ޔާމީންގެ ވަރުގަދަ މެސެޖެއް ދީނީ އިލްމުވެރީންނަށް: ''އެ ބޭފުޅުންގެ ވާޖިބު އަދާކުރަން ބޭނުން ނޫނިއްޔާ، ނަމަނަމަ އަޅުގަނޑުމެންނަށް ކަމެއް ކޮށްދެއްވާށޭ. ރުގްޔާ ކޮށްގެންވެސް ރައީސް މުއިއްޒު ހަމަޔަކަށް އަޅުވައިދޭށޭ“
14 ނޮވެމްބަރު 2026 | ހޮނިހިރު 06:41ރަސްމާލެ މަޝްރޫއާ ގުޅިގެން ދީނީ އިލްމުވެރިން އިގްތިސާދީ ވާހަކަދައްކަވާތީ ކުރީގެ ރައީސް ޔާމީން ވަނީ ފާޑުވިދާޅުވެފައި. އެމަނިކުފާނު ވިދާޅުވީ އިލްމުވެރިންގެ ޒިންމާ އަދާނުކުރެވޭނަމަ، ރައީސް މުއިއްޒު ހަމަޔަކަށް އެޅުވުމަށް ރުގްޔާ ކޮށްދެއްވުމަށް އެދިވަޑައިގަންނަވާ ކަމަށް. އަދި ރަސްމާލޭގެ ބޮޑު ސަރަހައްދެއް ބޭރުގެ ބަޔަކަށް ދިނުމަކީ ދިވެހިންގެ ހައްގުގައި ކަންބޮޑުވާންޖެހޭ މައްސަލައެއްކަން އެމަނިކުފާނު ފާހަގަކުރެއްވި
ދިވެހީންގެ ބިން ދިވެހީންނަށް" މި ނަމުގައި ހުކުރު ދުވަހުގެ ރޭ އާޓިފިޝަލް ބީޗުގައި ބޭއްވި ޚާއްސަ އެއްވުމުގައި ކުރީގެ ރައީސް އަބްދުﷲ ޔާމީން ބައިވެރިވެވަޑައިގަންނަވަނީ | ސަން އޮންލައިން
ދީނީ އިލްމުވެރިން އަސްލު މައްސަލައިގެ މަސްދަރުގެ ތެރެއަށް ވަދެވަޑައިގަންނަވަން ބޭނުންނުވެ، އިގްތިސާދީ ވާހަކަތަކެއް ދައްކަވަމުން ގެންދަވާ ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްޤައްޔޫމް، ދީނީ އިލްމުވެރިންނަށް ވަރުގަދަ މެސެޖެއް ރައްދު ކުރައްވައިފި އެވެ.
ރައީސް ޔާމީން މި މެސެޖް ރައްދުކުރެއްވީ، "ދިވެހީންގެ ބިން ދިވެހީންނަށް" މި ނަމުގައި ހުކުރު ދުވަހުގެރޭ އާޓިފިޝަލް ބީޗުގައި ބޭއްވި ޚާއްސަ އެއްވުމުގައި ވާހަކަފުޅު ދައްކަވަމުންނެވެ.
އެ މަނިކުފާނު ފާހަގަކުރެއްވި ގޮތުގައި، ރަސްމާލެ މަޝްރޫއުގެ މައްސަލައާ ގުޅިގެން އިލްމުވެރިން އުޅުއްވަނީ ހައްތަހާ ވެސް މިއީ އިންވެސްޓްމަންޓެއް ކަމަށް ވިދާޅުވެ އެ ވާހަކަ ދެއްކެވުމުގަ އެވެ.
އިންވެސްޓްމަންޓްތަކާ ބެހޭގޮތުން ބަސްބުނެ ވާހަކަދައްކަންވީ ދީނީ އިލްމުވެރިންތޯ ނުވަތަ އިގްތިސާދީ މާހިރުންތޯ ވިދާޅުވެ ޔާމީން ސުވާލު އުފެއްދެވި އެވެ. މީގެއިތުރުން، މި މައްސަލައިގައި ޔަހޫދީންނާ އެކީ ދިވެހީން ވަޒަންވެރިވެ، އެއްދާންކުރުމަކީ އިލްމުވެރިންނަށް މައްސަލައަކަށް ނުވަނީ ކީއްވެގެންތޯ ވެސް އެ މަނިކުފާނު އެއްސެވި އެވެ.
ޔާމީން ވިދާޅުވީ އިލްމުވެރިން ނަންގަވަނީ އިގްތިސާދީ ވާހަކަތައް ކަމަށާއި، 5,000 ހައުސިންގ ޔުނިޓް ހަދައިދިނުމުން ކިހާ ރަނގަޅުހޭ ވިދާޅުވެ ވާހަކަ ދައްކަވާ ކަމަށެވެ. ނަމަވެސް ހުޅުމާލޭގައި ނުހެދި އޮތީ 5,000 ހައުސިންގ ޔުނިޓް އެކަނި ނޫން ކަމަށާއި، ކިތައް ހާސް ހައުސިންގ ޔުނިޓްތޯ އެތަނަށް ދިޔައީ އަހައި އެ މަނިކުފާނު ސުވާލު އުފެއްދެވި އެވެ.
އަޅުގަނޑު ހަމަ އިލްމުވެރިންނަށް ދަންނަވާލަން އޮތީ، އެ ބޭފުޅުންގެ މަސައްކަތްޕުޅު، އެ ބޭފުޅުންގެ ޒިންމާ އަދި އެ ބޭފުޅުންގެ ވާޖިބު އަދާކުރައްވަން ބޭނުންފުޅު ނޫނިއްޔާ، ނަމަނަމަ އަޅުގަނޑުމެންނަށް ކަމެއް ކޮށްދެއްވާށޭ. ރުގްޔާ ކޮށްގެން ވެސް ރައީސް މުއިއްޒު ހަމަޔަކަށް އަޅުވައިދޭށޭއަބްދުﷲ ޔާމީން
މީގެއިތުރުން ޔާމީން ވިދާޅުވީ ރަސްމާލޭގެ ބޮޑު ސަރަހައްދެއް ބޭރުގެ ބަޔަކާ ދިނުމަށް ކުރަމުންދާ މި މަސައްކަތަކީ ދިވެހިންގެ ހައްގުގައި ކުރާ މަސައްކަތްތަކެއް ކަމަށެވެ. މިއީ އެއްވެސް ގޮތަކަށް ސިޔާސީ މަންފާއެއް ހޯދުމުގެ ބޭނުމުގައި ކުރާ ކަމެއް ނޫން ކަމަށް އެމަނިކުފާނު ތަކުރާރުކޮށް ވިދާޅުވި އެވެ.
