ރައީސް މުއިއްޒުގެ އެންމެ ބޮޑު މަސައްކަތަކީ މީޑިއާތައް ކޮންޓްރޯލް ކުރުން، ނަމަވެސް އެކަން ކާމިޔާބެއް ނުވާނެ: މެންބަރު މައުރޫފް
13 ނޮވެމްބަރު 2026 | ހުކުރު 06:54ރަސްމާލެ މަޝްރޫއުގެ ދަށުން ބޭރުގެ ފަރާތްތަކަށް 99 އަހަރަށް ބިން ދޫކުރުމަކީ ގާނޫނުއަސާސީއާ ހިލާފު ކަމެއް ކަމަށް ވިދާޅުވެ، އެ މަޝްރޫއު ވަގުތުން ހުއްޓާލުމަށް މެންބަރު މައުރޫފް ގޮވާލެއްވި. މި މަސައްކަތުގައި ސަރުކާރުގެ ނުފޫޒު އޮތް މިންވަރުން ރައްޔިތުންގެ ފެންނަ ނުފެންނަ ވޯޓަކަށް ދާންޖެހޭ ކަމަށާއި، އިދިކޮޅު ޕާޓީތައް ގުޅިގެން މި މަސައްކަތް ކޮށްފިނަމަ ކާމިޔާބުވާނެ ކަމަށް މެންބަރު މައުރޫފް ވިދާޅުވި
ހުކުރު ދުވަހު ރާއްޖެޓީވީން ގެނެސްދިން "ދިވެހީންގެ ބިން ދިވެހީންނަށް" ޚާއްސަ ކަވަރޭޖްގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވާހަކަ ދައްކަވަނީ | ރާއްޖެއެމްވީ
ރާއްޖޭގެ ވެރިކަމާ ހަވާލުވެވަޑައިގަތުމަށްފަހު ރައީސް ޑރ. މުހައްމަދު މުއިއްޒު ކުރައްވަން ފެއްޓެވި އެންމެ ބޮޑު މަސައްކަތަކީ މީޑިއާތައް ކޮންޓްރޯލް ކުރުން ކަމަށާއި، ނަމަވެސް އެއީ ކުރެވޭނެ ކަމެއް ނޫން ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ހުކުރު ދުވަހު ރާއްޖެޓީވީން ގެނެސްދިން "ދިވެހީންގެ ބިން ދިވެހީންނަށް" ޚާއްސަ ކަވަރޭޖްގައި ވާހަކަދައްކަވަމުން މެންބަރު މައުރޫފް ވިދާޅުވީ، ރައްޔިތުންގެ ހައްގުގައި ކުރެވޭ މަސައްކަތްތައް އާންމުންނާ ހަމައަށް ފޯރުކޮށްދިނުމުގައި އެންމެ މުހިންމު ވަސީލަތަކީ މީޑިއާތައް ކަމަށެވެ. ނަމަވެސް މި ސަރުކާރުން މީޑިއާތަކުގެ ބާރު ކަނޑުވާލައި، ކޮންޓްރޯލް ކުރަން މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
މީގެ އިތުރުން ރަސްމާލެ މަޝްރޫއުގެ ހަގީގަތް ވެސް ސަރުކާރު ކޮންޓްރޯލް ކުރާ މީޑިއާތައް މެދުވެރިކޮށް ރައްޔިތުންނަށް ހަގީގަތް އޮޅުވާލުމަށް މަސައްކަތް ކުރަމުންދާ ކަމަށް މެންބަރު މައުރޫފް ވިދާޅުވި އެވެ.
މެންބަރު މައުރޫފް ވިދާޅުވީ އިދިކޮޅު ފަރާތްތަކުގެ އެންމެ ބޮޑު ޑިމާންޑަކީ އެ މަޝްރޫއު ވަގުތުން ވަގުތަށް ހުއްޓާލުން ކަމަށެވެ. އަދި މި މައްސަލައިގައި ރައްޔިތުންގެ ފެންނަ ނުފެންނަ ވޯޓަކަށް ދާން ގޮވާލަން ޖެހުނީ، މި ކަމުގައި ސަރުކާރުގެ ވަރަށް އިސްވެރިންނާއި ރައީސް މުއިއްޒުގެ ނުފޫޒު އިންތިހާއަށް އޮތުމުން ކަމަށެވެ.
ދިވެހި ބިމަކީ ދިވެހި ރައްޔިތުންގެ އެއްޗެއްކަން ފާހަގަކުރައްވައި މެންބަރު މައުރޫފް ވިދާޅުވީ ބޭރުގެ ފަރާތްތަކަށް 99 އަހަރަށް ބިން ދިގު މުއްދަތަކަށް ދިނުމަކީ ގާނޫނުއަސާސީގެ އިމުން ބޭރުން ކުރެވޭނެ ކަމެއް ނޫން ކަމަށެވެ.
އެހެންކަމުން މިއީ އިގްތިސާދީ އަދި އިޖުތިމާއީ ގޮތުން ބެލިޔަސް ވޯޓަކަށް ދާންޖެހޭ ކަމެއް ނޫން ކަމަށާއި، ވަގުތުން ހުއްޓާލަންޖެހޭ މަޝްރޫއެއް ކަމަށް މެންބަރު މައުރޫފް ވިދާޅުވި އެވެ.
އަޅުގަނޑުގެ ނަޒަރުގައި އެމްޑީޕީ ވެސް ރަނގަޅު އިދިކޮޅު ޕާޓީއެއްގެ ގޮތުގައި ހަގީގަތުގައި މިއަދު ހަރަކާތްތެރިވާ ނަމަ، މި އިދިކޮޅު ދެން ތިބި ޕާޓީތަކާ އެއްކޮށް ގޮސް މިކަން ކޮންމެހެން ފެންނަ ނުފެންނަ ވޯޓަކަށް ނުގޮސް ނިންމާލެވޭނެމައުރޫފް ޒާކިރު
މެންބަރު މައުރޫފް ވިދާޅުވީ، އިދިކޮޅު ސިޔާސީ ޕާޓީތައް ގުޅިގެން ހަރުދަނާ މަސައްކަތްތަކެއް ކޮށްފިނަމަ، މިފަދަ ގާނޫނާ ޚިލާފު ކަންކަން ހުއްޓުވުމަށް ރައްޔިތުންގެ ވޯޓަކަށް ދާންނުޖެހި ވެސް ނަތީޖާ ނެރެވޭނެ ކަމަށެވެ. އަދި މި މަސައްކަތުގައި ދިވެހި ރައްޔިތުން އެއްބާރުލުން ދިނުމަށް މެންބަރު މައުރޫފް ގޮވާލެއްވި އެވެ.
