ކެންދޫ ފަރަށް ލިބުނު ގެއްލުމުގެ މައުލޫމާތު އީޕީއޭއަށް އަދިވެސް އެއް ނުކުރެވޭ!

ބ. ކެންދޫ ފަރަށް ލޭންޑިން ކްރާފްޓެއް އަރުމުން ލިބުނު ގެއްލުމުގެ މައުލޫމާތު އެއްކުރަމުންދާ ކަމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) ބުނެފި އެވެ.

އީޕީއޭގެ ޑިރެކްޓަރ ޖެނެރަލް އިބްރާހިމް ނައީމު ހޯމަ ދުވަހު "ރާއްޖެއެމްވީ"އަށް ވިދާޅުވީ ސެޕްޓެމްބަރު 21 ވަނަ ދުވަހު ކެންދޫ ފަރަށް ލޭންޑިން ކްރާފްޓް އެރުމުން ލިބުނު ގެއްލުމުގެ މައުލޫމާތު އެއްކުރުމުގެ މަސައްކަތް އެ އެޖެންސީން ކުރަމުންދާ ކަމަށާއި ފަރަށް ލިބުނު ގެއްލުން އެނގޭނީ އެ މައުލޫމާތު އެއްކޮށް ނިމުމުން ކަމަށް ވެސް ނައީމު ވިދާޅުވި އެވެ. އެކަމާ ގުޅޭ އިތުރު ތަފްސީލެއް ނައީމް ހާމައެއް ނުކުރެއްވި އެވެ.

ފަރަށް އެރި ލޭންޑިން ކްރާފްޓް ކެންދުއަށް ދިޔައީ ބަނދަރު ހެދުމަށް އެރަށަށް ގެންގޮސްފައި ހުރި އެކްސްކަވޭޓަރު އަނބުރާ ގެންދިއުމަށެވެ.

ލޭންޑިން ކްރާފްޓް ފަރަށް އެރުމުން ފަރުގެ ގާތްގަނޑަކަށް 5،000 އަކަފޫޓް ވަރުގެ ސަރަހައްދެއް ހަލާކު ވެފައިވާ ކަމަށް އެރަށުގެ ކައުންސިލުން ބުނެ އެވެ. ލޭންޑިން ކްރާފްޓް ފުންކުރުމަށްޓަކައި އެކްސްކަވޭޓަރު ބޭނުން ކުރުމުން ވެސް ފަރަށް ބޮޑެތި ގެއްލުންތަކެއް ވަނީ ލިބިފަ އެވެ.

ފަރަށް އެރި ލޭންޑިން ކްރާފްޓް ފުންކުރަން އެކްސްކަވޭޓަރު ބޭނުންކުރަނީ

އެންވަޔަރަމެންޓަލް ޕްރޮޓެކްޝަން އެޖެންސީ އަކީ ރާއްޖޭގެ ތިމާވެރި ރައްކާތެރި ކުރުމާއި ތިމާވެއްޓާއި ގުޅުންހުރި ކަންކަމުގައި ލިބޭ ގެއްލުންތައް ބަލާ، އިހުމާލުވާ ފަރާތްތަކާއެމުދު ފިޔަވަޅު އެޅުމާއި ޖޫރިމަނާކުރުން ފަދަ ކަންކަން ކުރަމުންދާ ދައުލަތުގެ މުއައްސަސާ އެކެވެ.