ހއ. ދިއްދޫގައި ބެހެއްޓި "އަބުރުފުޅު ފަންޑު ފޮއްޓަށް" 17،406.60 ރުފިޔާ ލިބިއްޖެއެވެ.

ހއ.ދިއްދޫ ކައުންސިލްގެ ރައީސް އަލީ ހާޝިމް ވިދާޅުވީ ދިވެހި ރާއްޖޭގެ މިނިވަން މީޑިއާގެ ހިމާޔަތުގައި ދިއްދޫ ރައްޔިތުން އަބަދުވެސް ތިބޭނެ ކަމަށާއި ރާއްޖެޓީވިއަށް ބްރޯޑްކާސްޓިންގ ކޮމިޝަނުން އަޅަމުންދާ ފިޔަވަޅުތަކަކީ އިންސާފެއް ނެތް ފިޔަވަޅުތަކެއް ކަމަށެވެ. އަދި ދިއްދޫ ރައްޔިތުން އެކަން ބަލައި ނުގަންނާނެ ކަމަށް ހާޝިމް ފާހަގަކުރެއްވިއެވެ.

ހާޝިމް ވިދާޅުވީ ރާއްޖެޓީވީގެ ހުރިހާ ސްޓާފުންނަށާއި މެނޭޖްމަންޓަށް ދިއްދޫގެ ހުރިހާ ރައްޔިތުންގެ ނަމުގައި ޝުކުރު ދަންނަވާ ކަމަށާއި ރާއްޖެޓީވީގެ މުވައްޒަފުން ހިތްވަރާއި އަޒުމާއި އެކީ ދެމި ތިބުމަށް ހިތްވަރު ދެއްވާ ކަމަށެވެ.

އެމްޑީޕީ ދިއްދޫ ދާއިރާއިން ރާއްޖެޓީވީއަށް އެހީވުމަށް "އަބުރުފުޅު ފަންޑު ފޮށި" ބަހައްޓާފައިވަނީ ހޮނިހިރު ދުވަހުގެ މެންދުރުފަހު ދޭއް ޖެހިއިރު އެވެ. އެ ރަށުގައި ފަންޑު ފޮށި ބަހައްޓާފައިވަނީ 48 ގަނޑިއިރަށެވެ.

ހާޝިމް އިތުރަށް ވިދާޅުވީ ރާއްޖެޓީވީގެ އެކައުންޓަށް ފަންޑަށް ލިބުނު ފައިސާ ހޯމަ ދުވަހު ޖަމާކޮށްދެއްވާނެ ކަމަށެވެ.

ހާޝިމް ވަނީ "އަބުރުފުޅު ފަންޑު ފޮއްޓަށް" އެހީ ވެދެއްވި ހުރިހާ ރައްޔިތުންނަށް ޝުކުރު އަދާކުރައްވާފައެވެ.