ތިނަދޫ ސިޓީގެ މޭޔަރުގެ މައްޗަށް އުފުލާފައިވަނީ ސިޔާސީ ދައުވާތަކެއްކަމަށް ބުނެ، ދައުވާތައް އަނބުރާ ގެންދިއުމަށް އެމްޑީޕީން ގޮވާލައިފި
12 ނޮވެމްބަރު 2026 | ބުރާސްފަތި 07:55ތިނަދޫ ސިޓީގެ މޭޔަރު ސައުދު އަލީގެ މައްޗަށް އުފުލާފައިވާ ދައުވާތަކަކީ ސިޔާސީ ނުފޫޒުން އުފުލާފައިވާ އަސާސެއް ނެތް ދައުވާތަކެއް ކަމަށް ބުނެ އެމްޑީޕީން އެކަން ކުށްވެރިކޮށްފި. ކައުންސިލްގެ ނިންމުމަކަށް މޭޔަރު ޒިންމާކުރުވައި ޝަރީއަތް އަވަސްކުރަނީ މަގާމުން ވަކިކުރުމުގެ ނިޔަތުގައި ކަމަށް ތުހުމަތުކޮށް، އެ ދައުވާތައް އަނބުރާ ގެންދިއުމަށް އެ ޕާޓީން ވަނީ ގޮވާލާފައި
ގދ. ތިނަދޫއަށް ސިޓީއެއްގެ ދަރަޖަ ހޯދުމަށްޓަކައި އެ ރަށުގެ އާބާދީއާ ގުޅޭގޮތުން ސައްހަ ނޫން މައުލޫމާތު ދައުލަތުގެ އިދާރާތަކަށް ހުށަހެޅިކަމަށް ތުހުމަތުކޮށް، އެ ސިޓީގެ މޭޔަރު ސައުދު އަލީގެ މައްޗަށް އުފުލާފައިވާ ދައުވާގެ އަޑުއެހުމެއް | ރާއްޖެ އެމްވީ
ތިނަދޫ ސިޓީގެ މޭޔަރު ސައުދު އަލީގެ މައްޗަށް ދައުލަތުން އުފުލާފައިވާ ދައުވާތަކަކީ އެއްވެސް އަސާސެއް ނެތް، ސިޔާސީ ނިޔަތެއްގައި އުފުލާފައިވާ ދައުވާތަކެއް ކަމަށް ބުނެ އެ ދައުވާތައް އަނބުރާ ގެންދިއުމަށް އިދިކޮޅު މައި ޕާޓީ، ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ގޮވާލައިފި އެވެ.
އެމްޑީޕީން ނެރުނު ބަޔާނެއްގައި ބުނެފައިވަނީ މޭޔަރު ސައުދުގެ މައްޗަށް ކުރަނީ ސިޔާސީ ބޭނުމެއްގައި ކުރާ ދައުވާތަކެއް ކަމަށެވެ.
ސައުދު އަލީގެ މައްޗަށް ޤާނޫނުލްޢުޤޫބާތުގެ ދަށުން ދައުލަތުން އުފުލާފައިވަނީ އެނގިހުރެ ސައްހަނޫން ލިޔުމެއް ދިނުމުގެ ދައުވާއާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އެވެ.
އެމްޑީޕީން ބުނި ގޮތުގައި މި ދައުވާތައް ބިނާކޮށްފައިވަނީ ތިނަދޫ ކައުންސިލުން ނިންމި ނިންމުމަކާ ގުޅިގެންނެވެ. ކައުންސިލްގެ ނިންމުމަކަށް މޭޔަރު ފަރުދީގޮތުން ޒިންމާވާންޖެހުމަކީ ނުވަތަ އޭނާގެ މައްޗަށް ޖިނާއީ ދައުވާކުރުމަކީ ޤާނޫނުއަސާސީއާއި ޤާނޫނީ އާއްމު ހަމަތަކާ މުޅިން ހިލާފު ކަމެއް ކަމަށް އެ ޕާޓީން ފާހަގަކުރެ އެވެ.
މި މައްސަލައިގައި ދައުލަތުން އެކަށީގެންވާ މިންވަރަށް ހެކި ހުށަހަޅާފައި ނުވަނީ، ހަގީގަތުގައި ވެސް އެ ފަދަ ޖިނާއީ ކުށެއް ސައުދު އަލީ ކޮށްފައި ނުވާތީ ކަމަށް އެމްޑީޕީގެ ބަޔާނުގައިވެ އެވެ. އަދި މި މައްސަލައިގައި ފުލުހުންނާއި ޕްރޮސިކިއުޓަރ ޖެނެރަލްގެ އޮފީހުން އަމަލުކޮށްފައިވަނީ އެހެން މައްސަލަތަކާ ހިލާފަށް، އާދަޔާ ހިލާފު ބާރުމިނެއްގައިކަން އެ ޕާޓީން ފާހަގަކުރެ އެވެ.
މީގެ އިތުރުން، ކްރިމިނަލް ކޯޓުންވެސް މި މައްސަލަ ކުރިއަށްގެންދަނީ އެހެން ގަޟިއްޔާތަކާ ހިލާފަށް ވީ އެންމެ އަވަހަކަށް ހުކުމް ކުރުމުގެ އަމާޒެއްގައި ކަމަށް އެމްޑީޕީން ތުހުމަތުކުރެ އެވެ.
އެމްޑީޕީން ބުނި ގޮތުގައި މި ދައުވާތައް ހުށަހަޅާފައިވަނީ ސަރުކާރު ހިންގާ ޕީއެންސީއަށް ނިސްބަތްވާ ތިނަދޫ އުތުރު ދާއިރާގެ މެންބަރު ސަޢުދުﷲ ޙިލްމީ، ސައުދު އަލީއަށް އިންޒާރު ދެއްވިތާ ކުޑަދުވަސްކޮޅެއްގެ ތެރޭގަ އެވެ. ސައުދު އަލީ އަލުން މޭޔަރުކަމަށް އިންތިހާބުވިޔަސް މަގާމު ގެއްލުވާލައި ޖަލަށްލާނެ ކަމަށް ބުނެ ސައުދުﷲ ހިލްމީ އާއްމު ތަނެއްގައި އިންޒާރު ދެއްވާފައިވާ ކަމަށް އެމްޑީޕީން ބުނެ އެވެ.
މި ކަމަކީ ރައްޔިތުން އިންތިހާބުކޮށްފައިވާ މޭޔަރުގެ މަގާމު ގެއްލުވާލުމަށް ހިންގާ އަމަލެއް ކަމަށާއި، މިއީ ޤާނޫނުއަސާސީގެ 26 ވަނަ މާއްދާއިން ރައްޔިތުންނަށް ލިބިދީފައިވާ ހައްގުތަކާ ހިލާފު ކަމެއް ކަމަށް އެމްޑީޕީން ބުނެ އެވެ. ރައީސް ޑރ. މުހައްމަދު މުއިއްޒުގެ ސަރުކާރުން އަންގައިގެން އެމްޑީޕީގެ ހަރަކާތްތެރިންނާއި އިންތިހާބީ މަގާމުތަކުގައި ތިއްބެވި ބޭފުޅުންނަށް ކުރާ ސިޔާސީ ދައުވާތައް ކުށްވެރިކުރާ ކަމަށާއި، މިފަދަ ބިރުދެއްކުންތަކުން އެ ޕާޓީގެ މެންބަރުން ފަސްނުޖެހޭނެ ކަމަށް ވެސް އެމްޑީޕީގެ ބަޔާނުގައި ބުނެފައިވެ އެވެ.
