ރިޔާސީ އިންތިޚާބަށްފަހު ރައީސް ޔާމީން ހައްޔަރު ކުރާނަން: މަހްލޫފް
22 އޮކްޓޯބަރު 2017 | އާދީއްތަ 18:34ރައީސް ޔާމިން އަކީ ހައްޔަރު ކުރަން ޖެހޭ ފަރާތެއް
މަހްލޫފް މީޑިއާތަކަށް އިންޓަރވިއު ދެއްވަނީ
ރައީސް ޔާމީނަކީ އެމަނިކުފާނު ކުރައްވާފައިވާ ކަންކަމުގެ ސަބަބުން ހައްޔަރު ކުރަންޖެހޭ ބޭފުޅެއް ކަމަށާއި ކުރިއަށް އޮތް 2018 ގެ ރިޔާސީ އިންތިޚާބަށްފަހު ރައީސް ޔާމީން ހައްޔަރު ކުރައްވާނެ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހްލޫފް ވިދާޅުވެއްޖެއެވެ.
ރާއްޖެ ޓީވީން އާދީއްތަ ދުވަހުގެރޭ ގެނެސްދިން ފަލަ ސުރުޚީ ޕްރޮގްރާމްގައި ސިލޯނުގައި ހުންނަވައިގެން މަހްލޫފް ވިދާޅުވީ ރައީސް ޔާމީން ކުރައްވާފައިވާ އަދި ކުރައްވަމުން ގެންދަވާ ކަންކަމަކީ ދިވެހި ރައްޔިތުން އިންސާފް ބޭނުންވާ ކަންކަން ކަމަށާއި އެކަންކަން ބެލޭނެ ކަމަށެވެ. މަހްލޫފް ވިދާޅުވީ އެކަމަށްޓަކައި ރިޔާސީ އިންތިޚާބަށްފަހު ރައީސް ޔާމީން ހައްޔަރު ކުރާނެ ކަމަށާއި ރައީސް ޔާމީން ހައްޔަރުކުރަން ޖެހޭ ކަމަށެވެ.
"އަޅުގަނޑު މިއަދުވެސް ރައީސް ޔާމީނަށް ދޭން އޮތް ނަސޭހަތަކީ ރިޔާސީ އިންތިޚާބުގައި ވާދަކުރައްވާނަމަ ރާއްޖެއިން ބޭރުގައި ހުންނަވާށޭ. އެހެން ނޫންކަމަށްވާނަމަ އަޅުގަނޑުމެން ހިފާނަން. ހަމަ ވަރަށް ސާފުކޮށް މިދަންނަވަނީ ރައީސް ޔާމީނަކީ ހިފާ ހައްޔަރުކޮށް ޖަލަށް ލާން ޖެހޭ ފަރާތެއް.އަދި ހަމަ ރައީސް ޔާމީން އަރިހުގައިވެސް އެކަހަލަ ބައިވަރު ފަރާތްތައް އެބަތިބި. ދިވެހިރައްޔިތުންނަށް އެތައްބައިވަރު ގެއްލުމެއް އަނިޔާތަކެއް ދީ ހަދާފައިވާއިރުގައި ދިވެހިރައްޔިތުން އެކަމަށް އިންސާފް ބޭނުން." މަހްލޫފް ވިދާޅުވިއެވެ.
މަހްލޫފް ވިދާޅުވީ ކުރިއަށް އޮތް ރިޔާސީ އިންތިޚާބުގައި އިލެކްޝަންސް ކޮމިޝަނުން ވަރަށް ބޮޑަށް ވޯޓު އޮޅުވާލުމަށް މަސައްކަތް ކުރާނެ ކަމަށާއި ނަމަވެސް އޮޅުވާލެވޭވަރަށްވުރެ ބޮޑުތަނުން ރިޔާސީ އިންތިކާބު ކާމިޔާބު ކުރާނެ ކަމަށެވެ. އެހެންކަމުން ވޯޓުން ވަގުހަދާ އޮޅުވާލައިގެން ރިޔާސީ އިންތިޚާބު ކުރަން ނޫޅުމަށާއި އެފަދަ ގޮތަކަށް ވިސްނާނަމަ އެއީ ގޯސް ވިސްނުމެއް ކަމަށްވެސް މަހްލޫފް ވިދާޅުވިއެވެ.
މަހްލޫފް ވިދާޅުވީ ގުޅިފައިވާ ޕާޓީތަކުން ރައީސް ޔާމީނާ ދެކޮޅަށް ނުކުމެ އިރާދަ ކުރެއްވިއްޔާ ދެލައްކައެއްހާ ވޯޓު ހޯދާނެ ކަމަށެވެ.
"އިރާދަ ކުރެއްވިއްޔާ ރިޔާސީ އިންތިޚާބުގައި އަޅުގަނޑުމެން ދެލައްކަ ވޯޓު ނަގާނަން. ދެލައްކަ 60 ހާސް މީހުން ވޯޓުލާނެކަމަށް ބެލެވެނީ އޭގެ ތެރެއިން 2 ލައްކަ ވޯޓު އަޅުގަނޑުމެން ނަގާއިރު އަމަޖަދާ ސުލައިމާނާ ކިހިނެއްތޯ އެއްލައްކަ ވޯޓު އޮޅުވާލާނީ. އުޑުގަ ޖެހިފަ ބިމުގަ ޖެހުނަސް އެމީހުންނަކަށް އެކަމެއް ނުކޮށްދެވޭނެ" މަހްލޫފް ވިދާޅުވިއެވެ.
