އިހުތިރާމް އަދާކުރުމުގެ މަޝްރޫއުގެ ލޯގޯ ހޮވުމަށް ޕީއެސްއެމް އެއަރ މެދުވެރިކޮށް ބޮޑު ހޭދައެއް ކުރުވި ފަހުން، ވަނަ ނުހޮވަން ނިންމުމުން ބައިވެރިއެއްގެ ކަންބޮޑުވުން!
15 ނޮވެމްބަރު 2026 | އާދީއްތަ 12:02އިހުތިރާމް އަދާކުރުމުގެ ގައުމީ މަޝްރޫއުގެ ލޯގޯ ހޮވުމަށް ޕީއެސްއެމް އެއަރ މެދުވެރިކޮށް ބޮޑު ހޭދައެއް ކުރުވި ފަހުން، އާންމުންގެ ތަރުހީބު ނެތް ކަމަށް ބުނެ ވަނަ ނުހޮވަން ނިންމުމުން ބައިވެރިން ކަންބޮޑުވުން ފާޅުކޮށްފި. މި މުބާރާތުގެ ބައިވެރިންނަށް އެންގުމެއް ނެތި ވަނަ ނުހޮވަން ނިންމައި، މަޝްރޫއު އިފްތިތާހު ކުރިއިރު ބޭނުންކޮށްފައިވަނީ މުޅިން އައު ލޯގޯއެއް. އެހެންކަމުން، މިއީ އާންމުންގެ އަތުން ފައިސާ ހޯދުމަށް ހިންގި ސްކޭމެއްގެ ގޮތުގައި ބައެއް ފަރާތްތަކުން ތުހުމަތުކުރޭ
އެތައް ހާސް ރުފިޔާއެއް ހަރަދުކޮށްފައި ވަނިކޮށް، އިހުތިރާމު މަޝްރޫއަށް ލޯގޯ ފަރުމާކުރުމުގެ މުބާރަތުގައި ވަނަ ނުހޮވަން ނިންމުމާއި ގުޅިގެން ބައިވެރިއެއްގެ ކަންބޮޑުވުން! | ރާއްޖެ އެމްވީ
އިހުތިރާމް އަދާކުރުމުގެ ގައުމީ މަޝްރޫއުގެ ލޯގޯ ފަރުމާކުރުމުގެ މުބާރަތުގައި ވަނަ ނުހޮވަން ނިންމުމާއި ގުޅިގެން އެ މުބާރަތުގައި ބައިވެރިވި މީހަކު ކަންބޮޑުވުން ފާޅުކޮށްފި އެވެ.
ރައީސް ޑރ. މުހައްމަދު މުއިއްޒު އިއުލާންކުރެއްވި އިހުތިރާމް އަދާކުރުމުގެ މަޝްރޫއަށް ލޯގޯ ފަރުމާކުރުމުގެ ފުރުސަތު ހުޅުވާލާފައި ވަނީ ސެޕްޓެމްބަރު މަހުގެ 14 ވަނަ ދުވަހު އެވެ. އެގޮތުން އެ މަޝްރޫއަށް އެންމެ މޮޅު ލޯގޯއެއް ފަރުމާކުރާ ފަރާތަކަށް 60،000 ރުފިޔާގެ އިނާމެއް ދިނުމަށް ވެސް ހެރިޓޭޖް މިނިސްޓްރީން ވަނީ ނިންމާފަ އެވެ.
މި މަޝްރޫއަށް 22 ފަރާތަކުން ވަނީ ލޯގޯ ހުށަހަޅާފަ އެވެ. އަދި ފަނޑިޔާރުންގެ އިވެލުއޭޝަނަށް ފަހު ޝޯޓްލިސްޓް ކުރި 10 ލޯގޯއަށް ވޯޓު ދިނުމުގެ ފުރުސަތު ޕީއެސްއެމް އެއަރ އެޕްލިކޭޝަން މެދުވެރިކޮށް އޮކްޓޫބަރު މަހުގެ 16އިން 29އަށް ހުޅުވާލާފައިވެ އެވެ.
ހަމައެއާއެކު، ފަނޑިޔާރުންގެ މާކްސާއި އާންމުންގެ ވޯޓުން އެންމެ ކުރި ހޯދި ފަސް ލޯގޯއެއް ޝޯޓްލިސްޓްކޮށް، އަނެއްކާ ވެސް އެ ފަސް ލޯގޯއަށް ޕީއެސްއެމް އެއަރ މެދުވެރިކޮށް ވޯޓުލުމުގެ ފުރުސަތު ހުޅުވާލާފައިވެ އެވެ.
އިހުތިރާމް އަދާކުރުމުގެ މަޝްރޫއަށް ލޯގޯ ހުށަހެޅި ފަރާތެއް ކަމަށްވާ އަލީ އަހުމަދު ރާއްޖެޓީވީގެ "ފަށާއިރު" ޕްރޮގްރާމަށް ދިން އިންޓަވިއުއެއްގައި ވަނީ އެއްވަނަ ހޮވަން އޮތް ދުވަހު ރައްޔިތުންގެ މާބޮޑު ތަރުހީބެއް ނެތް ކަމަށް ބުނެ ލޯގޯ ބޭނުން ނުކުރާނެ ކަމަށް ނޫހެއްގައި ޖަހާފައި އޮއްވާ ފެނުނު ކަމަށް ބުނެފަަ އެވެ.
އޭތި ދިޔައީ ގަދަ 5 ކާއި ހަމައަށް، ގަދަ 10ން ގަދަ 5ށް ގޮސްފައި ގަދަ 5ން އޭތި ހޮވަން ވީ ދުވަހުގައި އޭތި މި ބަދަލުކޮށްލަނީ އެއްވެސް ކަހަލަ ތަރުހީބެއް ނެތޭ ކިޔާފައި. ގަދަ 10ށް ދިޔާމަ ދެން އޮތީ ޖަޖުންގެ 50 ޕަސަންޓާއި ވޯޓުގެ 50 ޕަސަންޓާއި، ވޯޓު ކުރަން ޖެހެނީ ޕީއެސްއެމް އެއަރ މެދުވެރިކޮށް، ކޮންމެ ވޯޓަކީ 3 ރުފިޔާގެ ގޮތުގައި. ގާތްގަނޑަކަށް އަޅުގަނޑަށް ކުރެވުނު 25،000ށް ރުފިޔާގެ ވޯޓު ގަދަ 5 ގައިއަލީ އަހުމަދު
އޭނާ މައުލޫމާތު ދިން ގޮތުގައި ގަދަ 5 ގެ އިތުރުން ގަދަ 10 ގައި ވެސް ވޯޓުލުމަށް ގިނަ އަދަދަކަށް ފައިސާ ހަރަދުކުރި އެވެ. މީގެ އިތުރުން، ވަނަ ނުހޮވަން ނިންމިކަން ބައިވެރިންނަށް ނާންގާ ކަމަށް އޭނާ ބުންޏެވެ.
އެވެސް އަޅުގަނޑުމެންނަކަށް ނާންގާ މެސެޖެއްހާ މިންވަރު ވެސް އަޅުގަނޑުމެންނަކަށް ކޮށްނުލާ، މިހެން މިހެން އެބަ ހަދަމޭ ނޫނީ، މިހެން މިހެން އެބަ ވަމޭ. ދެން ކުއްލިއަކަށް އަޅުގަނޑުމެންނަށް ފެންނަނީ އޮންލައިން ނޫހެއްގައި ޖަހާލާފައި މި އިންނަނީ މިހެން މިހެން ހަދާ ނިންމާލާފީމޭ މިކަންތައްއަލީ އަހުމަދު
އެސްއެމްއެސް ކުރުމަށް ހަރަދުކުރި ފައިސާ ވެސް ލިބިފައި ނުވާ ކަމަށާއި، ލޯގޯ ހެދި ކުދިންގެ އަގު ވަޒަން ކުރާނެ ކަމަށް ހެރިޓޭޖް މިނިސްޓްރީން ބުނި ނަމަވެސް އިހުތިރާމް އަދާކުރުމުގެ މަޝްރޫއު އިފްތިތާހު ކުރި ޖަލްސާއަށް ދައުވަތު ވެސް ނުދޭ ކަމަށް އޭނާ މައުލޫމާތު ދިނެވެ.
މީގެ އިތުރުން، އޭނާ ވަނީ މިކަމަކީ ސްކޭމެއް ގޮތުގައި ސިފަކޮށްފަ އެވެ. އެގޮތުން، ވޯޓުލުމަށް ގިނަ އަދަދަކަށް ފައިސާ ހަރަދުކޮށްފައި ވަނިކޮށް ވަނަ ނުހޮވަން ނިންމުމާއި ގުޅިގެން އާންމު ރައްޔިތުން ވެސް އަންނަނީ ކަންބޮޑުވުން ފާޅުކުރަމުންނެވެ. އަދި މިކަމަކީ ސަރުކާރުން ފައިސާ ހޯދަން ކުރި ކަމެއްގެ ގޮތުގައި ވެސް ބައެއް ފަރާތްތަކުން ސިފަ ކުރެ އެވެ.
އިހުތިރާމް އަދާކުރުމުގެ ޤައުމީ މަޝްރޫއުގެ ލޯގޯ ފަރުމާކުރުމަށް ހުޅުވާލި ފުރުސަތުގައި ލިބުނު ލޯގޯތަކަށް އާންމުންގެ ފަރާތުން އެކަށީގެންވާ ތަރުހީބެއް ނުލިބުމުގެ ސަބަބުން، އެއްވެސް ލޯގޯއެއް ބޭނުން ނުކުރުމަށް ހެރިޓޭޖް މިނިސްޓްރީން ނޮވެންބަރު މަހުގެ 12 ވަނަ ދުވަހު ނިންމާފައިވީ ނަމަވެސް މި މަޝްރޫއު އިފްތިތާހު ކުރުމަށް ހޮނިހިރު ދުވަހުގެ ރޭ ބޭއްވި ޖަލްސާގައި ވަނީ އައު ލޯގޯއެއް އިފްތިތާހުކޮށްފަ އެވެ.
