މާ ގިނައިން ދޮގުހަދާ މީހަކާ ދިމާއަށް ކައްޒާބެކޭ ބުނުމަކީ އަދި އިހުތިރާމު ނުކުރުމެއް ނޫން: ވަކީލު މުސްތަފާ
15 ނޮވެމްބަރު 2026 | އާދީއްތަ 04:39މީހަކު މާބޮޑަށް ދޮގުހަދާނަމަ އެމީހަކަށް 'ކައްޒާބު' ކިޔުމަކީ އިހުތިރާމު ކުޑަކުރުން ނޫންކަމަށާއި، އިހުތިރާމަކީ ގަދަބާރުން ހޯދޭނެ އެއްޗެއް ނޫންކަމަށް ޤާނޫނީ ވަކީލު މުސްތަފާ ހަމީދު ވިދާޅުވެއްޖެ. ސަރުކާރުގެ ޖަލްސާތަކަށް މުވައްޒަފުން މަޖުބޫރުން ގެންދިއުމަކީ ރައީސް މުއިއްޒަށް އޮތް ތާއީދު ހާމަވާ ކަމެއް ނޫންކަމަށް އޭނާ ފާހަގަކުރެއްވި
ޤާނޫނީ ވަކީލު މުސްތަފާ ހަމީދު | ރާއްޖެ އެމްވީ
މާ ގިނައިން ދޮގުހަދާ މީހަކާ ދިމާއަށް ކައްޒާބެކޭ ބުނުމަކީ އަދި އިހުތިރާމު ނުކުރުމެއް ނޫންކަމަށް ޤާނޫނީ ވަކީލު މުސްތަފާ ހަމީދު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން މުސްތަފާ ހަމީދު ވިދާޅުވީ، ދިވެހިންނަކީ ޒަމާނުއްސުރެ ވެސް އެއްބަޔަކު އަނެއްބަޔަކަށް އިހުތިރާމް އަދާކުރަމުން އައި ބައެއް ކަމަށެވެ.
އެހެންނަމަވެސް ދިވެހިންގެ ތެރެއިން ބަޔަކު ނުކުމެ މި އިހުތިރާމް ގެއްލުވާލަން ކުރި މަސައްކަތް ވެސް 2018 ގެ ރިޔާސީ އިންތިޚާބާ ދިމާކޮށް ފެނިގެން ގޮސްފައިވާކަމަށް އޭނާ ވިދާޅުވި އެވެ. އެގޮތުން ބޭރު ގައުމެއްގެ ވެރިންނަށް ޖޯކު ޖަހައި ހެދި މަންޒަރު އެ ދުވަހު ފެނިގެން ދިޔަކަމަށް މުސްތަފާ ހަމީދު ފާހަގަކުރެއްވި އެވެ.
މުސްތަފާ ހަމީދު ވިދާޅުވީ ރާއްޖޭގެ ވެރިކަމަށް އަންނަ މީހުންނަށް އެކިއެކި ވަނަންތައް ކިޔުމަކީ އެކި ސަބަބުތަކާހުރެ ޒަމާނުއްސުރެ އޮންނަ ކަމެއް ކަމަށެވެ. މިސާލަކަށް ކަޅު މުހައްމަދު ރަސްގެފާނު، ބޮޑު ތަކުރުފާނު، ދޮން ބަންޑާރައިން ފަދަ ނަންނަން ކިޔާ އުޅޭކަމަށް އޭނާ ވިދާޅުވި އެވެ.
އެގޮތުން ބަލާއިރު، މީހަކު މާ ބޮޑަށް ދޮގު ހަދާނަމަ، އެމީހަކަށް ކައްޒާބު ވެސް ކިޔާ އުޅެދާނެކަމަށް މުސްތަފާ ހަމީދު ވިދާޅުވި އެވެ. އެކަން ހުއްޓުވަން ބޮޑު ކެމްޕޭނެއް ބާއްވައިގެން ރައްޔިތުންނަށް މަޖުބޫރު ކުރުވުމަކީ އެންމެ ރަނގަޅު ގޮތެއް ނޫންކަމަށް އޭނާ ވިދާޅުވި އެވެ.
މީގެ އިތުރުން، އިހުތިރާމަކީ އެއްވެސް މީހަކަށް ގަދަކަމުން ހޯދޭނެ އެއްޗެއް ނޫންކަމަށާއި، ގަދަބާރުން މުވައްޒަފުންނަށް މަޖުބޫރުކޮށްގެން ސަރުކާރުގެ ޖަލްސާތަކަށް ގެންދިއުމަކީ ރައީސް މުއިއްޒު އަށް އޮންނަ ތާއީދުގެ ހަގީގީ މަންޒަރު ފެންނަ ކަމެއް ނޫންކަމަށް ވެސް މުސްތަފާ ވިދާޅުވި އެވެ.
މުސްތަފާ ހަމީދު ވަނީ މިނިވަންކަމާއެކު ރައީސް މުއިއްޒުގެ ޖަލްސާއަކަށް ގޮވާލައިފިނަމަ 300 މީހުން ވެސް ދާނެކަމަކަށް ނުބެލެވޭކަމަށް ވިދާޅުވެފަ އެވެ.
ރައީސް މުއިއްޒަށް އޮންނަ ތާއީދުގެ ހަގީގީ މަންޒަރު ފެންނާނީ މިނިވަންކަމާއެކު ރައްޔިތުން ޖަލްސާތަކަށް ދާން ފަށާއިރުކަމަށް އޭނާ ވިދާޅުވި އެވެ.
