ރަސްމާލެ މަޝްރޫއާ ގުޅިގެން ފެންނަ ނުފެންނަ ވޯޓެއް ނެގުމަކީ އިހުތިޔާރީ ކަމެއް ނޫން، އެއީ ލާޒިމުކަމެއް: ބޮންޑާ
14 ނޮވެމްބަރު 2026 | ހޮނިހިރު 04:44ރަސްމާލެ މަޝްރޫއުގެ ސަބަބުން ރާއްޖޭގެ ސިޔާދަތީ މިނިވަންކަމަށް ބުރޫއަރައި، ގާނޫނު ނުހިނގާ ސަރަހައްދެއް އުފެދިދާނެ ކަމުގެ ބިރު އޮތް ކަމަށް ކުރީގެ މެންބަރު އިބްރާހީމް ރަޝީދު ވިދާޅުވެއްޖެ. އެތަނުގައި ބޭރު ބަޔަކު އާބާދުވެއްޖެ ނަމަ ދިވެހިންގެ ހައްގުތަކަށް އުނިކަން އަންނާނެތީ، މިފަދަ ބޮޑު ނިންމުމެއް ނިންމަންވާނީ ގާނޫނުއަސާސީގައިވާ ފަދައިން ރައްޔިތުންގެ ފެންނަ ނުފެންނަ ވޯޓަކުން ކަމަށް އޭނާ ފާހަގަކުރެއްވި
ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ) | ރާއްޖެ އެމްވީ
ރަސްމާލެ މަޝްރޫއާ ގުޅިގެން ފެންނަ ނުފެންނަ ވޯޓެއް ނެގުމަކީ އިހުތިޔާރީ ކަމެއް ނޫން ކަމަށާއި އެއީ ލާޒިމުކަމެއް ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
"ދިވެހީންގެ ބިން ދިވެހީންނަށް" ނަމުގައި ކުރިއަށް ގެންދިޔަ ހާއްސަ ކަވަރޭޖްގައި ވާހަކަދައްކަވަމުން ބޮންޑާ ވިދާޅުވީ ރަސްމާލެ މަޝްރޫއުގެ ސަބަބުން ދިވެހިރާއްޖޭގެ ސިޔާދަތީ މިނިވަންކަން ގެއްލޭ ކަމަށާއި ދިވެހިރާއްޖޭގައި މި ގާއިމު ކުރަނީ ގާނޫނުތައް ނުހިނގާ އެހެން ސަރަހައްދެއް ކަމަށެވެ.
އެގޮތުން ދިވެހިރާއްޖޭގެ ކަސަޓަމްސްއާއި ފުލުހުން އަދި ސިފައިންނަށް ނުވަދެވޭ ނުވަތަ ނުބެލޭ ތަންތަން ހުރެގެން ނުވާނެ ކަމަށް ބޮންޑާ ވިދާޅުވި އެވެ. އަދި ނުބެލޭ ތަންތަން ހުރުމަކީ ޝަރުއީ ގާނޫނީ ބާރުތައް ކެނޑިގެން ދިޔުން ކަމަށް ބޮންޑާ ވިދާޅުވި އެވެ.
ރާއިސުލްޖުމްހޫރިއްޔާ ހުވާކުރަނީ ގާނޫނު އަސާސީގައި ލިޔެފައި އޮތް އެއްޗެއްގެ މައްޗަށް ކަމަށާއި މިފަދަ ހާލަތެއްގައި ފެންނަ ނުފެންނަ ވޯޓެއް ނަގަން ޖެހޭނެ ކަމަށް ގާނޫނޫ އަސާސީގައި ލިޔެފައި އޮތްކަން ބޮންޑާ ފާހަގަކުރެއްވި އެވެ. އެގޮތުން ރައްޔިތުންގެ މަޖިލީހުގައި ސީދާ ރައްޔިތުން ތަމްސީލު ނުކުރާ ކަމަށާއި ކޯޓުތަކާއި ހުރިހާ ތަނެއް އަޅުވެތި ކޮށްފައި އޮތްކަން އެނގޭއިރު ދެން އޮތް ގޮތަކީ ފެންނަ ނުފެންނަ ވޯޓެއް ނެގުން ކަމަށް ބޮންޑާ ވިދާޅުވި އެވެ.
ހަމައެއާއެކު، ރަސްމާލޭގައި ބޭރު ބަޔަކު އާބާދުކޮށްފި ކަމުގައި ވާނަމަ ރައްޔިތަކަށްވުމަށްފަހު ބައިނަލްއަގުވާމީ ގޮތުން އެފަރާތްތަކަށް ލިބޭ ބާރުތަކެއް ހުންނަ ކަމަށް ބޮންޑާ ވިދާޅުވި އެވެ. އޭގެ ތެރޭގައި އާމްދަނީ ހޯދުމުގެ ހައްގުތަކާއި، އަޅުކަން ކުރުމުގެ ހައްގުތަކާއި، ވިޔަފާރިތަކުގެ ތެރެއަށް ވަނުމުގެ ހައްގު އެފަރާތްތަކަށް ލިބިގެންދާނެ ކަމަށް ވިދާޅުވި އެވެ.
މީގެ އިތުރުން، ރަސްމާލެ ބޭރުގެ ފަރާތްތަކަށް ދޫކޮށްފިނަމަ މިފަހުގެ ތިން ޖެނެރޭޝަން މުސްކުޅިވާއިރު ވެސް އެތަނުގެ މުއްދަތު ހަމަނުވާ ކަމަށް ބޮންޑާ ވިދާޅުވި އެވެ.
ދެން ކިހިނެއް ކިޔާނީ. އަޅުގަނޑުމެން މުހައްމަދު ތަކުރުފާނު ވާހަކަ ކިޔާހެންނު ކިޔާނީ އެއްދުވަސް ކޮޅެއްގައި އައޭ، ދޯންޏެއްގައި އައޭ، އެމީހުން އައިސްފައި ލެފީއޭ ބޭރުން އައިބައެކޭ ޔަހޫދީންނޭ ވެސް ކިޔައޭ ދެން އެތާ އެބަ އުޅޭ އަލީ ނަތަންޔާހޫ ކިޔާ މީހަކު އެއީ އެތާނގެ މީހެކޭއިބްރާހީމް ރަޝީދު (ބޮންޑާ)
އެހެންކަމުން ރަސްމާލެ މަޝްރޫއާ ގުޅިގެން ފެންނަ ނުފެންނަ ވޯޓެއް ނެގުމަކީ އިހުތިޔާރީ ކަމެއް ނޫން ކަމަށާއި އެއީ ލާޒިމުކަމެއް ކަމަށް ބޮންޑާ ވިދާޅުވި އެވެ.
