ހައުސިންގ މިނިސްޓަރު އަބްދުﷲގެ ކަޅު ދަބަހުގެ "ހަޔާތުނާމާ"!
16 ނޮވެމްބަރު 2026 | ހޯމަ 08:55އާރަށުގައި ފުޓުބޯޅަ ކުޅުއްވުމަށްފަހު ހައުސިންގ މިނިސްޓަރު ޑރ. އަބްދުﷲ މުއްތަލިބު މަޖިލީހަށް ވަޑައިގަތްއިރު ގެންގުޅުއްވި ކަޅު ދަބަހާ ގުޅޭގޮތުން އާންމުންގެ މެދުގައި ބޮޑު ބަހުސެއް އުފެދިއްޖެ. މިކަމާ ގުޅިގެން މިނިސްޓަރު ނެރުއްވި ބަޔާނުގައި އެ ދަބަހުގައި ހުރީ ފުޓުބޯޅަ ކުޅޭ ސާމާނު ކަމަށާއި، މަޖިލީހުގެ ސަލާމަތީ ކަންކަން ފުރިހަމަވެފައިވާކަން ވަނީ ހާމަކުރައްވާފައި. އެހެންނަމަވެސް، ނޫސްވެރިންގެ ސުވާލުތަކަށް ވަގުތުން ޖަވާބު ނުދެއްވައި ފަހުން ތަފްސީލީ ބަޔާނެއް ނެރުއްވުމުން ގިނަ ބައެއްގެ ފާޑުކިޔުން ވަނީ އަމާޒުވެފައި


ހައުސިންގ މިނިސްޓަރު އަބްދުﷲގެ ކަޅު ދަބަހުގެ "ހަޔާތުނާމާ"! | ރާއްޖެ އެމްވީ
ދިވެހިރާއްޖޭގެ ކުޅިވަރުގެ ތާރީޚުގައި ފާހަގަކޮށްލެވޭ ފަދަ އާދަޔާޚިލާފު ކަމެއްގެ ގޮތުގައި، ރާއްޖޭގެ ބައެއް ތަރައްގީގެ މަޝްރޫއުތަކަށް ވުރެ ކުރިން ކުޅިވަރު ބޫޓު ޖޯޑެއް ރައްޔިތުންގެ މަޖިލީހަށް "ހާޒިރުވި" ޚަބަރުތައް ދަނީ ނޫސްތަކުގެ ފަލަސުރުހީން ޖާގަ ހޯދަމުންނެވެ.
އާދިއްތަ ދުވަހުގެ ރޭގެ ވަގުތެއްގައި މި ބޫޓު ޖޯޑު މަޖިލީހަށް ގެންގޮސްފައިވަނީ ހައުސިންގ މިނިސްޓަރު ޑރ. އަބްދުﷲ މުއްތަލިބު އެވެ. އިއްތިފާޤަކުން ބޮޑު ކަޅު ދަބަހަކަށް ލާފައިވާ މި ބޫޓު ޖޯޑު މަޖިލީހަށް ގެންގޮސްފައިވަނީ، ރަސްމާލެ މަޝްރޫއާ ގުޅޭގޮތުން ހޯމަ ދުވަހު ބޭއްވުމަށް ހަމަޖެހިފައިވާ މަޖިލީހުގެ ޖަލްސާއަށް ވެސް ކުޑަތަންވެފައި ވަނިކޮށެވެ.
ވިލިމާލެ ދާއިރާގެ މެންބަރު މުހައްމަދު އިސްމާއީލް ފަހުން ވަނީ މި ބޫޓު ޖޯޑު ދަތުރުކުރި ގޮތުގެ ކުރު ޚުލާސާއެއް ދެއްވާފަ އެވެ. އެނގިފައިވާ ގޮތުގައި، ރޭގަނޑުގެ ވަގުތު ރިޔާސީ ރަށް، އާރަށުގައި ހޭދަކުރުމަށްފަހު، މި ބޫޓު ޖޯޑު ސީދާ ދިޔައީ މަޖިލީހުގައި އޮތް ބައްދަލުވުމަކަށެވެ.
މިނިސްޓަރު މުއްތަލިބު މަޖިލީހަށް ހާޒިރުވެވަޑައިގަތީ ރަސްމީ ގަމީހާއި ޖީންސްގަ އެވެ. އެހެންކަމުން މިނިސްޓަރު ކުޅިވަރުގެ މައިދާނުން މަޖިލީހުގެ މަސައްކަތަށް ސީދާ ވަޑައިގަތީ ކަމަށް ބެލެވެ އެވެ.
މަޖިލީހަށް ޒިޔާރަތްކުރި މި ބޫޓާ ގުޅޭ އިތުރު މައުލޫމާތު ހޯދުމަށް ނޫސްވެރިން މަސައްކަތް ކުރި ނަމަވެސް، މިކަމާ ގުޅޭގޮތުން މިނިސްޓަރުގެ ފަރާތުން ވެސް އަދި ބޫޓުގެ ފަރާތުން ވެސް އޭރު އެއްވެސް ބަހެއް ލިބޭގޮތް ވަނީ ނުވެފަ އެވެ.
އާރަށުގައި ކުޅުނީ ކޮން ކުޅިވަރެއްކަން ސާފުނުވި ނަމަވެސް، ހޯމަ ދުވަހުގެ އެޖެންޑާގައި ރަސްމާލެ މަޝްރޫއުގެ މައްސަލަ އޮތްއިރު، މިފަދަ "މެރަތަން" އަކަށް ކޮންމެ ވެސް ބަޔަކު ތައްޔާރުވެގެން ތިބިކަން އެނގުމަކީ ހިތްހަމަޖެހުމެއް ލިބޭ ކަމެކެވެ.
ކޮންމެއަކަސް، ހައުސިންގ މިނިސްޓަރު އަބްދުﷲގެ ކަޅު ދަބަހުގެ "ހަޔާތުނާމާ" އާ ގުޅޭގޮތުން ދިވެހިން މި ޒުވާބެއްގައި ތިއްބައި، އެންމެ ފަހުން ވަޒީރު މިވަނީ ބަޔާނެއް ނެރުއްވައި އެ ކަޅު ދަބަހުގެ ހަގީގަތް ހާމަކޮށްދެއްވަން މަސައްކަތް ކުރައްވާފަ އެވެ.
އާންމުންގެ މެދުގައި އުފެދުނު ބޮޑު ސުވާލުތަކަކަށްފަހު، މިނިސްޓަރު މިހާރު ކަށަވަރުކޮށްދެއްވާފައިވާ ގޮތުގައި، ރިއަލް އެސްޓޭޓް ވިޔަފާރީގެ ބިލާ ގުޅޭގޮތުން މައުލޫމާތު ދެއްވުމަށް ސީދާ މަޖިލީހަށް ވަޑައިގަތީ އާރަށުގައި ފުޓުބޯޅަ ކުޅުއްވުމަށް ފަހުގަ އެވެ.
އަދި އެ ދަބަހުގައި ހުރީ މިނިސްޓަރު ފުޓުބޯޅަ ކުޅުއްވުމަށް ބޭނުންކުރެއްވި ކުޅިވަރު ސާމާނު ކަމަށް މިނިސްޓަރު ވިދާޅުވި އެވެ.
ފާހަގަކޮށްލެވޭ ކަމަކީ، މަޖިލީހަށް ވަޑައިގެންނެވި މަގުމަތީގައި މިނިސްޓަރާ ބައްދަލުވި ގިނަ ނޫސްވެރިން، މި މައުލޫމާތު ހިއްސާކުރުމަށް ތަކުރާރުކޮށް ސުވާލު ކުރަމުން ދިޔަކަމެވެ. އެ ދަބަހުގައި ހުރީ ފުޓުބޯޅަ ކުޅޭ ސާމާނޭ ވިދާޅުވެ، 5 ސިކުންތު ތެރޭގައި ޖަވާބުދެއްވާ ނިންމާލެވެން އޭރު ވެސް އޮތްކަމެވެ.
މިނިސްޓަރު ފަހުން ނެރުއްވި ބަޔާނުގައި، މަޖިލީހުގެ ސަލާމަތާބެހޭ ކަންކަން ހުންނަ ގޮތް ކަމަށްވާ ސަވައިލަންސް ކެމެރާތަކާއި، ދަބަސް ސްކޭން ކުރާ މެޝިންތަކާއި، ބޮޑީ ސްކޭނަރުތަކުގެ އިތުރުން އައިޑީ ކާޑު ޗެކްކުރުމުގެ އުސޫލުތަކުގެ ފުރިހަމަ ތަފްސީލެއް ވަނީ ދެއްވާފަ އެވެ.
މީގެ އިތުރުން، އެ ދަބަސް މަޖިލީހަށް ވެއްދީ މިނިސްޓަރާއެކު ކަމަށާއި، އަދި މަޖިލީހުން ނުކުމެގެން ދިޔައީ ވެސް މިނިސްޓަރާއެކު ކަމަށް ވަނީ ޔަޤީންކޮށްދީފަ އެވެ.
ފަހަރުގައި މިނިސްޓަރުގެ ފުޓުބޯޅަ ސެޝަން އަޅުގަނޑުމެން ހީކުރި ވަރަށްވުރެ ބޮޑަށް މިނިސްޓަރު ވަރުބަލިކޮށްލެއްވީކަމަށް ވެދާނެ އެވެ. އެހެންޔާ، ފަސް ސިކުންތުގެ ތެރޭގައި ދެވިދާނެ ޖަވާބެއް، މިހާރު މިވަނީ ރައްޔިތުންގެ މަޖިލީހުގެ ސަލާމަތީ ކަންކަން ހުންނަ ގޮތުގެ ތަފްސީލީ ބޮޑު ބަޔާނަކަށް ބަދަލުވެފައި ވިއްޔާ އެވެ.









