މާކުރަތުގައި ރާއްޖެޓީވީއަށް އެހީވުމަށް "އަބުރުފުޅު ފަންޑު" ފޮއްޓެއް ހުޅުވައިފި

ރާއްޖެޓީވީއަށް އެހީވުމަށް "އަބުރުފުޅު ފަންޑު" ފޮއްޓެއް ރ. މާކުރަތުގައި ހުޅުވައިފިއެވެ.

މާކުރަތު އެމްޑީޕީ ހަރުގޭގައި އެރަށު ކައުންސިލްގެ ތިން މެމްބަރުން އިސްނަގައިގެން ބޭއްވި ބައްދަލުވުމުގައި މި ފަންޑު ފޮށި ބުރާސްފަތި ދުވަހުގެރޭ 8.30 ގައި ހުޅުވާފައިވާއިރު ފަންޑު ފޮށި ބަހައްޓާފައިވަނީ މާކުރަތު އެމްޑީޕީ ހަރުގޭގައެވެ. ފަންޑު ފޮށި ހުޅުވައިދިނީ މާކުރަތުގައި އެމްޑީޕީ ހަރަކާތްތަކުގައި އިސްކޮށް ހަރަކާތްތެރިވާ ފަރާތެއް ކަމަށްވާ ނިޒާރުއެވެ.

މާކުރަތު ކައުންސިލްގެ ނައިބް ރައީސް ހުސެއިން އިމާދު ވިދާޅުވީ، އެމްޑީޕީ މާކުރަތު ކުރިމަގު ގޮފީގެ ފަރާތުން ފަންޑު ފޮށި ހުޅުވުމުގެ މައިގަނޑު މަޤްސަދަކީ ރާއްޖެޓީވީއަށް އެހީތެރިވުން ކަމަށާއި އިންސާފާއި ހަމަހަމަކަށް ލޯބިކޮށް، ބާރުއެޅުން ކަމަށެވެ.

އިމާދު ވިދާޅުވީ ފަންޑު ފޮށި ކުރިއަށް އޮތް ތިން ދުވަހު ހަރުގޭގައި ބަހައްޓަން ނިންމާފައިވަނީ ހަވީރު 4 އަކުން ރޭގަނޑު 10 އަކަށް ކަމަށެވެ. އަދި ހުކުރު ދުވަހުގެ ރޭ ރަށު ތެރޭގައި އެކި ހިސާބުތަކުގައި ފަންޑު ފޮށި ބަހައްޓާ ފަންޑަށް ފާއިސާ އިތުރުކުރުމަށް ދޮރުން ދޮރަށް ހިނގާނެކަމަށް އޭނާ ވިދާޅުވިއެވެ.

އިމާދު އިތުރަށް ވިދާޅުވީ ރަށު ރައްޔިތުންގެ ފަރާތުން ތަރުޙީބު އިތުރުވެގެންދާނަމަ ފަންޑު ފޮށި ބަހައްޓާ މުއްދަތު އިތުރު ކުރާނެ ކަމަށެވެ.

ރާއްޖެޓީވީއަށް އެހީވުމަށް ހއ. ހޯރަފުށި، ހއ، ދިއްދޫ، އަދި ރ. ހުޅުދުއްފާރުގައިވެސް މީގެ ކުރިން ވަނީ ފަންޑު ފޮށި ބަހައްޓާފައެވެ. އަދި މި ފަންޑަށް ފާއިސާ ހޯދުމަށް އެކި ފަރާތްތަކުގެ ދީލަތި އެހީތެރިކަމާއި އެކު ރާއްޖެޓީވީގެ މުވައްޒަފުން ދަނީ ރާއްޖޭގެ އެކި ކަންކޮޅު ތަކަށް ދަތުރުކުރަމުންނެއެވެ.

މިގޮތުން މާމިގިލި، ކުޅުދުއްފުށި، އައްޑޫ ސިޓީ، ހުޅުމާލެ، އަދި ވިލިމާލޭގައި ހަރަކާތްތަކެއް ހިންގާފައިވާއިރު މިވަގުތު ގއ. ވިލިނގިލީގައި ދަނީ ފަންޑަށް ފާއިސާ ހޯދުމަށް ހަރަކާތްތަކެއް ހިންގަމުންނެވެ.