ވަތަނީ މީހަކީ ސަރުކާރަށް ކުޑަކަކޫ ޖަހާ އަޅެއް ނޫން، މިނިވަންކަމާއި އިސްތިގުލާލު ގެއްލިގެންދާ ފަދަ ކަންކަމާ ދެކޮޅަށް ބަސްބުނަން ޖެހޭ: ރައީސް ޔާމީން
14 ނޮވެމްބަރު 2026 | ހޮނިހިރު 06:16ގައުމުގެ މިނިވަންކަމާއި އިސްތިގުލާލަށް އުނިކަން އަންނަ ކަންކަމާ ދެކޮޅަށް ބަސްބުނުމަށް ގޮވާލައްވައި، ރައީސް މުއިއްޒުގެ ސިޔާސަތުތަކަށް ކުރީގެ ރައީސް ޔާމީން ވަރަށް ބޮޑަށް ވަނީ ފާޑު ވިދާޅުވެފައި. "ދިވެހީންގެ ބިން ދިވެހީންނަށް" އެއްވުމުގައި ވާހަކަދައްކަވަމުން ޔާމީން ވިދާޅުވީ، ގައުމުގެ ބިންތަކަށް ގެއްލުންދޭ ފަރާތްތަކުގެ މައްޗަށް ކުރިމަގުގައި ޖިނާއީ ތަހުގީގު ހިންގައި ހައްގު އަދަބު ދޭނެ ކަމަށް
"ދިވެހީންގެ ބިން ދިވެހީންނަށް" މި ނަމުގައި ހުކުރު ދުވަހުގެރޭ އާޓިފިޝަލް ބީޗުގައި ބޭއްވި ޚާއްސަ އެއްވުމުގައި ކުރީގެ ރައީސް އަބްދުﷲ ޔާމީން ވާހަކަފުޅު ދައްކަވަނީ | ސަން އޮންލައިން
ވަތަނީ މީހަކީ ސަރުކާރަށް ކުޑަކަކޫ ޖަހާ އަޅެއް ނޫން ކަމަށާއި، ރާއްޖޭގެ މިނިވަންކަމާއި އިސްތިގުލާލު ގެއްލިގެންދާ ފަދަ ކަންކަމާ ދެކޮޅަށް ބަސްބުނަން ޖެހޭ ވަގުތު ޖެހިފައިވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
"ދިވެހީންގެ ބިން ދިވެހީންނަށް" މި ނަމުގައި ހުކުރު ދުވަހުގެރޭ އާޓިފިޝަލް ބީޗުގައި ބޭއްވި ޚާއްސަ އެއްވުމުގައި ޔާމީން ވަނީ އެމެރިކާގެ މަޝްހޫރު ލިޔުންތެރިޔާ މާކް ޓުވެއިންގެ ބަސްކޮޅަކަށް އަލިއަޅުއްވާލައްވާފަ އެވެ.
އެމަނިކުފާނު ވިދާޅުވީ ހަގީގީ ވަތަނީ މީހަކީ ލޯ މެރި، ސަރުކާރުތަކަށް އަޅުދާސްތުވާ މީހެއް ނޫން ކަމަށާއި، އޭގެ ބަދަލުގައި އެއީ ގައުމު ދެކެ ލޯބިވާ، ގައުމުގެ އަސާސްތައް ދަމަހައްޓާ އަދި ގައުމަށް އިހްތިރާމްކުރާ މީހާ ކަމަށެވެ. އަދި މިއަދު ރާއްޖެ މިއޮތީ އެފަދަ ހައްސާސް މަރުހަލާއެއްގައި ކަމަށް ޔާމީން ވިދާޅުވި އެވެ.
ވަތަނީ މީހަކީ އެއްގޮތަކަށް ވެސް ލޯ އަނދިރިވެ، ސަރުކާރަށް ކުޑަކަކޫ ޖަހާ އަޅެއް ނޫން. ހަގީގަތުގައި ވަތަނީ މީހަކީ ގައުމު ދެކެ ލޯބިވާ، ގައުމުގެ ބަހާތައް ދަމަހައްޓާ، ގައުމަށް އިހުތިރާމްކުރާ މީހާއަބްދުﷲ ޔާމީން އަބްދުލް ޤައްޔޫމް
ވެރިކަންކުރާ ޕީއެންސީގެ މެންބަރުންނާއި، ރައްޔިތުންގެ މަޖިލީހުގެ މެންބަރުން އަދި ސިފައިންނާއި ފުލުހުންނަށް މުޚާތަބުކުރައްވައި ޔާމީން ވިދާޅުވީ، މިއީ ގައުމުގެ ހައްގުގައި އެ ފަރާތްތަކުން ބަސްބުނަންޖެހޭ ވަގުތު ކަމަށެވެ. އަދި ރާއްޖޭގެ އިސްތިގުލާލު ގެއްލުވާލައި، ބިމުން ބައެއް ކަނޑާލައި ދިނުމަށްފަހު، ފަހުން އެ އަނބުރާ ހޯދަން މަސައްކަތްކުރުމަކީ ބޭކާރު ކަމެއް ކަމަށް ވިދާޅުވި އެވެ.
ޔާމީން ވިދާޅުވީ، އެފަދަ ކަންކަމާ ދެކޮޅަށް ތެދުވެ ބައިވެރިނުވާ ކޮންމެ މީހަކީ އެ އަމަލުގައި ބައިވެރިވާ މީހެއް ކަމަށާއި، ކުރިމަގުގައި އެހެން ވެރިކަމެއް އައިސް މިކަންކަން އިސްލާހު ކުރާއިރު، މިކަމުގައި ޝާމިލުވާ ފަރާތްތައް ޝަރީއަތުގެ ކުރިމައްޗަށް ހާޒިރުކުރާނެ ކަމަށެވެ. އަދި އެފަދަ ފަރާތްތަކުގެ މައްޗަށް ޖިނާއީ ތަހުގީގުތައް ހިންގައި، އެކަށީގެންވާ ޖިނާއީ އަދަބު ލިބިގެންދާނެ ކަމަށް ވެސް ވިދާޅުވި އެވެ.
މީގެ އިތުރުން ޔާމީން ވަނީ ރައީސް ޑރ. މުހައްމަދު މުއިއްޒަށް ވެސް ވަރަށް ބޮޑަށް ފާޑު ވިދާޅުވެފަ އެވެ.
އެމަނިކުފާނު ވިދާޅުވީ، ރައީސް މުއިއްޒު އަކީ އަބަދުވެސް ބިމާ ގުޅޭ ކަންކަމަށް ޚާއްސަ ޝައުގުވެރިކަމެއް ބަހައްޓަވާ ބޭފުޅެއް ކަމަށާއި، އެކަން މާލެ ސިޓީގެ މޭޔަރުކަމުގައި ހުންނެވި ދުވަސްވަރު ވެސް ވަރަށް ސާފުކޮށް ފެނިގެންދިޔަ ކަމަށެވެ.
