ޓެކްސްގެ މަސައްކަތް ކުރަނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގައި ރަޖިސްޓްރީ ވެފައިވާ ޓެކްސް އޭޖެންޓުންކަން ކަށަވަރު ކުރުމަށް ވިޔަފާރިވެރިންނަށް މީރާއިން އިލްތިމާސް ކޮށްފިއެވެ.

މިރާއިން ނެރުނު ބަޔާނެއްގައި ބުނީ ޓެކްސް ދައްކާ ފަރާތްތަކުން ދައްކަން ޖެހޭ ޓެކްސްގެ އަދަދު ހަމަކުރުމާއި، ޓެކްސް ބަޔާން ތައްޔާރު ކޮށްދިނުމުގެ މަސައްކަތް ފަދަ، ޓެކްސް އޭޖެންޓުންގެ މަސައްކަތުގެ އިހްތިސާސްގައި ހިމެނޭ މަސައްކަތްތައް، މީރާއިން ހުއްދަ ދީފައިވާ ޓެކްސް އޭޖެންޓުން ނޫން އެހެން ބައެއް ފަރާތްތަކުން ކުރަމުންދާކަމަށް އެއޮތޯރިޓީއަށް ފާހަގަވެފައިވާ ކަމަށެވެ. އަދި އެފަދަ ފަރާތްތަކުން ތައްޔާރު ކުރާ ލިޔުންތަކާއި ބަޔާންތައް ތައްޔާރުކުރެވިފައި ހުންނަނީ ޓެކްސްއާއި ގުޅޭ އެކަށީގެންވާ ރަނގަޅު މައުލޫމާތު ނުލިބިކަން ފާހަގަކުރެވި، އެކަމުގެ ޝަކުވާ ލިބެމުންދާކަމަށް ވެސް މީރާގެ ބަޔާނުގައިވެއެވެ. އަދި އެހެން ކަމުން ފައިސާއާއި ގުޅޭ މުހިއްމު މަސައްކަތްތައް ހަވާލުކުރުމުގައި އެފަރާތަކީ މީރާގައި ރަޖިސްޓަރ ވެފައިވާ ޓެކްސް އޭޖެންޓެއްތޯ ކަށަވަރު ކުރުމަށް މީރާއިން އިލްތިމާސް ކުރެއެވެ.

މީރާގައި ރަޖިސްޓްރީވެފައިވާ ޓެކްސް އޭޖެންޓުންނާއި އޮޑިޓަރުންގެ ލިސްޓް މީރާގެ ވެބްސައިޓްގައި ހުންނާނެއެވެ.

ޓެކްސްއާއި ގުޅުން ހުރި މަސައްކަތް ކުރާ ފަރާތްތަކަކީ ރަޖިސްޓަރ ވެފައިވާ ފަރާތްތަކެއްތޯ ކަށަވަރު ކުރުމަށް މީރާއިން އިލްތިމާސްކޮށްފައިވާއިރު، ސެޕްޓެމްބަރު މަހާއި މިއަހަރުގެ ތިންވަނަ ކުއާރޓަރގެ ޖީއެސްޓީ ބަޔާންތައް ހުށަހެޅުމާއި ޖީއެސްޓީ ދެއްކުމުގެ ސުންގަޑިއަކީ މި އޮކްޓޯބަރު މަހުގެ 29ވަނަ ދުވަހެވެ. އަދި ގްރީން ޓެކްސްގެ ބަޔާނާއި ޓެކްސް ފައިސާ ދެއްކުމުގެ ސުންގަޑިއަކީ ވެސް މިމަހުގެ 29އެވެ.