ރައީސް މުއިއްޒުގެ މައްޗަށް ބޭރުގެ ނުފޫޒު އެބައޮތް، މިސްރާބު ހުރީ ނިޒާމު ފުނޑާލަން: ޕާޕާ
13 ނޮވެމްބަރު 2026 | ހުކުރު 06:56ރައީސް މުއިއްޒުގެ މައްޗަށް ބޭރުގެ ނުފޫޒު އޮތް ކަމަށާއި، ގައުމުގެ ކަންކަން ހިނގަނީ އީގަލް ހިލްސް ފަދަ ކުންފުނިތަކުގެ ބާރުގެ ދަށުން ކަމަށް ޕާޕާ ވިދާޅުވި. އަދި ސަރުކާރުން ރައްޔިތުންގެ ކެތްތެރިކަން ޓެސްޓުކުރަމުންދާ ކަމަށާއި، މިހާރު ހިނގާ ކަންކަމަކީ ގައުމީ ނިޒާމު ފުނޑާލުމަށް ރޭވިގެން ހިންގާ ކަންތައްތަކެއް ކަމަށް އޭނާ ވިދާޅުވި
ރާއްޖެޓީވީން ގެނެސްދިން "ދިވެހީންގެ ބިން ދިވެހީންނަށް" ޚާއްސަ ކަވަރޭޖުގައި އެމްއެންޑީއެފް މާލޭ އޭރިއާގެ ކުރީގެ ކޮމާންޑަރު ކެޕްޓަން އަހްމަދު ފަޔާޒް (ޕާޕާ) ވާހަކަ ދައްކަވަނީ | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ މައްޗަށް ބޭރުގެ ބޮޑެތި ނުފޫޒުތަކެއް އެބައޮތް ކަމަށާއި، މިއަދު ސަރުކާރު ހިންގުމުގައި އެމަނިކުފާނުގެ ބާރެއް ނެތް ކަމަށް އެމްއެންޑީއެފް މާލޭ އޭރިއާގެ ކުރީގެ ކޮމާންޑަރު ކެޕްޓަން ރިޓަޔާޑް އަހުމަދު ފަޔާޒު (ޕާޕާ) ވިދާޅުވެއްޖެ އެވެ.
ރާއްޖެޓީވީން ގެނެސްދިން "ދިވެހީންގެ ބިން ދިވެހީންނަށް" ޚާއްސަ ކަވަރޭޖުގައި ވާހަކަދައްކަވަމުން ޕާޕާ ވިދާޅުވީ، ރައީސް މުއިއްޒު ހުންނެވީ ވަރަށް ބޮޑަށް ފައިސާގެ ނުފޫޒުގައި ޖެހިވަޑައިގެން ނުވަތަ މަޖުބޫރީ ހާލަތެއްގެ ތެރޭގައި ކަމަށް ފެނިވަޑައިގަންނަވާ ކަމަށެވެ. އަދި މިހާރު ގައުމުގެ ކަންކަން ހިނގަމުންދަނީ އީގަލް ހިލްސް އާއި ހެންލީ ފަދަ ބޭރުގެ ފަރާތްތަކުގެ ލަފަޔާއި ބާރުގެ ދަށުން ކަމަށް އޭނާ ވިދާޅުވި އެވެ.
އަޅުގަނޑު މިއަދު ކަންތައްތައް ހުރި ގޮތުން އަޅުގަނޑަށް މި ފޯސީކުރެވެނީ ރައީސުލްޖުމްހޫރިއްޔާގެ ބާރެއް ނެތް މިއަދު. މިއަދު މުޅި ނިޒާމުން މި އޮޕަރޭޓުކުރަނީ ބޭރުގެ ނުފޫޒު. މި މީހުން ދުނިޔޭގެ އެހެން ގައުމުތަކުގައި މިކަން ކުރާ ގޮތަށް ޓެރަރައިޒްކޮށްގެން، ބިރުދައްކައިގެން، ގްރޫޕުތަކަށް ފައިސާ ދީގެން ނެރެގެން މިކަން ކުރާ ނިޒާމު މަޑުމަޑުން މި އަންނަނީ ފެންނަންއަހުމަދު ފަޔާޒު (ޕާޕާ)
މީގެއިތުރުން ޕާޕާ ވިދާޅުވީ، ސަރުކާރުން މިހާރު މަސައްކަތް ކުރަމުން ދަނީ ރައްޔިތުން ކަންކަމުގައި އިހުތިޖާޖުކޮށް ނުކުންނަ މިންވަރު ބެލުމަށް "ޓެސްޓުކުރުމުގެ" އުސޫލުން ކަމަށެވެ.
އެގޮތުން ދުންފަތުގެ އިސްތިއުމާލުކުރުމާއި ސިނގިރޭޓުގެ މައްސަލައިގައި ފިޔަވަޅު އަޅައިގެން ރައްޔިތުންގެ އަމަލުތައް ހުރިގޮތް ބެލި ކަމަށާއި، އޭގެ ފަހުން ޑޮލަރުގެ މައްސަލައިގައި ވެސް ކަންކަން ކުރަމުން ދަނީ ގަސްތުގައި ރައްޔިތުންގެ ރިއެކްޝަން ބެލުމަށް ކަމަށް އޭނާ ވިދާޅުވި އެވެ. ކުރީގެ ސަރުކާރުތަކަށް ވުރެ ދެގުނައަށް މިހާރު ގައުމަށް ޑޮލަރު ވަންނަމުންދާއިރު ވެސް މި ހާލަތަށް ކަންކަން ދިއުމަކީ ރޭވިގެން ހިނގާ ކަމެއް ކަމަށް އޭނާ ވިދާޅުވި އެވެ.
ޕާޕާ ވިދާޅުވީ މިއީ ވަރަށް ދުރު ރާސްތާއަކަށް ރާވައިގެން، ގަސްތުގައި މި ގައުމުގެ ޝަޚްސިއްޔަތާއި ގައުމީ ނިޒާމު ފުނޑާލުމަށްޓަކައި ހިންގަމުންދާ ކަންތައްތަކެއް ކަމަށެވެ. އަދި މިފަދަ ކަންކަން ހިނގަމުންދާއިރު އިލްމުވެރިންނާއި އެހެނިހެން ފަރާތްތައް ވެސް އެއްވެސް ބަހެއް ނުބުނެ ހަނު ތިބޭ ކަމަށް ވިދާޅުވެ އޭނާ ކަންބޮޑުވުން ފާޅުކުރެއްވި އެވެ.
