ޓިވެކް ކޯސްތަކުގެ އޯޕަންޑޭ މި މަހު 21 އަދި 28 ގައި
ބ. އޭދަފުށީގައި އޯޕަންޑޭ އޮންނާނީ މަހުގެ 21 ވަނަ ދުވަހު
ޓިވެކްގެ އެގްޒެކްޓިވް ޑިރެކްޓަރު މުހައްމަދު ނަޒީފާއި ޓިވެކްގެ ކޮންސަލްޓަންޓް މޫސާ ޝާފިއު ރާއްޖެ ޓީވީގެ ޕްރޮގްރާމްގައި ވާހަކަ ދައްކަވަނީ
މަސައްކަތްތެރިކަމުގެ ރޮނގުން ޒުވާނުން ތަމްރީން ކުރުމުގެ މަގުސަދުގައި ކޯސްޓްލައިން ފައުންޑޭޝަނުން ހުޅުވާފައިވާ ޓެކްނިކަލް އެންޑް ވޯކޭޝަނަލް އެޑިއުކޭޝަން ސެންޓަރު (ޓިވެކް)ގެ ކޯސްތަކުގެ އޯޕަންޑޭ މި މަހު ބޭއްވުމަށް ނިންމައިފި އެވެ.
ދިވެހި ޒުވާން މަސައްކަތްތެރިން ތަމްރީން ކުރުމަށްޓަކައި ބާ ކިހާދޫގައި ހުޅުވާފައިވާ ޓިވެކްގެ ކޯސްތައް ކުރިއަށް ގެންދިއުމަށް ހަމަ ޖެހިފައިވަނީ ހިލެއެވެ. މި ކޯސްތައް ފެށުމަށް ހަމަ ޖެހިފައިވަނީ އަންނަ ޖެނުއަރީ މަހުގަ އެވެ.
ރާއްޖެޓީވީގެ "ޙބަރުފީތާ" ޕްރޮގުރާމްގައި ޓިވެކްގެ އެގްޒެކްޓިވް ޑިރެކްޓަރު މުހައްމަދު ނަޒީފް ވިދާޅުވީ އެ ސެންޓަރުން ފަށާ ތިން ކޯހާ ގުޅޭ ގޮތުން މައުލޫމާތު ދިނުމަށް ބާއްވާ އޯޕަންޑޭ ބ. އޭދަފުށީގައި މި މަހުގެ 21 ވަނަ ދުވަހު އޮންނައިރު ރ.އުނގޫފާރުގައި މި މަހުގެ 28 ވަނަ ދުވަހު ވެސް އޯޕަންޑޭ އޮންނާނެ ކަމަށެވެ. އަދި ވިދާޅުވީ އޯޕަންޑޭ އޮންނަ ދުވަހު ކޯސްތަކާ ބެހޭ މައުލޫމާތު ދިނުމުގެ އިތުރަށް ކޯސްތަކުގައި ބައިވެރިވުމަށް ވެސް ފޯމް ހުށަހެޅޭނެ ކަމަށެވެ. ހަމަ އެހެންމެ މިހާރު ވެސް ޓިވެކްގެ ވެބްސައިޓުން ފޯމް ޑައުންލޯޑް ކުރުމަށް ފަހު މެއިލް ކޮށްގެން ވެސް ކޯހުގައި ބައިވެރިވުމަށް ހުށަހެޅިދާނެ ކަމަށެވެ.
" އަޅުގަނޑުމެންގެ މަގުސަދަކީ ވަކި ކުއްޖަކު ލައްވާ ވަކި ކަމެއް ކުރުވުމެއް ނޫން. މީގެ ބޭނުނަކީ މީގެ އެވެއާނަސް ކްރިއޭޓްކޮށް އެކުދިންނަށް ފަސޭހަވާނެތާ. އެތަނުން ފޯމް ފުރާފަ ލެވޭނެތާ. އަދި ފޯމް ހިފައިގެންގޮސް ފަހުން ވެސް ލެވިދާނެ،" އޭނާ ވިދާޅުވި އެވެ.
އެއްތަނެއްގައި ތިބެގެން ކުރިއަށް ގެންދާ ކޯސްތަކެއް ކަމަށްވާތީ އެއް ފަހަރާ ހުރިހާ ކުދިންނަށް ޖާގަ ނުދެވިދާނެ ކަމަށާއި މިހާރު ކޮންމެ ކޯހަކުން އެއްފަހަރާ ލިބޭނީ 50 ޖާގަ ކަމަށް ވެސް ނަޒީފް ވިދާޅުވި އެވެ. ނަމަވެސް ކޯހަށް ހުށަހަޅަމުންދާ ކުދިންނަށް އޭގެ ފަހުން ވެސް ޖާގަ ދެމުންދާނެ ކަމަށް އޭނާ ވިދާޅުވި އެވެ.
ޓިވެކްގެ ކޮންސަލްޓަންޓް މޫސާ ޝާފިއު ވިދާޅުވީ އެ ސެންޓަރުގައި ޓެކްނިކަލް އަދި ވޮކޭޝަން އެޑިއުކޭޝަންގެ އިތުރުން ތަފާތު ޓްރޭނިންތައް ހިންގާއިރު މައިގަނޑު ހަތަރު ޕްރޮގުރާމެއް އެ ސެންޓަރުން ހިންގާނެ ކަމަށެވެ.
"އޭގެ ތެރޭގައި މި ހިމެނެނީ އިލެކްޓްރިކަލް ވޯކްސް ޕްރޮގްރާމަކާ އިންޖީން ރިޕެއަރިން އެންޑް މެއިންޓެނަސް ޕްރޮގްރާމަކާ ރިފްރެޖެރޭޝަން އެންޑް އެއާކޮންޑިޝަނިން ޕްރޮގުރާމަކާ ޕްލަމްބިން ވޯކްސް ޕްރޮގްރާމެއް. ހަތަރު ޕްރޮގުރާމް ވެސް ހިންގަނީ ލެވެލް ތްރީ އެމްކިއުއޭ ސެޓްފިކެޓަކާ ހަމައަށް،" އޭނާ ވިދާޅުވި އެވެ.
މި ކޯސްތައް ހިންގުމަށް ހަމަ ޖެހިފައި ވަނީ ދަރިވަރުން ކޯހުގައި ކިޔަވަމުންދާއިރު އިތުރު ހުނަރުތައް ލިބިގެންދާނެ ގޮތައް ކަމަށް ވެސް ޝާފިއު ފާހަގަ ކުރެއްވި އެވެ. އަދި މި ކޯސްތަކުގައި ކިޔަވަދޭ މުއްދަތަކީ 15 ހަފްތާ ކަމަށް ވިއަސް ބައިވެރިވާ ކުދިން އިތުރަށް ދެތިން ހަފްތާ ތިބެން ޖެހިދާނެ ކަމަށް ވެސް އޭނާ ވިދާޅުވި އެވެ. އޭގެ އިތުރަށް އުމުރުން 16 އަހަރުން މަތީގެ ޒުވާނުންނަށް މި ކޯހުގައި ބައިވެރިވުމުގެ ފުރުސަތު އޮންނާނެ އެވެ.
