ހަގީގަތުގައި ރާއްޖޭގެ ހުރިހާ ކައުންސިލަރުން ސަސްޕެންޑް ކޮށްގެން ގެންގުޅޭތާ އަހަރެއް ވީ: ޔައުގޫބް
10 މާރިޗު 2026 | އަންގާރަ 05:17ސަރުކާރު ހިންގާ ޕާޓީގެ މެޖޯރިޓީ ނެތް ކައުންސިލްތަކުގެ ބާރުތައް ހަނިކޮށް، އެ ފަރާތްތަކަށް ފިއްތުންތައް ކުރިމަތިކުރަމުންދާ ކަމަށް ޔައުގޫބް ތުހުމަތުކުރެއްވި.
ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ. | ރާއްޖެ އެމްވީ
ހަގީގަތުގައި ރާއްޖޭގެ ހުރިހާ ކައުންސިލަރުން ސަސްޕެންޑް ކޮށްގެން ގެންގުޅޭތާ އަހަރެއް ވެފައިވާ ކަމަށް ދާންދޫ ދާއިރާގެ ކުރީގެ މެމްބަރު ޔައުގޫބް އަބްދުﷲ ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ޔައުގޫބް ވިދާޅުވީ ޤާނޫނަށް ބަދަލު ގެނެސްގެންނާއި އުސޫލުތަކަށް ބަދަލު ގެނެސްގެން ކައުންސިލްގެ ބާރު ނަގާލުމަކީ މި ސަރުކާރަށް އާއްމު ކަމަކަށް ވެފައިވާ ކަމަށެވެ. ކައުންސިލްތަކަށް ކުޑަ މިނުން މިސްކިތް ފޮޅާ ސާފުކުރަން ވެސް މީހަކު ހޯދުމުގެ ފުރުސަތު މިހާރު ނެތް ކަމަށް ފާހަގަކުރައްވާ ޔައުގޫބް ވަނީ އެކަމާއި މެދު ކަންބޮޑުވުން ފާޅުކުރައްވާފަ އެވެ.
"ޓެކްނިކަލީ މިހާރު އޮތީ ކައުންސިލް ސަސްޕެންޑްކޮށްފައި ޤާނޫނަށް ބަދަލު ގެނެސްގެން އެހެން ނަމެއްގައި. މި ސަރުކާރަކީ ނިޒާމަށް ނުފަރިތަ ނިޒާމް ނުދަންނަ ބައެއް. އެފަދަ ބަޔަކު ރައްޔިތުން ކުރިމައްޗަށް ކެންޑިޑޭޓޫން ނެރެނީ ކީއްކުރަންތޯ." އޭނާ ވިދާޅުވި އެވެ.
ޔައުގޫބް ވަނީ މި ސަރުކާރުން ޕޭޕަރ ވޯކް ބަދަލުކުރުން ނޫން ކަމެއް ނުކުރާ ކަމަށް ވެސް ވިދާޅުވެފަ އެވެ. ސަރުކާރަށް 3 އަހަރު ވާއިރު ވެސް ކުރެވުނު ކަމެއް ނެތް ކަމަށް ޔައުގޫބް ވަނީ ވިދާޅުވެފަ އެވެ. ރައީސް ޑރ.މުހައްމަދު މުއިއްޒު އާއި ޕީއެންސީ އިން ލާމަރުކަޒީ ނިޒާމްގެ ސިޔާސަތުތައް ބަލައި ނުގަންނަ ކަމަށާއި އެކަންކަން ސަރުކާރުގެ އަމަލުތަކުން ފެންނަ ކަމަށް ޔައުގޫބް ވިދާޅުވި އެވެ. ޕީއެންސީގެ މެޖޯރިޓީ ނެތް ކައުންސިލެއް ނަމަ އެ ކައުންސިލެއްގެ ބާރުތައް ނަގާ، އެ ކައުންސިލްތަކަށް ފިއްތުންތައް ކުރިމަތިކުރުވަމުންދާ ކަމަށް ވެސް އޭނާ ވަނީ ވިދާޅުވެފަ އެވެ.
މި ސަރުކާރު އުފެދުމާއި އެކު ޑިމޮކްރަސީ ރާއްޖެ އަށް އައުމުގެ ކުރިން އޮތް އެޓޯލްސް މިނިސްޓްރީ ވެސް ވުޖޫދަށް ގެނައި ކަަަމަށް އޭނާ ވިދާޅުވި އެވެ. އެކަމުގެ ބޭނުމަކީ ކައުންސިލްތަކުގެ ބާރުތައް ހަނިކޮށް މައި ސަރުކާރުގެ ބާރު އިތުރުކުރުން ކަމަށް ޔައުގޫބް ވަނީ ވިދާޅުވެފަ އެވެ.
