އިހްތިރާމަކީ މަޖުބޫރުކޮށްގެން ދަސްކޮށްދެވޭނެ އެއްޗެއްތަ؟

އިހްތިރާމަކީ އަނެކާގެ ކިބައިން ގަދަކަމުން ނުވަތަ ބާރުގެ ބޭނުންކޮށްގެން ހޯދޭނެ އެއްޗެއް ނޫނެވެ. އެއީ ދެފަރާތުން ވެވޭ އިހުސާސެކެވެ. ލޯތްބާއި ކުލުނާއެކު އެކަކު އަނެކަކަށް އިހްތިރާމްކޮށްގެން މެނުވީ އަނެކާގެ ހިތުން އެ ގަދަރެއް ނުލިބޭނެ އެވެ. ނަމަވެސް މިއަދު ފެންނަމުން މިދަނީ ދިވެހިރާއްޖޭގައި އިހްތިރާމް ކުރުމުގެ ސިފަ އާލާކުރުމުގެ ނަމުގައި، ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުންނަށް މަޖުބޫރުކޮށްގެން އެކަން ކުރުވަން އުޅޭ މަންޒަރެވެ.

ދިވެހީންނަކީ ޒަމާނުއްސުރެ ވެސް އިހްތިރާމް ކުރުމަކީ ކޮބައިކަން ދަންނަ، އަދަބު އަޚްލާގާށް ލޯބިކުރާ ބަޔެކެވެ. މުޖުތަމައުގެ ރީތި އާދަކާދަތަކާއި އެކަކު އަނެކަކަށް އިހްތިރާމް ކުރުމުގެ އަސާސްތައް ދިވެހި ދަރިންނަށް ދަސްވަމުން އަންނަނީ ކުޑައިރުއްސުރެ ގޭތެރެއިންނާއި ސްކޫލުތަކުގެ ތައުލީމީ ނިޒާމުގެ ތެރެއިންނެވެ. މިއީ މިއަދު އަލުން ބަޔަކު ދަސްކޮށްދޭން ޖެހިފައި އޮތް ބީރައްޓެހި ކަމެއް ނޫނެވެ.

ނަމަވެސް، ސަރުކާރުގެ ބައެއް ބޭފުޅުން ސިޔާސީ ބޭނުމަށް ދައްކަވާ ވާހަކަތަކުން، މި ގައުމުގެ ސްކޫލުތަކުންނާއި ލޯބިވާ ބެލެނިވެރިން އެ ދަރިންނަށް ރިވެތި އަދަބުތައް ދަސްނުކޮށްދޭ ފަދަ ނުރަނގަޅު އިހްސާސެއް މުޖުތަމައުގައި ދަނީ އުފެދެމުންނޭ ބުންޏަސް ދޮގަކަށް ނުވާނެ އެވެ. މިއީ މުޅި މުޖުތަމައުގެ ތަރުބިއްޔަތާމެދު ސުވާލު އުފައްދައި، ބެލެނިވެރިންނާއި ޓީޗަރުންގެ މަސައްކަތުގެ އަގު ވައްޓާލުން ފަދަ ކަމެއްނުންތޯ އެވެ. 

ރައީސް ޑރ. މުހައްމަދު މުއިއްޒުގެ ސަރުކާރުން މިވަނީ 'އިހްތިރާމް އަދާކުރުމުގެ ގައުމީ މަޝްރޫއު' ގެ ނަމުގައި މުޅި ރާއްޖެއަށް އަމާޒުކޮށްގެން ބޮޑު ކެމްޕޭނެއް ފަށާފަ އެވެ. ސަރުކާރުން ބުނާ ގޮތުގައި މިއީ މުޖުތަމައުގައި އެކަކު އަނެކަކަށް އިހްތިރާމް ކުރުމުގެ ސިފަ އަލުން ދިރުވުމަށް ފެށި މަސައްކަތެކެވެ. މި މަޝްރޫއުގެ ދަށުން ކުންފުނިތަކާއި އޮފީސްތަކުގައި ސިލްސިލާ ވޯކްޝޮޕްތަކާއި އެކި ޕްރޮގްރާމްތައް ދަނީ ހިންގަމުންނެވެ. އަދި މިކަމަށް ދައުލަތުގެ ބަޖެޓުން ބޮޑެތި ޚަރަދުތަކެއް ކުރަމުންދާ ކަމެކެވެ. 

ނަމަވެސް އެންމެ ބޮޑު ކަންބޮޑުވުމަކީ، މި ހަރަކާތްތަކުގައި ބައިވެރިވުމަށް މުވައްޒަފުންނަށް ގަދަކަމާއި މަޖުބޫރުކަން ކުރިމަތިކުރުވާ ކަމުގެ ޝަކުވާ އެވެ. ހިތްހަމަނުޖެހުމާއި ގަދަބާރުގެ ތެރެއިން އުފަންވާނީ އިހްތިރާމެއް ނޫނެއްނުންތޯ އެވެ. އޭގެ ބަދަލުގައި އުފެދޭނީ ފޫހިކަމާއި ނަފްރަތެވެ. މިއީ އިންސާނީ ތަބީއަތް ދަންނަ ކޮންމެ މީހަކަށް ވެސް އެނގޭނެ ސާދާ ހަގީގަތެއްނުންތޯ އެވެ.

އެހެންކަމުން، މި މަޝްރޫއުގެ ހަގީގީ މަގުސަދާމެދު މިއަދު އާންމުންގެ މެދުގައި ވަނީ ސުވާލު އުފެދިފަ އެވެ.

މަޖުބޫރުކޮށްގެން މީހެއްގެ ހިތުގައި އިހްތިރާމް އުފެއްދިދާނެތޯ އެވެ؟ ކަންދެއްކުމުގެ ވޯކްޝޮޕްތަކަކުން ރައްޔިތުންގެ ހިތްތައް ފަތަހަ ކުރެވޭ މަންޒަރެއް މިހާތަނަށް ފެނިފައިނުވެ އެވެ. މިހާރު ވެސް ސޯޝަލް މީޑިއާގެ އެކި މަންސަތަކުގައި މި މައްސަލައާ ގުޅިގެން ސަރުކާރަށް ފާޑު ކިޔާފައިވާ ގިނަ ޕޯސްޓުތައް ހުރީ ފެންނަން ހުރިއިރު، މިއީ ރައްޔިތުންގެ ޓެކްސް ފައިސާއިން ބޮޑެތި ޚަރަދުތަކެއް ކޮށްގެން، ވެރިކަމުގެ ބާރު ދައްކަން ހިންގާ ސިޔާސީ ކެމްޕޭނެއް ކަމަށް ބުނެ ގިނަ ބަޔަކު ދަނީ ސުވާލު އުފައްދަމުންނެވެ.