މުއިއްޒުއާއި މުއިއްޒުގެ ވަށާޖެހުނު "އިހުތިރާމް"
19 ނޮވެމްބަރު 2026 | ބުރާސްފަތި 13:42ރައީސް މުއިއްޒު ވެރިކަމަށް ވަޑައިގަތުމަށް ދެއްކެވި ވާހަކަފުޅުތަކާއި އަމަލާ ދިމާނުވުމުގެ ސަބަބުން، އާންމުންގެ ފާޑުކިޔުން ސަރުކާރަށް ވަނީ އަމާޒުވެފައި. މަޖިލިސް މެޖޯރިޓީއާއި ވަޒީފާތަކުގެ ބޭނުން ހިފައިގެން ސިޔާސީ ބާރުވެރިކަން ހޯއްދެވި ނަމަވެސް، ރައްޔިތުންނަށް ވީ ވައުދުތަކަށް އިހުތިރާމް ނުކުރާތީ ގިނަ ބައެއްގެ އިތުބާރު ވަނީ ގެއްލިފައި. އެހެންކަމުން، މިއަދު ފެންނަމުންދަނީ ކުރިން ކުރި އިހުތިރާމުގެ ބަދަލުގައި ރައްޔިތުންގެ ނުރުހުން ސަރުކާރަށް ރައްދުވަމުންދާ މަންޒަރު


ހޮނިހިރު ދުވަހުގެ ރޭ އިހުތިރާމް އަދާކުރުމުގެ ގައުމީ މަޝްރޫއު ފެއްޓެވުމުގެ ގޮތުން މޮނިއުމަންޓެއްގެ މަތީގައި ރައީސް މުއިއްޒު ދިއްލޭ ބޯޅަ އެއް ބާއްވަނީ | ރައީސް އޮފީސް
އިޚްލާސްތެރި ހިތަކުން އިހުތިރާމާއެކު ބުނަމެވެ. އިހުތިރާމަކީ އިހުތިރާމެވެ. އިހުތިރާމް ކުރެވޭނީ އިހުތިރާމް ލިބިގެންނެވެ. އިހުތިރާމް އަދާކުރެވޭނީ ވެސް އޭގެ ހައްގުވެރިންނަށެވެ. އިހުތިރާމަކީ ބޮޑު އަގުދީފައި ގަނެގެން ހޯދޭ އެއްޗެއް ނޫނެވެ. އަދި ދަނޑިމާރު އަޅައިގެން ގަދަކަމުން ކުރުވޭ ވެސް އެއްޗެއް ނޫނެވެ. އިހުތިރާމަކީ ވަށާ ޖެހޭ އެއްޗެކެވެ. އަނބުރާ ހޭރިޔާކޮށް އަރާ ހަމަކުރާ ވެސް އެއްޗެކެވެ.
އެބީދައިން ޑރ. މުއިއްޒު ވެރިކަން ހޯއްދެވުމަށް ލައްކަ ވާހަކަ ދެއްކެވި އެވެ. ވަރަށް އިހުތިރާމާއެކު އެވެ. އޭރު ވެރިކަން ހިނގަމުންދިޔަ ގޮތަށް ފާޑު ވިދާޅުވެ އެވެ. ކަންކުރާގޮތް ކަމުނުގޮސްގެންނެވެ. ބައެއް ފަހަރަށް ސާބިތު ނުހިފޭ ވާހަކަތައް ވެސް ދެއްކެވީ އެވެ. ވެރިކަން ހޯދަން އޭރުގެ ވެރިންގެ އިހުތިރާމަށް ބެއްލެވުމެއްނެތި އެވެ.
ވެރިކަން ބަދަލުވެ މުއިއްޒަށް ބާރު ލިބުނެވެ. ރައްޔިތުން ވެރިކަން ދިނީ މުއިއްޒު ދެއްކެވި ވާހަކަތަކަށް ރިއާޔަތް ކޮށް ނުހަނު އިހުތިރާމާއެކުގަ އެވެ.
ވެރިކަން ކުރާން ފެށިގޮތުން މީހުން ފޫހިވާން ފެށި އެވެ. ކުރިން ދެއްކެވި ވާހަކަތައް މުޅިންހެން ބަދަލުވީތީ އެވެ. ކަނޑައެޅިގެން ރޯ ބުހުތާނު ދޮގު ހައްދަވަން ފެށްޓެވީމަ އެވެ. އެ ވާހަކަ އާއްމު ރައްޔިތުން އެ ދައްކާން ފެށީ އެހެން ވެގެންނެވެ. އެކަމަކު ނުހަނު އިހުތިރާމާއެކުގަ އެވެ. ކުރިން މުއިއްޒު ދެއްކެވި އިހުތިރާމްގެ އިމުގެ ތެރެއިންނެވެ.
މަޖިލިސް ހޯދަން ލައްކަ ކުޅިސަމާ ދެއްކި އެވެ. މެޖޯރިޓީ ނުލިބިއްޖިއްޔާ ސަރުކާރު ހިންގަން ދަތިވާނެކަމާއި ރައްޔިތުންނަށްޓަކައި ކޮށްދޭން ޖެހޭ ކަންކަން ނުވާނެ ކަމަށް ބުނެ އެވެ. މަޖިލީހަށް ޕީއެންސީން ނެރުނު ކެންޑިޑޭޓުންގެ އިހުތިރާމްގަ އެވެ. އެވާހަކަ ގަބޫލުކޮށްގެން އެ މެންބަރުން ނަގައި ސުޕަރ މެޖޯރިޓީއެއް ދިނީ އެވެ. މުއިއްޒަށް ކުރި އިހުތިރާމެއްގެ އިތުރުން ކެނޑިޑޭޓުންނަށް އިހުތިރާމް ކޮށްފަ އެވެ. އެކަމަކު މަޖިލިސް ލިބުނީމާ މުއިއްޒަށް އިހުތިރާމް ކުރަން އެ މެންބަރުން ކަންކުރާން ފެށީ މުއިއްޒު ވިދާޅުވާ ގޮތަށެވެ. ވޯޓު ދިން އާއްމު ރައްޔިތުންގެ އިހުތިރާމް ބޮލާލާ ޖައްސަވާފަ އެވެ. އެ މެންބަރުން ކަންކުރައްވާ ގޮތުގެ ވާހަކަ އެ ރައްޔިތުން އެ ދައްކަނީ އެ އިހުތިރާމްގެ ބަދަލުގަ އެވެ. އެވެރިން އޭރު ދެއްކެވި ވާހަކައަށް އިހުތިރާމްކޮށްފަ އެވެ.
ސަރުކާރާއި މަޖިލިސް ހޯދެންދެން ލައްކަ މީހުންނަށް ހޭހަން ކޮށްދިނެވެ. ވަޒީފާތައް ވެސް ބަހާ އުޅުނީ ކާފަގެ މަސްބެހުމަށެވެ. އެދެ ބާރު ހޯދުމަށް އެވެރިންނާއި އެވެރިންގެ އާއިލާތަކުގެ އިހުތިރާމާއި ތާއީދު ހޯދުމަށެވެ. އެވެރިންގެ ބާރު ކެނޑުނީމާ އެމީހުން ދޫކޮށްލީ ދެން ގާތައް ގެންނާން ޖެހޭ މީހުން ގެންނާށެވެ. އެމީހުންނަށް ވަޒީފާގެ އިހުތިރާމް ދައްކައިގެން ކުރިންތިބި މީހުންގެ ވަޒީފާތަކުން ވަކިކޮށްފަ އެވެ. އިހުތިރާމަކަށް އިހުތިރާމް ގުރުބާންކޮށްފަ އެވެ. ދޯކާ ލިބުނު މީހުން އެވާހަކަ މިހާރު އެދައްކަނީ އެހެހެންވެގެންނެވެ. އެކަމަކު ނުހަނު އިހުތިރާމާއެކުގަ އެވެ.
އިހުތިރާމްގެ މަޝްރޫއު ވިލަރެސް ކުރެއްވި ވަޒިރަކީ ނުހަނު އިހުތިރާމް ކުރެއްވި ބޭފުޅެކެވެ. މުއިއްޒު ވެރިކަމަށް ގެނައުމަށެވެ. ފަންނާއި ތަރިކައާ ބެހޭ ވުޒާރާގެ ވަޒީރު ހީނާ ވަލީދުގެ ދިޔަރެސް ނޫހުން ލައްކަ ރަނގަޅަށް އެ އިހުތިރާމް އަދާކުރި އެވެ. ބައެއް މީހުން މައިބަފައިންނާއި ދަރިން ގާތު ތިބެގެން އަޑުއަހާލަން ނުކެރޭވަރުގެ އިހުތިރާމްގެ ވާހަކަތަކެވެ. އިހުތިރާމާއެކު އެއްވެސް ހެއްކެތްނެތި ދެއްކި ވާހަކަތަކުންނެވެ. އެވެސް އިހުތިރާމެވެ. މުއިއްޒަށް ކުރާ އިހުތިރާމަކުން އަދާކުރި އެ އިހުތިރާމްގެ ބަދަލުގައި ހީނާ ވަލީދަށް އާއްމުން އެކިޔާ އެއްޗެއް އެ ކިޔަނީ އެ އިހުތިރާމްގެ އަލީގަ އެވެ. މުއިއްޒަށް ކުރި އިހުތިރާމުގައި އިހުތިރާމް އަދާކުރުމުގެ ގޮތުން މުއިއްޒު ދެއްވި ވަޒީފައިގައި ހުންނަވައިގެން ކަންކުރައްވާ ގޮތުންނެވެ. އެކަމަކު ނުހަނު އިހުތިރާމާއެކުގަ އެވެ.
ކެމްޕެއިންގައި އިހުތިރާމާއެކު އުޅުނު ޒުވާން ކުއްޖަކަށް ވެސް އޭގެ އިހުތިރާމްގެ ވަޒީފާއެއް ދީގެން ދުވަސްކޮޅަކު ރައީސް އޮފީހުގައި ވެސް ގެންގުޅުއްވި އެވެ. ވަރަށް އިހުތިރާމާއެކުގަ އެވެ. އެ ޒުވާން ކުއްޖާ ވެސް އުޅުނީ ނުހަނު އިހުތިރާމް އަދާކޮށްގެންނެވެ. އެކަމަކު އެ ދިމާވި ކަމަކާއެކު އެ މަންޖެ އެ ވަޒީފާއިން ވަކިކުރީ ވެސް އިހުތިރާމް އަދާކުރުމުގެ ގޮތުންނެވެ. އެކަމަކު އެ މަންޖެ ނުކުމެ އެ ދައްކާން ފެށި ވާހަކައެއް ވެސް ދައްކާން އެ ފެށީ އެ މަންޖެ ވެސް އަދާކުރި އިހުތިރާމްގެ ބަދަލުގައި ލިބުނު އިހުތިރާމުންނެވެ.
ކޮންމެއަކަސް ކުރިން ވެސް ބުނިހެން އިހުތިރާމަކީ އިހުތިރާމެވެ. އިހުތިރާމް ލިބޭ ގޮތަކުން މެނުވީ އިހުތިރާމަކީ ލިބޭނޭ އެއްޗެއް ނޫނެވެ. އަދި އިހުތިރާމް އަދާކުރާ ގޮތުން ނުވަތަ އިހުތިރާމް ދޭގޮތުން އިހުތިރާމް އަންނާނީ ވެސް ބަދަލު ވެގެންނެވެ. ދުނިޔެވީ އެހަމައިން މުއިއްޒު ވަށާލާފައި އެވަނީ ވެސް އެފަދަ އިހުތިރާމްތަކުންނެވެ. މަވާ ސަލާމެވެ.









