ރައްޔިތުންގެ މަޖިލީހުން ރައީސް މުއިއްޒުގެ މައްސަލަ ބެލުމަށްފަހު އެމަނިކުފާނު އަޒުލުކުރަން ޖެހޭނެ: ކުރީގެ އުއްތަމަ ފަނޑިޔާރު
13 ނޮވެމްބަރު 2026 | ހުކުރު 10:51ރަސްމާލެ މަޝްރޫއުގެ އެއްބަސްވުން ގާނޫނުއަސާސީއާ ހިލާފު ކަމަށް ބުނެ ހުށަހެޅި މައްސަލަ ސުޕްރީމް ކޯޓުން ބޭރުކޮށްލީ ދުސްތޫރީ ހަމަތަކާ ހިލާފަށް ކަމަށް ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ ވިދާޅުވެއްޖެ. މި ސަރުކާރުން ކުރާ ގާނޫނާ ހިލާފު ކަންކަން ބަލައި ޖަވާބުދާރީ ކުރުވުމަކީ ރައްޔިތުންގެ މަޖިލީހުގެ ޒިންމާއެއް ކަމަށާއި، އެކަން ނުކުރެވޭ ނަމަ ޖުޑީޝަލް ރިވިއުއަކަށް ދާންޖެހޭނެ ކަމަށް ވެސް އެމަނިކުފާނު ފާހަގަކުރެއްވި
ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ | ރާއްޖެއެމްވީ
ރައްޔިތުންގެ މަޖިލީހުން ރައީސް ޑރ. މުހައްމަދު މުއިއްޒުގެ މައްސަލައި ބަލައި، ޕާލިމަންޓަރީ އިންވެސްޓިގޭޝަނެއް ހިންގައި، އޭގެ ދަށުން އެމަނިކުފާނު އަޒުލު ކުރެވެން ޖެހޭނެ ކަމަށް ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ ވިދާޅުވެއްޖެ އެވެ.
ރާއްޖެޓީވީން ގެނެސްދިން "ދިވެހީންގެ ބިން ދިވެހީންނަށް" ހާއްސަ ކަވަރޭޖުގައި ވާހަކަދައްކަވަމުން ޑރ. އަހްމަދު އަބްދުﷲ ދީދީ ވިދާޅުވީ ރައީސް މުއިއްޒު ކުރައްވަމުން ގެންދަވާ ގާނޫނު އަސާސީއާ ޚިލާފު ކަންތައްތައް އެންމެ ފުރަތަމަ ބެލެން ޖެހޭ ތަނަކީ ހަގީގަތުގައި ރައްޔިތުންގެ މަޖިލިސް ކަމަށެވެ.
އެއީ ގާނޫނު އަސާސީ އިން މަޖިލީހާ މަތިކޮށްފައިވާ ޒިންމާއެއް ކަމަށާއި ރައީސް މުއިއްޒު އާއި މި ސަރުކާރުން ޖަވާބުދާރީ ކުރުވުމަށް މަޖިލީހުން ތަހުގީގުކުރަން ޖެހޭނެ ކަމަށް ވެސް ޑރ. ދީދީ ވިދާޅުވި އެވެ.
ރައީސުލްޖުމްހޫރިއްޔާ މި ކުރައްވާ ގާނޫނު އަސާސީއާ ޚިލާފު ކަންތައްތަކާއި ގާނޫނު އަސާސީ އޮތް ގޮތުން އެ ކަންތައްތައް އެންމެ ފުރަތަމަ ކުރަން ޖެހޭނީ ރައްޔިތުންގެ މަޖިލީހުން. ރައްޔިތުންގެ މަޖިލީހުން ޖެހޭނެ ޖަވާބުދާރީ ކުރުވަން، ރައީސުލްޖުމްހޫރިއްޔާ އަށް ޕާލިމަންޓަރީ އިންވެސްޓިގޭޝަނެއް ހިންގައި އޭގެ ދަށުން އަޒުލު ވެސް ކުރެވެން ޖެހޭނެ. އެކަންތައް އެގޮތަށް ނުކުރެވިއްޖެޔާ ޖުޑީޝަލް ރިވިއަށް ދާން ޖެހޭނެ. ސުޕްރީމް ކޯޓުގެ ވާހަކަ ދެންނެވީ. އެއީ ޕަބްލިކް އިންޓްރެސްޓް ލިޓިގޭޝަނެއްގެ ގޮތުގައި މިހާރު ވެސް އެބައޮތް މައްސަލައެއް ހުށަހަޅުއްވާފައިޑރ. އަހްމަދު އަބްދުﷲ ދީދީ
ރަސްމާލެ ތަރައްގީކުރުމަށް އީގަލް ހިލްސް ކުންފުންޏާއެކު ދިވެހި ސަރުކާރުން ސޮއިކޮށްފައިވާ "ކޮމާޝަލް ޓާމްސް އެގްރީމަންޓް" ގެ ސައްހަކަމާ މެދު ސުވާލު އުފައްދައި، އާންމު މަސްލަހަތާ ގުޅުންހުރި ދުސްތޫރީ މައްސަލައެއް ސުޕްރީމް ކޯޓަށް ހުށަހަޅުއްވާފައި ވަނީ ގާނޫނީ ވަކީ އަލީ ހުސެއިން އެވެ.
އެ މައްސަލައާ ގުޅިގެން ވާހަކަދައްކަވަމުން ޑރ. ދީދީ ވިދާޅުވީ އެއް މައްސަލަ ސުޕްރީމް ކޯޓުގެ ރަޖިސްޓްރާ ބޭރުކޮށްލައްވާފައި ވަނީ ދުސްތޫރީ ހަމަތަކާ ޚިލާފަށް ކަމަށެވެ. އަދި އެ މައްސަލަ ބޭރުކޮށްލުމާއި ގުޅިގެން އެކަން ރިވިއުއަށް ހުށަހަޅާފައިވާއިރު އެކަމާ ގުޅޭ އެއްވެސް މައުލޫމާތެއް ކޯޓުން ދީފައިނުވާކަން ފާހަގަކުރައްވާ ޑރ. ދީދީ ވިދާޅުވީ، ހަގީގަތަށް ބަލާއިރު މިއީ އެއަށްވުރެ އަވަހަށް ނިމެން ޖެހޭ މައްސަލައެއް ނަމަވެސް އެކަން ވެސް ނުވެ އޮތް ކަމަށެވެ.
ރަސްމާލޭ މަޝްރޫއުއާ ގުޅޭ ގޮތުން ހުށަހެޅި މި މައްސަލަ ސުޕްރީމް ކޯޓުން ވަނީ އޮކްޓޫބަރު 13 ވަނަ ދުވަހު ބޭރުކޮށްލާފަ އެވެ.
ސުޕްރީމް ކޯޓަށް ހުށަހެޅި މި މައްސަލައިގައި ފާހަގަކޮށްފައިވަނީ، ދައުލަތުގެ މުދަލެއް ބޭރުގެ ފަރާތަކަށް 99 އަހަރުގެ މުއްދަތަށް އެއްފަހަރާ ކުއްޔަށް ދިނުމަށް ދައުލަތަށް ބާރުލިބޭ އެއްވެސް ގާނޫނީ އޮނިގަނޑެއް ރާއްޖޭގައި ނެތް ކަމަށެވެ. އަދި ގާނޫނީ ބާރެއް ނެތި، ބޭރުގެ ފަރާތްތަކަށް މިފަދަ ދިގު މުއްދަތަކަށް ބިން ކުއްޔަށް ދިނުމަށް އެކުލަވާލާ ކޮންމެ އެއްބަސްވުމަކީ ގާނޫނު އަސާސީގެ 250 ވަނަ މާއްދާއާ ސީދާ ޚިލާފު ކަމެއް ކަމަށް ވެސް މި މައްސަލައިގައި ވަނީ ބުނެފަ އެވެ.
މީގެ އިތުރުން، އެ ބިމުގެ މައްޗަށް ތިން ވަނަ ފަރާތްތަކުގެ ހައްގުތައް ދާއިމީކޮށް އުފެއްދުމުގެ ބާރު އީގަލް ހިލްސްއަށް ދިނުމަށް އެއްބަސްވުމުގައި ހިމަނާފައިވާ މާއްދާތަކުގެ ގާނޫނީ ސައްހަކަމާމެދު ވެސް މި މައްސަލައިގައި ސުވާލު އުފައްދާފައިވެ އެވެ. ގާނޫނު އަސާސީގެ 251 ވަނަ މާއްދާގައި، ބޭރުގެ ފަރާތްތަކަށް ރާއްޖޭގެ ބިމުގެ މިލްކުވެރިކަން ނުވަތަ ކުލީގެ ހައްގު ދެވޭނެ އެންމެ ދިގު މުއްދަތަކީ 99 އަހަރު ކަމަށް ކަނޑައަޅާފައި އޮތް ނަމަވެސް، މި އެއްބަސްވުމުގެ ސަބަބުން، ވަކި މުއްދަތެއް ނެތް ގޮތަށް ނުވަތަ ދާއިމަށް ރާއްޖޭގެ ބިމުގެ މައްޗަށް ބޭރުގެ ފަރާތްތަކަށް މިލްކުވެރިކަމުގެ މަސްލަހަތުތައް ލިބިގެންދާނެ މަގެއް ފަހިވެގެންދާ ކަމަށް މައްސަލައިގައި ފާހަގަކޮށްފައިވެ އެވެ.
އެހެންކަމުން، މި އެއްބަސްވުމަކީ ގާނޫނު އަސާސީގެ 250 ވަނަ މާއްދާއާއި 251 ވަނަ މާއްދާއާ ސީދާ ޚިލާފު އެއްބަސްވުމެއް ކަމަށްވާތީ، މިއީ ބާތިލު އެއްބަސްވުމެއް ކަމަށް ކަނޑައަޅައިދިނުމަށް މި މައްސަލައިގައި ސުޕްރީމް ކޯޓުގައި ވަނީ އެދިފަ އެވެ.
