މި ސަރުކާރުން ކަންކުރަމުންދަނީ އިސްތިއުމާރީ ވެރިކަމުގައި ކަންކުރާ އުސޫލުން، މިއީ އަލައްބާރުމެންގެ އިންވެސްޓްމަންޓް މޮޑެލްގެ ސިފައެއް: މަތީން
14 ނޮވެމްބަރު 2026 | ހޮނިހިރު 16:56ރަސްމާލެ މަޝްރޫއު ފަދަ ބޮޑެތި އިންވެސްޓްމަންޓްތަކުގައި ރައްޔިތުންގެ ކަންބޮޑުވުންތަކަށް ސަރުކާރުން އިޖާބަ ނުދެނީ އީގަލް ހިލްސް ފަދަ ކުންފުނިތަކުގެ ނުފޫޒުން ކަމަށް އެމްޑަބްލިއުއެސްސީގެ ކުރީގެ އެމްޑީ މަތީން ވިދާޅުވެއްޖެ. އޭނާ ފާހަގަކުރެއްވި ގޮތުގައި މިފަދަ މަޝްރޫއުތައް ހާމަކަން ބޮޑު ގޮތެއްގައި ކުރިއަށް ނުގެންގޮސް، އިންވެސްޓަރުން ބޭނުންވާ ގޮތަށް ޤާނޫނުތައް ބަދަލުކުރުމަކީ އިސްތިއުމާރީ ސިފައެއް
އެމްޑަބްލިއުއެސްސީގެ ކުރީގެ މެނޭޖިންގ ޑިރެކްޓަރު އަބްދުލް މަތީން | ރާއްޖެއެމްވީ
މި ސަރުކާރުން ކަންތައްތައް ކުރަމުންދަނީ އިސްތިއުމާރީ ވެރިކަންތައްތަކުގައި ކަންކުރާ އުސޫލުން ކަމަށާއި، މި ސިފައަކީ އީގަލް ހިލްސްގެ ވެރިޔާ މުހައްމަދު އަލައްބާރުމެންގެ އިންވެސްޓްމަންޓް މޮޑެލްގެ ސިފައެއް ކަމަށް އެމްޑަބްލިއުއެސްސީގެ ކުރީގެ މެނޭޖިންގ ޑިރެކްޓަރު އަބްދުލް މަތީން ވިދާޅުވެއްޖެ އެވެ.
ރާއްޖެޓީވީން ގެނެސްދިން "ދިވެހީންގެ ބިން ދިވެހީންނަށް" ހާއްސަ ކަވަރޭޖުގައި ވާހަކަދައްކަވަމުން މަތީން ވިދާާޅުވީ މި ސަރުކާރުން އަމަލުކުރަމުންދާ ގޮތަށް ބަލާއިރު، ފެންނަނީ ސަރުކާރު ވަރަށް ބޮޑަށް ތާށިވެގެން އުޅޭ މަންޒަރު ކަމަށެވެ. މިއީ އީގަލް ހިލްސް އިން އިންވެސްޓްކުރާއިރު ފެންނަ ސިފަތަކެއް ކަމަށާއި ރައްޔިތުން ނުކުމެ ކިތަންމެ ވާހަކައެއް ދެއްކިޔަސް ގޮތް ނިންމާ ބަޔަކީ އެމީހުން ކަމަށް މަތީން ވިދާޅުވި އެވެ.
އެއީ އެމީހުންގެ އިންވެސްޓްމަންޓް މޮޑެލްގައި އޮންނަ ސިފައެއްކަން ފާހަގަކުރައްވާ މަތީން ވިދާޅުވީ ރައްޔިތުންގެ ކިތަންމެ ބޮޑު ކަންބޮޑުވުމެއް މިކަމުގައި އޮތް ނަމަވެސް، މި ސަރުކާރަށް ރަސްމާލެ މަޝްރޫއު ކުރިއަށް ގެންދިއުމަށް މަޖުބޫރުވެފައިވާ ކަމަށް ބެލެވޭ ކަމަށެވެ.
އެއީ އީގަލް ހިލްސް އިން އިންވެސްޓްކުރަން ފަށާ ތަންތަނުގައި އެބަހުރި ރައްޔިތުން ނުކުމެ، ވަރަށް ގިނަ ގައުމުތަކުގައި އަޑު އުފުލާފައި. ހަމައެކަނި ދިވެހީންނެއް ނޫން. 16 ވަރަކަށް ގައުމަށް ބެލިކަމުގައިވީ ނަމަވެސް އެކަންބޮޑުވުންތައް އާދޭ. ބައެއް ފަހަރު އެގްރީމަންޓް ބާތިލުކުރީމަ ވެސް އެމީހުން އެ ގައުމުތަކުން ނުފައިބާ އެބަހުރޭ. އިސްތިއުމާރީ ވެރިކަންތައް ކުރީގައި ހިންގި އުސޫލަށް ހިންގާ ކަންކަން މި ހުންނަނީ. އަޅުގަނޑުމެންނަކަށް ނުފެނޭ ޖެނުއިން އިންވެސްޓަރުން އައިސްގެން ކަމަށް އެއީ ކީ. ޖެނުއިން އިންވެސްޓަރުން އައީމަ މިކަހަލަ ހަމަނުޖެހުންތަކެއް ނުއުފެދޭނެ. ރައްޔިތުންގެ ތެރޭގައި ހިތްހަމަނުޖެހުންތަކެއް އޮތްކަމުގައި ވާނަމަ އެ ފަރާތުން ވެސް ރައްޔިތުންގެ އަޑުތައް އަހާނެ. ސަރުކާރުން ވެސް ރައްޔިތުންގެ އަޑު އަހާނެއަބްދުލް މަތީން
އެހެން ނަމަވެސް އިސްތިއުމާރީ ބާރުތަކުގައިވާ ގޮތަށް ބަލާއިރު ގޮއްމުށުގެ ބާރުން ކަންކަން ކުރާއިރު ރައްޔިތުންގެ އަޑު އަހަން ބޭނުން ނުވާނެ ކަމަށާއި މައިނޯރިޓީ އަށް އިހުތިރާމް ކުރުމެއް ވެސް ނޯންނާނެ ކަމަށް މަތީން ވިދާޅުވި އެވެ. އަދި ވިދާޅުވީ މެޖޯރިޓީ އިން ކަންކުރާނީ ގާނޫނުތަކާ އެއްގޮތްވާ ގޮތަކަށް ވެސް ނޫން ކަމަށެވެ.
މަތީން ވިދާޅުވީ އިންވެސްޓްމަންޓްތަކަކީ ގާނޫނީ ފްރޭމްވޯކް ހެދިގެން، ގާނޫނީ އޮނިގަނޑުގެ ތެރެއިން ހުޅުވާލެވިފައިވާ ފުރުސަތެއްގެ ތެރެއިން، އަދި ވާދަވެރި ފުރުސަތެއްގެ ތެރެއިން އަންނަން ޖެހޭ އެއްޗެއް ކަމަށެވެ. އަންނަނީ އެންމެ ރަނގަޅު ފުރުސަތު ކަމާއި ލިބެނީ ހައްގު މިންވަރުކަން އެނގޭނީ ވެސް އޭރުން ކަމަށް މަތީން ވިދާޅުވި އެވެ.
އެހެން ނަމަވެސް މީހަކު ގެނެސް އެއްބަސްވުންތައް ހެދިތަން ވެސް ފެނުނީ ވަރަށް ސިއްރުންކަން ފާހަގަކުރައްވާ މަތީން ވިދާޅުވީ ދެން ފެނުނީ އެ އެއްބަސްވުމުގެ މައްޗަށް ގާނޫނު ހެދި މަންޒަރު ކަމަށެވެ. މިއީ ވެސް އަލައްބާރުމެން ކުރާ މަސައްކަތުގެ މޮޑެލް އެއް ކަމަށާއި ކަންކަން ރަނގަޅަށް ހިނގާނަމަ، ނުވަތަ ގާނޫނީ ވެރިކަމެއް ހިނގާ ތަންތަނުގައި އެ އަންނަ މީހާ، ނުވަތަ އިންވެސްޓަރު ޖެހޭނީ ގާނޫނަށް ތަބާވާން ކަމަށް މަތީން ވިދާޅުވި އެވެ. ނަމަވެސް މިހާރު މި ފެންނަނީ ގާނޫނު އެ މީހުންނަށް ތަބާވާން ޖެހޭތަން ކަމަށް ވެސް އޭނާ ވިދާޅުވި އެވެ.
