ސަރުކާރު ޒިންމާދާރުކޮށް ރައްޔިތުންގެ އަޑާއި، ރައްޔިތުންގެ ހިޔާލުތައް ބްރޯޑްކާސްޓްކުރުމަކީ މީޑިއާތަކުގެ ޒިންމާއެއް ކަމަށާއި، އެކަންކުރުމުގެ ސަބަބުން ރާއްޖެޓީވީ ޖޫރިމަނާކުރަނީ ޤާނޫނާ ހިލާފަށް ކަމަށް ބުނެ ރާއްޖެޓީވީއަށް އެހީތެރިކަން ފޯރުކޮށްދިނުމަށް އިދިކޮޅު އެންމެ ބޮޑު ޕާޓީ، އެމްޑީޕީން ގޮވާލައިފި އެވެ.

އެމްޑީޕީން އާންމުކޮށްފައިވާ ބަޔާނެއްގައި ބުނެފައި ވަނީ، ސަރުކާރުގެ ދޯދިޔާ ކަމާއި ޢަބްދުﷲ ޔާމީންގެ ޚުދުމުހުތާރު ވެރިކަމަށް ރައްޔިތުންގެ ފާޑުކިޔުމާއި ނުރުހުން އިންތިހާއަށް ގިނަވެފައިވާ މިވަގުތުގައި އެ ފާޑުކިޔުންތަކުގެ ޚަބަރުތަކާއި ރައްޔިތުންގެ ޚިޔާލު ބްރޯޑްކާސްޓް ކުރުމަކީ ކުށެއް ކަމަށް ޤާނޫނާ ޚިލާފަށް ކަނޑައަޅައި ރާއްޖެ ޓީވީއަށް އަދަބު ދިނުމުގެ ގޮތުން ފުލުފުލުން އަތްނުފޯރާ މިންވަރަށް ޖޫރިމަނާކުރަމުން ގެންދާތީވެ، އެކަމަށް ފައިސާ ހޯދުމަށް އެ ޓީވީގެ ފަރާތުން ކުރިއަށް ގެންދަވާ "އަބުރުފުޅު" ފަންޑަށް އެހީތެރިކަން ފޯރުކޮށްދިނުމަށް ގޮވާލާ ކަމަށެވެ.

އެމްޑީޕީން ބުނީ، ސަރުކާރުގެ ކަންކަމާ މެދު ރައްޔިތުންގެ ޚިޔާލު ބްރޯޑްކާސްޓްކޮށް އެ ޚަބަރުތައް ދުރާއި ގާތުން އާންމުކޮށް ފޯރުކޮށްދިނުމަކީ ޚަބަރުފަތުރާ ފަރާތްތަކުގެ ޒިންމާއެއް ކަމަށެވެ. އަދި އެކަމާ ގުޅިގެން މާލީ ބޮޑެތި އަދަބުތައް މީޑިޔާގެ ބެލެނިވެރި ފަރާތުން ޓީވީތަކަށް ދިނުމަކީ ދަށުދަރަޖައިގެ ޢަމަލެއް ކަމުގައި ދެކޭ ކަމަށާއި، ބްރޯޑްކާސްޓިން ކޮމިޝަންގެ މި ނޭއްގާނީ ޢަމަލުން އެ ކޮމިޝަނުގެ މުސްތަޤިއްލުކަން ގެއްލިފައިވާ މިންވަރު ހާމަވާ ކަމަށް އެމްޑީޕީގެ ބަޔާނުގައި ބުނެފައި ވެއެވެ.

އެމްޑީޕީން ބުނީ، ބްރޯޑްކާސްޓިން ކޮމިޝަނުން ރާއްޖެޓީވީ އަށް މާލީ ގޮތުން އަދަބުދީފައިވާ 3 ފަހަރު ވެސް އަދަބު ދީފައިވަނީ އެއްވެސް ރައްޔިތެއްގެ އަބުރާ ބެހުމުގެ ސަބަބުން ނޫން ކަމަށާއި އެއީ ހަމައެކަނި ސަރުކާރާއި ޢަބްދުﷲ ޔާމީނަށް ފާޑުކިޔާފައިވާ ކޮންޓެންޓް ބްރޯޑްކާސްޓް ކުރުމުންކަން ވެސް ރަނގަޅަށް އެނގޭ ކަމަށެވެ. އަދި ސަރުކާރަށާއި ދައުލަތުގެ ބޮޑުންނަށް ފާޑު ކިޔުމަކީ ޑިމޮކްރަޓިކް ޤައުމުތަކުގެ މައިގަނޑު އަސާސެއްކަމަށްވާއިރު އެގޮތަށް ފާޑުކިޔުމުން އަދަބުދެވެނީ ހަމައެކަނި ދުނިޔެއަށް މަޝްހޫރު ޚުދުމުހުތާރު ޤައުމުތަކުގައި އެކަނިކަމަށް އެމްޑީޕީނން ބުނެފައި ވެއެވެ. އެ ޕާޓީން ބުނީ، އެފަދަ ކަންކަމުގެ ސަބަބުން ރާއްޖެ ޓީވީ އާއި ސަރުކާރާ ވާދަވެރި ޚަބަރުތައް ގެނެސްދޭ ފަރާތްތައް ނެތިގޮސްދާނެ ކަމުގެ ބިރު މިހާރު މިވަނީ ދިވެހިރާއްޖެއަށް ކުރިމަތިވެފައި ކަމަށެވެ.

އެމްޑީޕީގެ ބަޔާނުގައި ވަނީ ރާއްޖެޓީވީ ފުރަތަމަ ފަހަރަށް ޖޫރިމަނާކޮށްފައި ވަނީ ދެ ލައްކަ ފަންސާސް ހާސް ރުފިޔާއިން ކަމާއި، ދެ ވަނަ ފަހަރަށް އެއް މިލިއަން ރުފިޔާއިން ޖޫރިމަނާކޮށްފައިވާކަން ފާހަގަކޮށްފަ އެވެ. އަދި ތިންވަނަ ފަހަރަށް ނުޙައްޤުން ފަސްލައްކަ ރުފިޔާ އަތުލުމަށް އަންގާފައި ވަނީ ރާއްޖެޓީވީ އަނދާ އަޅިޔަށް ހެދި ޖަރީމާ އަށް ހަތަރު އަހަރު ފުރި އިންސާފު ނުލިބުމުގެ ކަންބޮޑުވުން ފާހަގަ ކުރަމުން ގެންދިޔަ ދުވަހާ ދިމާކޮށްކަން އެމްޑީޕީން ފާހަގަކޮށްފައި ވެއެވެ. އެކަމުންވެސް އެނގެނީ ބްރޯޑްކާސްޓިން ކޮމިޝަނުން ރާއްޖެޓީވީއަށް ދެމުންގެންދާ މާލީ ބޮޑެތި އަދަބުތަކަކީ ނުޙައްޤު އަދަބުތަކެއް ކަމާއި، ބްރޯޑްކާސްޓިން ކޮމިޝަނުގައި ޢަބްދުﷲ ޔާމީންގެ ސިޔާސީ ޙަރަކާތްތަކުގައި ފާޅުގައި ބައިވެރިވާ އެކްޓިވިސްޓުން ލުމުގެ ބޭނުމަކީ ވެސް އެއީ ކަންކަމުގައި ދެކޭ ކަމަށް ބަޔާނުގައި ބުނެފައި ވެއެވެ.