ނިއުމަތްތައް ދެމިއޮތުމާއި ނެތިދިއުން ބިނާވެފައިވަނީ ޝުކުރުވެރިވުމުގެ މައްޗަށް، ޝުކުރުވެރިވާ މީހުންނަށް ނިއުމަތްތައް އިތުރުކޮށްދެއްވާނެ: ޚުތުބާ
13 ނޮވެމްބަރު 2026 | ހުކުރު 08:32ނިއުމަތްތަކަށް ޝުކުރުވެރިވުމަކީ އެކަލާނގެ ރުހިވޮޑިގަންނަވާ ގޮތުގައި އެ ނިއުމަތްތައް ބޭނުންކުރުން ކަމަށާއި، މީސްތަކުން ކޮށްދޭ ހެޔޮކަންކަމަށް ޝުކުރު އަދާކުރުމަކީ އިސްލާމީ ތަރުބިޔަތުގެ މުހިންމު ބައެއްކަން ޚުތުބާގައި ފާހަގަކޮށްފައިވޭ. މީގެ އިތުރުން އިސްރާފުކުރުމާއި ބޮޑާވުމުން ދުރުހެލިވެ، ހިތާއި ދުލާއި ގުނަވަންތަކުން ޝުކުރުވެރިވުމަށް ޚުތުބާގައި ވަނީ ނަސޭހަތްތެރިވެފައި
ހުކުރު ނަމާދު ކުރުމަށް މިސްކިތުގައި ޖަމާއަތް ހަދައިގެން. ފައިލް ފޮޓޯ | އިސްލާމިކް މިނިސްޓްރީ
ނިއުމަތްތައް ދެމިއޮތުމާއި ނެތިދިއުން ބިނާވެފައިވަނީ ޝުކުރުވެރިވުމުގެ މައްޗަށް ކަމަށާއި، ޝުކުރުވެރިވާ މީހުންނަށް ނިއުމަތްތައް އިތުރުކޮށްދެއްވާނެ ކަމަށް ހުކުރު ޚުތުބާގައި ބުނެފި އެވެ.
"ނިއުމަތްތަކަށް ޝުކުރުވެރިވުމުގެ މުހިންމުކަން" މި މައުޟޫއަށް ރާއްޖޭގެ އެކިކަންކޮޅުތަކުގައި އިއްވި ޚުތުބާގައި ބުނީ، ދިރިއުޅުމުގައި ޝުކުރުވެރިވުން ދެމެހެއްޓޭނީ، ދުންޔަވީ ކަންކަމުގައި ތިބާއަށް ވުރެ ދަށުގައި ތިބި މީހުންނަށް ބަލައި، ތިބާއަށް މާތް ﷲ ދެއްވި ނިއުމަތްތަކުގެ މަތިވެރިކަން ވަޒަންކޮށްގެން ކަމަށާއި، މީސްތަކުން ކޮށްދޭ ހެޔޮކަންކަމަށް ޝުކުރުވެރިވެވިގެން ކަމަށެވެ.
ހަމައެހެންމެ، އިސްރާފުކުރުމާއި ބޮޑާވުމާ ދުރުހެލިވެ، ނިއުމަތްތަކަށް ރައްކާތެރިވާން ޖެހޭ ކަމަށާއި، ޚާލިގުވަންތަ ރަސްކަލާނގެ ރުހިވޮޑިގަންނަވާ ކަންކަމުގައި އެ ނިއުމަތްތައް ހޭދަ ކުރަން ޖެހޭ ކަމަށް ޚުތުބާގައި ބުނެފައިވެ އެވެ. އަދި ނިއުމަތްތަކަށް ޝުކުރުވެރިވުން ފުރިހަމަވަނީ، އިންސާނާގެ ހިތާއި ދުލާއި ގުނަވަންތައް އެ ކަމުގައި ޝާމިލުކުރުމުން ކަމަށް ޚުތުބާގައި ފާހަގަކޮށްފައިވެ އެވެ.
މީގެ އިތުރުން ޚުތުބާގައި ބުނީ، މާތް ﷲގެ ނިއުމަތްތަކަށް ޝުކުރުވެރިވުމަކީ އެކަލާނގެ ފަޟްލުވަންތަކަމަށް އިއުތިރާފުވެ، އެ ނިއުމަތްތައް އެކަލާނގެ ރުހިވޮޑިގަންނަވާ ގޮތުގައި ބޭނުންކުރުން ކަމަށާއި، މުޖުތަމައުގެ އެއްބައިވަންތަކަމާއި ލޯބި ދެމެހެއްޓުމަށްޓަކައި އިސްލާމްދީން ދަސްކޮށްދޭ އެންމެ މުހިންމު އެއް ސިފައަކީ ނިއުމަތްތަކަށް ޝުކުރުވެރިވުން ކަމަށެވެ.
މިއީ އަޅާގެ ދީނާއި ދުނިޔެއަށް ހެޔޮކަން ގެނެސްދޭ އަދި ﷲގެ ލޯތްބާއި ރުހިވޮޑިގަތުން ލިބޭ މަތިވެރި އަޅުކަމެއް ކަމަށާއި، ޝުކުރުވެރިވުމަކީ ނަބީބޭކަލުންގެ ވެސް މަތިވެރި ސިފަފުޅެއްކަން އިބްރާހީމްގެފާނާއި، ސުލައިމާންގެފާނު އަދި މޫސާގެފާނުގެ ހަޔާތްޕުޅުން ދަލީލުދައްކައި ޚުތުބާގައި ފާހަގަކޮށްފައިވެ އެވެ.
ނިއުމަތްތައް ދެމިއޮތުމާއި ނެތިދިއުން ބިނާވެފައިވަނީ ޝުކުރުވެރިވުމުގެ މައްޗަށްކަން ފާހަގަކޮށް ޚުތުބާގައި ބުނީ، ޝުކުރުވެރިވާ މީހުންނަށް ނިއުމަތްތައް އިތުރުކޮށް ދެއްވާނެ ކަމަށެވެ.
ޝުކުރުވެރިވާ މީހުންނަށް ނިއުމަތްތައްއިތުރުކޮށްދެއްވާނޭކަމާއި ނިއުމަތްތަކަށް ފުރަގަސްދިން ބަޔަކަށް ގަދަފަދަ އަދާބުދެއްވާނޭކަން ބަޔާންކުރައްވައި މާތް ﷲ ވަޙީކުރައްވައިފައި ވެ އެވެ. ﴿ وَإِذْ نَاذَكَ ﴾رَبُّكُمْ لَمِن شَكَرَتْهُ لَا رَيْدَنَكُمْ ۖ وَلَمَنِ كَفَرَتُمْ إِنَّ عَذَابِ لَشَيْدِيدٌ ﴾ 14 މާނައީ: "އަދިތިޔަބައިމީހުންގެ ވެރި ރަސްކަލާނގެ އެންގެވި ހިނދު ހަނދުމަކުރާށެވެ! ހަމަކަށަވަރުން،ތިޔަބައިމީހުން شكرކޮށްފި ނަމަ، ހަމަކަށަވަރުން، ތިމަން ރަސްކަލާނގެތިޔަބައިމީހުންނަށް އިތުރުކޮށްދެއްވާހުށީމެވެ. އަދި ތިޔަބައިމީހުން (شكرނުކޮށް)كافر ވެއްޖެ ނަމަ (ދަންނާށެވެ!) ހަމަކަށަވަރުން، ތިމަން ރަސްކަލާނގެ عذابގަދަފަދަވެގެންވާކަން ކަށަވަރެވެ.ހުކުރު ޚުތުބާ
ޚުތުބާގައި ބުނީ، މާތް ﷲއަށް ޝުކުރުވެރިވުމުގެ އިތުރުން، އިންސާނުންގެ ހެޔޮ ފޯރުވުންތަކަށް ޝުކުރު އަދާކުރުމަކީ ވެސް އިސްލާމީ ތަރުބިޔަތުގައި ނުހަނު ބޮޑު އަހުމިއްޔަތުކަމެއް ދީފައިވާ ކަމެއް ކަމަށެވެ. ޚާއްސަކޮށް މައިންބަފައިންނަށް ޝުކުރުވެރިވުމަށް އަމުރުކުރައްވާފައިވާ ކަމާއި، މީސްތަކުންނަށް ޝުކުރުވެރިނުވާ މީހާ މާތް ﷲއަށް ޝުކުރުވެރިނުވާކަން ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ ޙަދީޘްފުޅުން ހާމަވާ ކަމަށެވެ. އަދި މީހަކު ކޮށްދޭ ހެޔޮކަމަކަށް "ޖަޒާކަﷲ ޚައިރަން" ބުނުމަކީ ޝުކުރުވެރިވުމުގެ އެންމެ މަތީ ދަރަޖައަށް ވާޞިލުވުން ކަމުގައި ވެސް ފާހަގަކޮށްފައިވެ އެވެ.
