އެހެން ދީންތަކުގެ މީހުން ވަޒަންވެރިވާނެ މަގު ފަހިނުކުރުމަށް ޑރ. އިޔާޒު އިލްތިމާސްކުރައްވައިފި
12 ނޮވެމްބަރު 2026 | ބުރާސްފަތި 05:12ރަސްމާލެ މަޝްރޫއުގެ ދަށުން ބޭރުގެ ފަރާތްތަކަށް ރާއްޖޭގައި ވަޒަންވެރިވެވޭނެ މަގު ފަހިވުމަކީ ދީނީ އަދި ގައުމީ ގޮތުން އޮތް ނުރައްކަލެއް ކަމަށް ބުނެ، އެކަން އެގޮތަށް ނުކުރެއްވުމަށް ޑރ.އިޔާޒު ވަނީ ރައީސް އަށް އިލްތިމާސް ކުރައްވާފައި. މި މަޝްރޫއާ ގުޅިގެން ދީނީ އިލްމުވެރިންނާއި އާންމުންގެ ކަންބޮޑުވުންތައް ހުރި ނަމަވެސް، މި މައްސަލައިގައި ރައްޔިތުންގެ ފެންނަ ނުފެންނަ ވޯޓަކަށް ދިއުމަށް ރައީސް މުއިއްޒު ވަނީ ދެކޮޅު ހައްދަވާފައި
މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުލްލަތީފް ޚުތުބާ ވިދާޅުވަނީ- ފައިލް ފޮޓޯ | ފޭސްބުކް
ސައްތައިން ސައްތަ މުސްލިމް ގައުމެއްގައި އެހެން ދީންތަކުގެ މީހުން ވަޒަންވެރިވާނެ މަގެއް ހުޅުވިގެން ދިޔުމަކީ އިންތިހާއަށް ނުރައްކާތެރި ކަމެއް ކަމަށް ވިދާޅުވެ، އެފަދަ ކަމެއް ނުކުރެއްވުމަށް މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުލްލަތީފް، ރައީސް ޑރ. މުހައްމަދު މުއިއްޒު އަށް އިލްތިމާސް ކުރައްވައިފި އެވެ.
ޑރ. އިޔާޒު މިކަމަށް އިލްތިމާސް ކުރެއްވީ ބުރާސްފަތި ދުވަހު އެކްސްގައި ކުރެއްވި ޕޯސްޓެއްގަ އެވެ.
އެ ޕޯސްޓުގައި ޑރ. އިޔާޒު ވިދާޅުވީ، ދިވެހިރާއްޖެ ފަދަ ސައްތައިން ސައްތަ މުސްލިމް ގައުމެއްގައި އެހެން ދީންތަކުގެ މީހުންނަށް ވަޒަންވެރިވެވޭނެ ފުރުސަތު ފަހިވެގެން ދިޔުމަކީ އިންތިހާއަށް ނުރައްކާތެރި ކަމެއް ކަމަށެވެ. އަދި ރައީސް މުއިއްޒު ޓެގުކުރައްވައި އޭނާ ވަނީ، އެފަދަ ކަމެއް ނުކުރެއްވުމަށް އެދިވަޑައިގެން ރައީސްއަށް އިލްތިމާސް ކުރައްވާފަ އެވެ.
ޑރ. އިޔާޒަކީ ގައުމީ އަދި ދީނީ މިފަދަ މުހިންމު މައްސަލަތަކުގައި އަބަދުވެސް ކެރިގެން ބަސްބުނުއްވާ، އަދި ޔަހޫދީންނާ ދެކޮޅަށް ފާޅުގައި އަޑުއުފުއްލަވައި ފަލަސްތީނުގެ ހައްގުގައި ވަކާލާތު ކުރައްވަމުން ގެންދަވާ ބޭފުޅެކެވެ.
ރަސްމާލެ މަޝްރޫއާ ގުޅިގެން، ޑރ. އިޔާޒުގެ އިތުރުން ރާއްޖޭގެ މަޝްހޫރު އެހެން ދީނީ އިލްމުވެރިންނާއި އަދާލަތު ޕާޓީން ވެސް ވަނީ ރަސްމާލެ މަޝްރޫއާ ދެކޮޅަށް އަޑުއުފުލައި، އެކަމާ ދެކޮޅު ހަދާފަ އެވެ.
ރަސްމާލެ މަޝްރޫއުގެ ދަށުން ބޮޑު ސަރަހައްދެއް 99 އަހަރަށް ދާއިމީކޮށް ދޭ ކަމަށް ބުނާ މައްސަލައާ ގުޅިގެން ގިނަ ރައްޔިތުންގެ ކަންބޮޑުވުންތައް ހުރި ނަމަވެސް، މި މައްސަލައިގައި ރައްޔިތުންގެ ފެންނަ ނުފެންނަ ވޯޓެއް ނެގުމަށް ރައީސް މުއިއްޒު ވަނީ ދެކޮޅު ހައްދަވާފަ އެވެ. އަދި މި މަޝްރޫއަކީ ރާއްޖޭގެ ތެރޭގައި ދެވަނަ ދައުލަތެއް އުފެއްދުމަށް ކުރާ ކަމެއް ކަމަށް ބުނެ ގިނަ ބަޔަކު ދަނީ ތުހުމަތު ކުރަމުންނެވެ.
