ޖުމްހޫރީ ވެރިކަމެއް ކުރުމަށް ހަވާލުވެ ރައީސް މުއިއްޒު އަލުން ރާއްޖެ އެ ގެންދަނީ ރަސްކަމުގެ މަގަށް: ފައްޔާޒް
11 ނޮވެމްބަރު 2026 | ބުދަ 13:27ޖުމްހޫރީ ދުވަހާ ގުޅިގެން ކުރީގެ މިނިސްޓަރު ފައްޔާޒް އިސްމާއީލް ވަނީ ރައީސް މުއިއްޒު ގައުމު ހިންގަވަނީ ރަސްކަމެއްގެ އުސޫލުން ކަމަށް ވިދާޅުވެ ފާޑުވިދާޅުވެފައި. ސަރުކާރުން ބާރުތައް މަރުކަޒުކޮށް ކައުންސިލްތަކުގެ ބާރު ކުޑަކުރަމުންދާތީ، އާންމު ރައްޔިތުންނާއި ކައުންސިލްތަކުން ވެސް އަންނަނީ ކަންބޮޑުވުން ފާޅުކުރަމުން
ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް | ސޯޝަލް މީޑިއާ
ޖުމްހޫރީ ވެރިކަމެއް ކުރެއްވުމަށް ހަވާލުވެވަޑައިގެން ރައީސް ޑރޒ މުހައްމަދު މުއިއްޒު އަލުން ރާއްޖެ އެ ގެންދަވަނީ ރަސްކަމުގެ މަގަށް ކަމަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެ އެވެ.
ބުދަ ދުވަހު "އެކްސް" ގައި ކުރެއްވި ޕޯސްޓެއްގައި ފައްޔާޒް ވިދާޅުވީ ރައްޔިތުން އިންތިހާބުކުރާ ވެރިންނަކީ ރަސްކަން ކުރާ ބައެއްގެ ބަދަލުގައި ދިވެހި ޖުމްހޫރިއްޔާގެ ހިޔަލުގައި ތިބި ހުރިހާ ދިވެހިންނަށް ޚާދިމަކަށް ވާން ޖެހޭ ކަމަށެވެ.
އެގޮތުން، މިއަދު ޖުމްހޫރީ ދުވަސް ފާހަގަކުރަމުން މިދަނީ ރައްޔިތުންނަށްޓަކައި ރައްޔިތުން އެދޭ ގޮތަށް ހިންގާ ސަރުކާރެއް މި ގައުމުގައި ނެތް ދަނޑިވަޅެއްގައި ކަމަށް ފައްޔާޒް ވިދާޅުވި އެވެ. އަދި ޖުމްހޫރީ ވެރިކަމެއް ކުރުމަށް ހަވާލުވެވަޑައިގެން ރައީސް މުއިއްޒު އަލުން ރާއްޖެ އެ ގެންދަވަނީ ރަސްކަމުގެ މަގަށް ކަމަށް ވެސް ފައްޔާޒް ވިދާޅުވި އެވެ.
ފައްޔާޒް މިފަދައިން ވިދާޅުވެފައިވާއިރު ގިނަ އަދަދެއްގެ އާންމު ރައްޔިތުން ވެސް އަންނަނީ ރައީސް މުއިއްޒު އަތްޕުޅަށް ބާރުތައް ނަގަމުންދާތީ އެކަމާއި ކަންބޮޑުވުން ފާޅުކުރަމުންނެވެ. އެގޮތުން ލާމަރުކަޒީ ނިޒާމުގެ ގާނޫނުގެ ދަށުން ކައުންސިލަށް ލިބިދީފައިވާ ބާރުތައް ހަނިކޮށް ގާނޫނުނަށް ބަދަލުތައް ގެންނަމުންދާތީ ކައުންސިލްތަކުން ވެސް އަންނަނީ ކަންބޮޑުވުން ފާޅުކުރަމުންނެވެ.
