ރަސްމާލެ މަޝްރޫއާ ދެކޮޅަށް މާލޭގެ މަގުތަކުގައި ދަމާފައިވާ ބެނާތައް ކަނޑަމުން ދިޔަ ދެ މީހުން ފުލުހުންގެ ބެލުމުގެ ދަށަށް!
13 ނޮވެމްބަރު 2026 | ހުކުރު 05:56ރަސްމާލެ މަޝްރޫއާ ދެކޮޅަށް މާލޭގައި ދަމާފައި ހުރި ބެނާތައް ކަނޑައި ގެއްލުންދިން ދެ މީހަކު އާންމުންގެ އެހީތެރިކަމާއެކު ފުލުހުންގެ ބެލުމުގެ ދަށަށް ވަނީ ގެންގޮސްފައި. މި އަމަލަކީ ސަރުކާރުގެ ނުފޫޒުން ހިންގާފައިވާ ކަމެއް ކަމަށް ތުހުމަތުކޮށް ގިނަ ބަޔަކު ކަންބޮޑުވުން ފާޅުކުރަމުންދާއިރު، މި މަޝްރޫއާ ދެކޮޅަށް ބާއްވާ ބޮޑު މުޒާހަރާ ހުކުރު ދުވަހުގެ ރޭ އާޓިފިޝަލް ބީޗުގައި ބޭއްވުމަށް ވަނީ ރޭވިފައި
ރަސްމާލެ މަޝްރޫއާ ދެކޮޅަށް މާލޭގެ މަގުތަކުގައި ދަމާފައިވާ ބެނާތައް ކަނޑަމުން ދިޔަ ދެ މީހުން ފުލުހުންގެ ބެލުމުގެ ދަށަށް ގެންދަނީ | ރާއްޖެއެމްވީ
ރަސްމާލެއިން ބޭރު މީހުންނަށް ދާއިމީކޮށް ބިން ދިނުމަށް ސަރުކާރުން ކުރަމުންދާ މަސައްކަތްތަކާ ދެކޮޅަށް މާލޭގެ މަގުތަކުގައި ދަމާފައިވާ ބެނާތައް ކަނޑަމުން ދިޔަ ދެ މީހުން ފުލުހުންގެ ބެލުމުގެ ދަށަށް ގެންގޮސްފި އެވެ.
ދެ ފިރިހެނުން ފުލުހުންގެ ބެލުމުގެ ދަށަށް ގެންދިޔައީ އާއްމު ރައްޔިތުންގެ އެހީތެރިކަމާއެކު ބުރާސްފަތި ދުވަހުގެރޭގެ ވަގުތެއްގަ އެވެ.
ރާއްޖެއެމްވީއަށް، މަންޒަރު ދުށް ފަރާތްތަކުން ބުނީ ރަސްމާލެ މަޝްރޫއާ ދެކޮޅު ހެދުމުގެ ގޮތުން މާލޭގެ އެކި މަގުތަކުގައި ހަރުކޮށްފައިހުރި ބެނާތަކަށް އެކިވަރުގެ ގެއްލުން ދީފައިވާ ކަމަށެވެ. އަދި ބުރާސްފަތި ދުވަހުގެ ރޭ އިރާކޮޅު ވެސް ގެއްލުން ދެމުން ދިޔަ ނަމަވެސް ފުލުހުން ބަލަހައްޓައިގެން ތިބި ކަމަށާއި، އެމީހުން ހައްޔަރު ކުރުމަށް މަސައްކަތް ވެސް ނުކުރާ ކަމަށެވެ.
އޭގެފަހުން ބުރާސްފަތި ދުވަހުގެ ރޭ މެންދަމު ވަގުތު ދެ މީހަކު ދިގު ދަނޑިއެއްގައި ތޫނު އެއްޗެއް ހަރުކޮށްގެން ބެނާތައް ކަނޑަމުން ދަނިކޮށް އާއްމުންގެ ބަޔަކު ފަހަތުން ގޮސް އެމީހުން އަތުލައިގަތީ ކަމަށާއި، އޭގެފަހުން ފުލުހުން އައިސް އެ މީހުންގެ ފުލުހުންގެ ކާރަށް އަރުވައިގެން ގެންދިޔައީ ކަމަށް މަންޒަރު ދުށް މީހުން ބުނެ އެވެ.
ސޯޝަލް މީޑިއާގައި އާއްމުވެފައިވާ ވީޑިއޯތަކުން ބެނާތައް ކަނޑަން ގެންގުޅުނު ދަނޑި ވެސް ފުލުހުންގެ ބެލުމުގެ ދަށަށް ގެންދާ މަންޒަރު ފެނެ އެވެ. އަދި އެވަގުތު އެތަނަށް އެއްވެ ތިބި އާއްމު ރައްޔިތުން ވަނީ ސަރުކާރަށް ބޮޑެތި ތުހުމަތުތަކެއް ވެސް ކޮށްފަ އެވެ.
އެ ދެ ފިރިހެނުންނަކީ މިސަރުކާރުގެ ޕާޓީ، ޕީއެންސީއަށް ނިސްބަތްވާ ދެ މީހުން ކަމަށާއި، އެމީހުން އެ މަސައްކަތް ކުރީ ސަރުކާރުން ފައިސާ ދީގެން ކަމަށް ތުހުމަތު ކޮށްފައިވެ އެވެ.
މީގެ އިތުރުން މިމައްސަލައާ ގުޅިގެން ގައުމީ ހަރަކާތުގައި އިސްކޮށް އުޅުއްވާ ގިނަ ބޭފުޅުން ކަންބޮޑުވުން ފާޅުކޮށްފައިވެ އެވެ. އަދި މިމައްސަލަ ބަލައި، ފިޔަވަޅު އެޅުމަށް ވެސް ގޮވާލާފަ އެވެ.
ފާޑު ކިޔާ ފަރާތްތަކުން ބުނީ، ބެނާތައް ކެނޑުމުން އެކަނި ވެސް މިކަމަށް ސަރުކާރުގެ ނުފޫޒު އޮތް މިންވަރު ހާމަވާ ކަމަށާއި، މިމަޝްރޫއަށް ގިނަ ރައްޔިތުން ތާއީދު ނެތްކަން ސަރުކާރަށް އެނގޭތީ ރައްޔިތުންނަށް އެކި ގޮތްގޮތުން ފިއްތުންތައް ކުރިމަތި ކުރުވުމަށް މަސައްކަތް ކުރާ ކަމަށެވެ. އަދި ބެނާތައް ކަނޑައި، ގެއްލުން ދިން ނަމަވެސް އަލުން ބެނާތައް ދަމައި، މި މަޝްރޫއާ ގުޅިގެން ގައުމާ ރައްޔިތުންނަށް ލިބޭނެ ގެއްލުންތައް ހާމަކުރާނެ ކަމަށެވެ.
މި މައްސަލައާ ގުޅޭގޮތުން ފުލުހުންގެ ބަހެއް ވަނީ ލިބޭ ގޮތް ނުވެފަ އެވެ.
ރަސްމާލެ މަޝްރޫއުގެ ބޮޑު ސަރަހައްދެއް އީގަލް ހިލްސްއަށް ދާއިމާކޮށް ދޭ މައްސަލައާ ދެކޮޅަށް ގައުމީ ހަރަކާތުން އިސްވެ އޮވެ ބާއްވާ ބޮޑު މުޒާހަރާ ހުކުރު ދުވަހުގެ ރޭ 8:30 ގައި އާޓިފިޝަލް ބީޗުގައި އޮންނާނެ އެވެ.
