މިއަދު އޭޖީ ރައީސަށް ލަފާ އަރުވަނީތޯ ނުވަތަ ރައީސް އޭޖީއަށް ލަފާ އަރުވަނީތޯ އޮޅޭ ހިސާބަށް ގޮސްފި: ކުރީގެ އުއްތަމަފަނޑިޔާރު
16 ނޮވެމްބަރު 2026 | ހޯމަ 06:19ރަސްމާލެ މަޝްރޫއަކީ ކޮރަޕްޝަނަށް މަގުފަހިވާ ގޮތަށް ގާނޫނީ އިމުން ބޭރުން ހިންގާ ކަމެއް ކަމަށް ވިދާޅުވެ، ކުރީގެ އުއްތަމަފަނޑިޔާރު ޑރ. އަހުމަދު އަބްދުﷲ ދީދީ ސަރުކާރަށް ވަރަށް ބޮޑަށް ފާޑުވިދާޅުވެއްޖެ. ރައީސް މުއިއްޒު ގާނޫނުން ބޭރުވެވަޑައިގަންނަވާ ކަމަށް ތުހުމަތުކުރައްވައި، ގައުމީ ބޮޑެތި މަޝްރޫއުތައް ކުރިއަށްގެންދަންވާނީ ރައްޔިތުންގެ މަޝްވަރާއާއެކު ދެފުށް ފެންނަ ގޮތަކަށް ކަމަށް އެމަނިކުފާނު ވިދާޅުވި

ކުރީގެ އުއްތަމަފަނޑިޔާރު ޑރ. އަހުމަދު އަބްދުﷲ ދީދީ | ރާއްޖެ ޓީވީ
މިއަދު ބަންޑާރަ ނައިބު (އޭޖީ) ރައީސް އަށް ލަފާ އަރުވަނީތޯ ނުވަތަ ރައީސް އޭޖީ އަށް ލަފާ އަރުވަނީތޯ ސާފުނުވާ ކަމަށް ކުރީގެ އުއްތަމަފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވެއްޖެ އެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަދައްކަވަމުން ޑރ. އަހުމަދު އަބްދުﷲ ދީދީ ވިދާޅުވީ، ރަސްމާލެ މަޝްރޫއާ ދެކޮޅަށް ދައްކާ ވާހަކަތަކަކީ ހަމައެކަނި ސިޔާސީ ބޭނުމެއްގައި ދައްކާ ވާހަކަތަކެއް ކަމަށް ސަރުކާރުން ބުނި ނަމަވެސް ހަގީގަތަކީ އެއީ ނޫން ކަމަށެވެ.
ރަސްމާލެ މަޝްރޫއާ ދެކޮޅަށް ވާހަކަދައްކާ މީހުންނަކީ ރާއްޖެއަށް އަންނަ އިންވެސްޓުމަންޓުތަކާ ދެކޮޅު ބައެއް ކަމަށް ސަރުކާރުން ބުނަމުންދިޔަ ނަމަވެސް، އެ މަޝްރޫއާ މެދު ކަންބޮޑުވުން ފާޅުކުރަނީ އޭގެ ފަހަތުގައި ބޮޑެތި ގާނޫނީ މައްސަލަތަކާއި ކޮރަޕްޝަނަށް މަގުފަހިވާ ކަންކަން ހުރުމުން ކަމަށް އެމަނިކުފާނު ވިދާޅުވި އެވެ.
ޑރ. އަހުމަދު އަބްދުﷲ ދީދީ ވިދާޅުވީ، ގައުމުގެ މުސްތަގުބަލާ ގުޅުންހުރި މިފަދަ ބޮޑެތި މަޝްރޫއުތައް ކުރިއަށްގެންދާއިރު ރައްޔިތުންގެ ހިޔާލާއި މަޝްވަރާ ހޯދަންޖެހޭނެ ކަމަށެވެ. ނަމަވެސް މިހާރު ފެންނަމުންދަނީ ރައްޔިތުން ނިދީގައި ބައިތިއްބާފައި ސަރުކާރުން ބޮޑެތި ކޮރަޕްޝަންތައް ހިންގުމަށް ފުރުސަތު ހޯދަމުންދާ މަންޒަރު ކަމަށާއި، އެފަދަ ކަންކަމަށް ފުރުސަތު ދެވިގެން ނުވާނެ ކަމަށް އެމަނިކުފާނު ވިދާޅުވި އެވެ.
މި މުޅި މަޝްރޫއުގެ ވަށައިގެން ބޮޑެތި ގާނޫނީ ސުވާލުތަކެއް އުފެދިފައިވާކަން ވެސް އެމަނިކުފާނު ފާހަގަކުރެއްވި އެވެ.
ސަރުކާރުގެ ގާނޫނީ ނިޒާމު ހިނގަމުންދާ ގޮތަށް ފާޑުވިދާޅުވަމުން ކުރީގެ އުއްތަމަފަނޑިޔާރު ވިދާޅުވީ، މިހާރު ކަންކަން ހިނގަމުންދާ ގޮތުން ރައީސް މުއިއްޒަށް ބަންޑާރަނައިބު ލަފާ ދެއްވަނީތޯ ނުވަތަ ރައީސް މުއިއްޒު ބަންޑާރަނައިބަށް ލަފާ ދެއްވަނީތޯ ވެސް އޮޅޭ ހިސާބަށް ކަންކަން ގޮސްފައިވާ ކަމަށެވެ.
ގާނޫނުއަސާސީގައި ރައީސުލްޖުމްހޫރިއްޔާގެ މަސްއޫލިއްޔަތުތަކާއި ބާރުތައް ބަޔާންކޮށްފައިވާ މާއްދާތަކަށް ބަލާއިރު، މަދު ކަމެއްގައި ފިޔަވައި ދެން ހުރި ހުރިހާ ކަމެއްގައި ރައީސް އަށް މަތިކޮށްފައިވަނީ މުހިއްމު ޒިންމާތަކެއް ކަމަށާއި އެކަންކަމުގައި ރައީސް އަށް އަމިއްލަ އިހުތިޔާރެއް ނޯންނާނެ ކަމަށް ވެސް އެމަނިކުފާނު ވިދާޅުވި އެވެ.
ޑރ. އަހުމަދު އަބްދުﷲ ދީދީ އިތުރަށް ވިދާޅުވީ، ރައީސް މުއިއްޒު މިއަދު ހުންނެވީ ގާނޫނުން ބޭރުވުމުގައި ހައްދުފަހަނަ އަޅާފައި ކަމަށެވެ. އަދި ދައުލަތުގެ އެންމެ މަތީ ވެރިޔާގެ ހައިސިއްޔަތުން ގާނޫނުތަކަށް ބޯލަނބަން ޖެހޭނެ ކަމަށާއި، ނަމަވެސް ރަސްމާލެ މަޝްރޫއު ފަދަ ކަންކަމުގައި ގާނޫނީ އިމުގެ ތެރެއިން ކަންކަން ކުރިއަށް ނުދާކަމަށް އެމަނިކުފާނު ވިދާޅުވި އެވެ.











