މިނިސްޓަރު އަބްދުﷲ ގެންގުޅުއްވި ދަބަހަކީ އާރަށަށް ކުޅެން ގެންދިޔަ ބޫޓު ލާފައި އޮތް ދަބަސް: މުހައްމަދު އިސްމާއީލް
16 ނޮވެމްބަރު 2026 | ހޯމަ 05:52ހައުސިންގ މިނިސްޓަރު ޑރ. އަބްދުﷲ މުއްތަލިބު ބޮޑު ކަޅު ދަބަހެއް ހިއްޕަވައިގެން ރައްޔިތުންގެ މަޖިލީހަށް ވަޑައިގަތުމާ ގުޅިގެން ގިނަ ބައެއްގެ ފާޑުކިޔުމާއި ތުހުމަތުތައް އަމާޒުވެއްޖެ. މިކަމާ ގުޅޭގޮތުން ނޫސްވެރިން ސުވާލުކުރުމުން މިނިސްޓަރު ޖަވާބެއް ނުދެއްވި ނަމަވެސް، އެއީ ކުޅިވަރު ކުޅެން ގެންގުޅުއްވި ބޫޓު ދަބަހެއް ކަމަށް ވިލިމާލޭ ދާއިރާގެ މެންބަރު މުހައްމަދު އިސްމާއީލް ވަނީ ވިދާޅުވެފައި

ވިލިމާލޭ ދާއިރާގެ މެންބަރު މުހައްމަދު އިސްމާއީލް | ރާއްޖެ ޓީވީ
ހައުސިންގ މިނިސްޓަރު އަބްދުﷲ މުއްތަލިބް ގެންގުޅުއްވި ދަބަހަކީ އާރަށަށް ކުޅެން ގެންދިޔަ ބޫޓު ލާފައި އޮތް ދަބަސްކަމަށް ވިލިމާލޭ ދާއިރާގެ މެންބަރު މުހައްމަދު އިސްމާއީލް ވިދާޅުވެއްޖެ އެވެ.
ރަސްމާލެ ވިއްކާލުމުގެ ބިލު ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް އެޖެންޑާކޮށްފައި ވަނިކޮށް، ހައުސިން މިނިސްޓަރު އަބްދުﷲ މުއްތަލިބު އާދިއްތަ ދުވަހުގެ ރޭ ބޮޑު ކަޅު ދަބަހެއް ހިއްޕަވައިގެން މަޖިލީހަށް ވަޑައިގެންފައިވާތީ ގިނަ ބަޔަކު ދަނީ ސުވާލު އުފައްދަމުންނެވެ.
މިނިސްޓަރު ދަބަސް ހިއްޕަވައިގެން މަޖިލީހަށް ވަޑައިގަތުމާ ގުޅޭގޮތުން ވާހަކަ ދައްކަވަމުން ވިލިމާލޭ ދާއިރާގެ މެންބަރު މުހައްމަދު އިސްމާއީލް ވިދާޅުވީ، މިނިސްޓަރު އަބްދުﷲ ގެންގުޅުއްވި ދަބަހަކީ އާރަށަށް ކުޅެން ގެންދިޔަ ބޫޓު ލާފައި އޮތް ދަބަސް ކަމަށެވެ. އާރަށުން ވަޑައިގެންނެވި ގޮތަށް މިނިސްޓަރު ވަޑައިގެންނެވީ މަޖިލީހުގައި އޮތް ބައްދަލުވުމަކަށް ކަމަށް މެންބަރު އިސްމާއީލް ވިދާޅުވި އެވެ.
މެންބަރު އެހެން ވިދާޅުވިނަމަވެސް ވީޑިއޯތަކުން ފެންނަ ގޮތުގައި މިނިސްޓަރު ތުރުކުރައްވައިގެން ހުންނެވީ ކުޅެންދާ ޒާތުގެ ހެދުމެއް ނޫނެވެ. އެގޮތުން މިނިސްޓަރު އެވަގުތު ހުންނެވީ ގަމީހާއި ޖީންސެއް ތުރު ކުރައްވައިގެންނެވެ.
މީގެ އިތުރުން، ދަބަހުގައި ހުރި އެއްޗަކާ ގުޅޭގޮތުން އެވަގުތު އެތަނުގައި ތިބި ނޫސްވެރިން ތަކުރާރުކޮށް ސުވާލުކުރުމުން ވެސް އެއްވެސް ސުވާލަކަށް މުއްތަލިބު ޖަވާބެއް ދެއްވާފައެއް ނުވެ އެވެ.
ހައުސިން މިނިސްޓަރު އަބްދުﷲ މުއްތަލިބު އާދިއްތަ ދުވަހުގެ ރޭ ބޮޑު ކަޅު ދަބަހެއް ހިއްޕަވައިގެން މަޖިލީހަށް ވަނީ ވަޑައިގެންފައި
ހައުސިންގ މިނިސްޓަރު ކަޅު ދަބަހެއް ހިއްޕަވައިގެން ދިޔަ ވާހަކަ އަޑު ގަދަކޮށް ދައްކަމުން އަންނަ އިރު، މިކަމާ ގުޅޭގޮތުން އެތައް ބަޔަކު ގެންދަނީ ތުހުމަތުތައް އަމާޒު ކުރަމުންނެވެ.











