މުސްލިމުން އިސްލާމް ދީނާ ދުރުހެލިވެއްޖެނަމަ ނިކަމެތިވެ، ދުޝްމަނުންގެ ބާރު ފޯރާ: ޚުތުބާ

އިސްލާމްދީނަކީ މާތްﷲ އިންސާނިއްޔަތަށް މިންވަރުކުރެއްވި އެންމެ މަތިވެރި ނިއުމަތް ކަމަށާއި، ކޮންމެ ފަދަ ހާލަތެއްގައި ވެސް ދީނުގައި ސާބިތުވެ ތިބުމަށް މިއަދުގެ ހުކުރު ޚުތުބާގައި ގޮވާލައިފި އެވެ.

"އިސްލާމްދީނުގެ މަތިވެރި ނިއުމަތް" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ،  ދެ ދުނިޔޭގެ ބާއްޖަވެރިކަމާއި ކާމިޔާބީ ގުޅިފައިވަނީ އިސްލާމްދީނުގެ މަތިވެރި އުސޫލުތަކާ ކަމަށާއި، މިއީ ހުރިހާ ހެޔޮ ކަމަކަށް މަގުދައްކައި، އެންމެހައި މުންކަރާތްތަކުން ދުރުހެލިވުމަށް އަމުރުކުރާ ދީން ކަމަށެވެ. 

ނަމަވެސް ބައެއް މީހުން ދީނީ ކަންކަމަށް ފަރުވާކުޑަކޮށް، މާތްﷲ ކަނޑައަޅުއްވާފައިވާ އިންތަކުން ބޭރުވެ، ދީނީ ވާޖިބުތަކަށް އިހުމާލުވަމުންދާ ކަމީ ހިތާމަހުރި ކަމެއް ކަމަށާއި، އިސްލާމީ އުސޫލުތަކާ ބީރައްޓެހި ސަގާފަތްތަކާއި ނުރަނގަޅު އަޚުލާގީ މިންގަނޑުތަކަށް ތަބާނުވެ އެފަދަ ކަންކަމުން ދުރުވުމަށް ޚުތުބާގައި ވަނީ ނަސޭހަތްތެރިވެފަ އެވެ.

ހަގީގީ މުސްލިމަކީ ކޮންމެ ފަދަ ގުރުބާނީއެއް ވާން ޖެހުނަސް ނުވަތަ އަނިޔާއެއް ލިބުނަސް، އިސްލާމްދީން ނޫން އެހެން ދީނެއް ނޭދޭނެ މީހެއްކަން ފާހަގަކޮށް ޚުތުބާގައި ބުނީ، އިސްލާމްދީނުގެ ކުރީކޮޅުގައި ޞަޙާބީން ވެވަޑައިގެންނެވި މަތިވެރި ގުރުބާނީތައް ހަނދާން ކުރަންޖެހޭ ކަމަށެވެ.

ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ މުއައްޛިނެއްކަމުގައިވާ بِلَال رَضِيَ الله عَنْهއަށް ކާފިރުން ދެމުންދިޔަ އަނިޔާ އޭގެ އިންތިހާއަށް ދިޔަ އެވެ. އެކަލޭގެފާނުގެ މޭފުޅު މައްޗަށް ބޮޑެތި ހިލަތައް އަރުވައި މައްކާގެ ހޫނު ހިލަބިމުގައި އެކަލޭގެފާނު ދަމަމުން، އިސްލާމްދީން ދޫކޮށްލުމަށް މަޖުބޫރުކުރި އެވެ. ނަމަވެސް އެކަލޭގެފާނު ސާބިތުކަމާ އެކު ވިދާޅުވަމުން ގެންދެވީ: "أَحَدٌ أَحَدٌ" މިފަދައިންނެވެ. މާނައީ: "މާތް الله އެއްކައުވަންތަ އެވެ. މާތް الله އެއްކައުވަންތަ އެވެ." ހަމަ އެފަދައިން މާތް ޞަޙާބީއެއްކަމުގައިވާ اَلْـخَبَّابُ بْنُ الْاَرَتِّ އިސްލާމްދީން ޤަބޫލުކުރެއްވުމުން އެކަލޭގެފާނަށް ނުހަނު ބޮޑަށް އަނިޔާކުރެވުނެވެ. ނަމަވެސް އެކަލޭގެފާނު އިސްލާމްދީނުގައި ސާބިތުވެ ހުންނެވި އެވެ. މުޝްރިކުން އެކަލޭގެފާނަށް ދިން އަނިޔާތަކުގެ ތެރޭގައި، އަލިފާންގަނޑެއް ރޯކޮށް، އެ އަލިފާންގަނޑުގެ މަތީގައި އެކަލޭގެފާނު ދެމުން ހިމެނެ އެވެ. އެ އަލިފާންގަނޑު ނިވުނީ އެކަލޭގެފާނުގެ ބުރަކަށިފުޅުގެ މަސްތައް ފިހިގެން ފޭބި ދިޔައިންނެވެ. މި ހުރިހައިކަމެއް ހިނގައިދިޔަ އިރު ވެސް، އެކަލޭގެފާނު ހުންނެވީ ސާބިތުކަމާ އެކުގަ އެވެ. 

ހުކުރު ޚުތުބާ 

މީގެ އިތުރުން ޚުތުބާގައި ބުނީ، މުސްލިމުން ދީނުގައި ހިފަހައްޓައިގެން ތިބި ކޮންމެ ހިނދެއްގައި މަތިވެރިކަން ލިބުނު ކަމަށާއި، ނަމަވެސް ދީނާ ދުރުހެލިވި ހިނދު ނިކަމެތިވެ ދުޝްމަނުންގެ ބާރު ފޯރާފައިވާ ކަމަށެވެ. 

ޚުތުބާގައި ވަނީ ގޭތެރޭގައްޔާއި، ބާޒާރުތަކުގައްޔާއި، މަޖިލިސްތަކުގައި ވެސް ބަހާއި އަމަލުން އިސްލާމީ ރީތި އުސޫލުތައް ދައްކުވައިދިނުމަށް އިލްތިމާސްކޮށްފަ އެވެ. އަދި ހަމައެކަނި މާތްﷲ އަށް އަޅުކަން ޚާލިސްކޮށް، ޝިރުކާއި ބިދުއަތަކުން ސާފުތާހިރުވެ، ފަރުޟު ނަމާދުތަކާއި ޒަކާތް އަދާކުރުމާއެކު މުސްލިމުން އެއްބަޔަކު އަނެއްބަޔަކަށް އެހީތެރިވެ ވާގިވެރިވުމަށް ގޮވާލާފަ އެވެ.