މިހާރު އެމެރިކާގެ ނިއުޔޯކް ސިޓީއަށް ކުޅެމުން އަންނަ އިޓަލީގެ ތަޖުރިބާކާރު މިޑްފީލްޑަރ އަންދްރޭ ޕިރްލޯ އޭނާ މިހާރު ކުޅެމުންއަންނަ ކުލަބާއި އެކު ހަދާފައިވާ އެއްބަސްވުން ހަމަވުމުން ފުޓުބޯޅަ ކުޅުން ހުއްޓާލުމަށް ނިންމައިފިއެވެ.
އެމެރިކާގެ ނޫހަކަށް ދިން ބަސްދީގަތުމެއްގައި ވާހަކަދައްކަމުން ޕިރްލޯ ބުނީ މިއީ އޭނާ ފުޓްބޯޅަ ކުޅުން ހުއްޓާލަން ވީ އެންމެ ރަނގަޅު ވަގުތުކަމަށް ގަބޫލްކުރާ ކަމަށާއި އެގޮތުން މިފަހަރުގެ ސީޒަން ނިމުނާއި އެކު ކުޅުން ހުއްޓާލާނެ ކަމަށެވެ. އަދި ކުޅުން ހުއްޓާލުމަށްފަހު އެކަން ރަސްމީކޮށް އިއުލާން ކުރާނެކަމަށްވެސް ޕިރްލޯ ވަނީ ބުނެފައެވެ.
"އަހަރެން ގަބޫލް ކުރާގޮތުން މިއީ ކުޅުން ހުއްޓާލން ވީ ވަގުތު. މިހާރަކަށް އައިސް ޕިޒިކަލް މައްސަލަތައްވެސް ދަނީ ދިމާވަމުން. އެހެން ކަމުން ފަރިތަކުރުންތަކުގައިވެސް ބައިވެރި ވުމަށް އުނދަގޫތަކާއި ކުރިމަތިވޭ،" ޕިރްލޯ ބުންޏެވެ.
ޕިރްލޯ ބުނީ ކުޅުން ހުއްޓާލާ އުމުރު ޖެހިއްޖެ ކަމަށާއި ދެން އިތުރަށް ކުޅުމަކީ ކުޅުމަކީ ނުވާނެ ކަމެއް ކަމަށެވެ. އަދި ކުޅުން ހުއްޓާލުމަށްފަހު ފުޓްބޯޅައިގެ ދާއިރާއާ ގުޅުންހުރި ކޮންމެވެސް އެހެން ކަމެއް ކުރަން ވިސްނާ ކަމަށް ވެސް އޭނާ ބުންޏެވެ.
އޭސީ މިލާން، ޔުވެންޓަސް އަދި އިޓަލީގެ ގައުމީ ޓީމަށް ވެސް ކުޅެފައިވާ ޕިރްލޯ ވަނީ ދެ ފަހަރަށް އިޓަލީ ލީގު ކާމިޔާބުކޮށް ދެ ފަހަރަށް ޗެމްޕިއަންސް ލީގު ވެސް ކާމިޔާބުކޮށްފައެވެ. އޭގެ އިތުރުން އޭނާ ވަނީ އިޓަލީ ގައުމީޓީމާއި އެކު 2006 ވަނަ އަހަރުގެ ވޯލްޑްކަޕްވެސް ކާމިޔާބުކޮށްފައެވެ.
2017 ވަނަ އަހަރާއި އެކު ޕިރްލޯ ނިއުޔޯކް ސިޓީއާއެކު ހަދާފައިވާ އެއްބަސްވުން ހަމަވާއިރު، މިހާރު އުމުރުން 38 އަހަރުގެ ޕިރްލޯ ވަނީ މިސީޒަނުގައި މޭޖާ ލީގު ސޮކާގައި އެ ކްލަބަށް 15 މެޗު ކުޅެދީފައެވެ.
