން ކުރިޔަށް ގެންދިޔަ އިންޓަ އޮފީސް ބެޑްމިންޓަން ޗެމްޕިއަންޝިޕްގެ ޓީމް އިވެންޓްގެ ފިރިހެން ބައިގެ ޗެމްޕިއަންކަން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ހޯދިއިރު، އަންހެން ބައިގެ ޗެމްޕިއަންކަން ބޭންކް އޮފް މޯލްޑިވްސް (ބީއެމްއެލް) އިން ހޯދައިފިއެވެ.

ހޮނިހިރު ދުވަހު ކުރިޔަށް ދިޔަ ފިރިހެން ޓީމް އިވެންޓްގެ ޗެމްޕިއަންކަން އެމްއެންޑީއެފް އިން ހޯދީ ފައިނަލްގައި ސްޓެލްކޯއާ ވާދަ ކޮށްގެންނެވެ. މި އިވެންޓްގެ ތިންވަނަ ހޯދާފައި ވަނީ މޯލްޑިވްސް ޕޮލިސް ސާވިސްއާ ވާދަކޮށް މޯލްޑިވްސް އެއާޕޯޓްސް ކޮމްޕެނީއެވެ.

ހޮނިހިރު ދުވަހު ކުރިޔަށްދިޔަ އަންހެން ޓީމް އިވެންޓްގެ ޗެމްޕިއަންކަން ބީއެމްއެލް އިން ހޯދީ މޯލްޑިވްސް ކަސްޓަމްސް ސާވިސްއާ ވާދަކޮށްގެންނެވެ. މި އިވެންޓްގެ ތިންވަނަ ހޯދާފައިވަނީ ދިރާގާ ވާދަކޮށް، ސްޓެލްކޯއެވެ.

މިފަހަރު ބެޑްމިންޓަން އެސޯސިއޭޝަންގެ ފަރާތުން އަގުވަޒަންކޮށް ހިތްވަރުދިނުމުގެ ގޮތުން ދޭ ހަނދާނީ ލިޔުން ދީފައި ވަނީ 1986 ވަނަ އަހަރުގެ ބެޑްމިންޓަން ގައުމީ ސިންގަލްސް ޗެމްޕިއަން ކަމަށްވާ އައްޑޫސިޓީގެ އުމުރުން 64 އަހަރުގެ އެމްއޭސީއެލް ޓީމުގެ އަބްދުﷲ އަލީއެވެ. އަބްދުﷲ އަލީ ވަނީ ކޮމަންވެލްތް ގޭމްސް އަދި އިންޑިއަން އޯޝަން އައިލޭންޑް ގޭމްސްފަދަ ބައިނަލްއަގުވާމީ ގިނަ މުބާރާތްތަކެއްގައި ރާއްޖެ ތަމްސީލްކޮށްފައެވެ..

މި މުބާރާތުގައި ފިރިހެން 15 ޓީމު ވާދަކޮށްފައިވާއިރު، އަންހެން ނުވަ ޓީމެއް ވަނީ ވާދަކޮށްފައެވެ.