ރައީސް މުއިއްޒު ރަސްކަލަކަށް ވުމުގެ ވިސްނުން!
11 ނޮވެމްބަރު 2026 | ބުދަ 09:17ރާއްޖޭގެ މުހިންމު ސަރަހައްދުތަކުން ބޭރުގެ ކުންފުނިތަކަށް ބޮޑެތި މަޝްރޫއުތައް ދޫކޮށް، ސިފައިންގެ އިސްވެރިން ސިޔާސީ މަގާމުތަކަށް އައްޔަންކުރަމުންދާތީ އާންމުންގެ މެދުގައި ވަނީ ކަންބޮޑުވުން އުފެދިފައި. މިކަމަކީ ބޭރުގެ ނުފޫޒުގަދަ ގައުމުތަކުގެ އެހީތެރިކަމާއެކު، ރާއްޖޭގެ ވެރިކަމުގެ ނިޒާމު ބަދަލުކޮށް ދާއިމީ ބާރުވެރިކަމެއް ހޯދުމަށް ސަރުކާރުން ކުރަމުންދާ މަސައްކަތެއް ކަމަށް ގިނަ ބަޔަކު ތުހުމަތުކުރޭ
ރައީސް ޑޮކްޓަރު މުޙައްމަދު މުއިއްޒު | ރައީސް އޮފީސް
ރައީސް ޑރ. މުއިއްޒަކީ މާތްވެގެންވާ އިސްލާމްދީނަށާއި ދިވެހި ގައުމަށް ދުވަހަކުވެސް ދެރަގޮތެއް މެދުވެރިވުމަށް އެދިވަޑައިގަންނަވާނެ ބޭފުޅެއް ނޫނެވެ. އަދި ޔަހޫދީންގެ ނުފޫޒާއި ފިކުރުތަކުގެ ކުރިމަތީގައި އެމަނިކުފާނު ދީލައިނުލައްވާނެ ކަމާމެދު ޝައްކެއް ނެތެވެ. މިއީ އެމަނިކުފާނާ އަރިސް ބޭފުޅަކު ހާމަކުރެއްވި އިޚްލާސްތެރި ޝުއޫރެކެވެ.
ކަން މިހެން އޮތްއިރު، މި ފެށިގެން މިއުޅެނީ އަދި ކޮންފަދަ ކަމެއް ހެއްޔެވެ؟ ދައުލަތުގެ މުހިންމު މަގާމުތަކަށް ސިފައިންގެ ޚިދުމަތުން ރިޓަޔަރ ކުރައްވާފައިވާ ބޭފުޅުން އައްޔަންކުރައްވައިގެން، މި ކޮށައިދެއްވަނީ ކޮން މިސްރާބަކަށް ދާނެ މަގެއް ހެއްޔެވެ؟ ކޮންމެ ހަލަބޮލިކަމަކާއި ހަޅުތާލަކުން އަމިއްލަ ޒާތީ މަންފާއެއް ހާސިލުކުރުމަކީ އަބަދުވެސް ސިޔާސީ މައިދާނުގައި ބޭނުންކުރަމުން އަންނަ އުކުޅެކެވެ. މި ހުރިހާ ކަމަކާ މެދު ފުންކޮށް ވިސްނައި، ކަންކަން ގުޅުވައިލުމުން ސިފަވެގެން މިދަނީ މުޅިން ތަފާތު މަންޒަރެކެވެ.
ރަސްމާލެ މަޝްރޫއު ތަރައްގީކުރުމުގެ މައިގަނޑު އަސާސަކީ އަދި އޭގެ ހަގީގީ މަގުސަދަކީ ކޮބައިތޯ އެވެ؟ މި މަޝްރޫއާ ގުޅިގެން ރައްޔިތުންގެ މެދުގައި ނުތަނަވަސްކަމާއި ކަންބޮޑުވުން އުފެދެމުންދާ ސަބަބަކީ ކޮބައިތޯ އެވެ؟ ޚާއްސަކޮށް، ރާއްޖޭގެ ބިން ބޭރުގެ ފަރާތްތަކަށް މިލްކުކުރެވޭ ގޮތަށް ދޫކޮށްލުމާއި، ގައުމުގެ ސިޔާދަތާއި އިސްލާމީ ވަހްދަތަށް އަސަރުފޯރާނެ ފަދަ ގޮތަކަށް ބޭރު މީހުން ވަޒަންވެރިކުރުވުމުގެ ފުރުސަތު އޮތްކަމަށް ބުނެ ރައްޔިތުން ފާޅުކުރަމުންދާ ޝުއޫރުތަކުގެ ހަގީގަތަކީ ކޮބައިތޯ އެވެ؟ އަދި ދިވެހިންގެ ދީނީ އަދި ގައުމީ މަސްލަހަތާ ފުށުއަރާފަދަ ކަންކަމަށް ޖާގަ ލިބިދާނެކަމުގެ ބިރު އޮތްއިރު، ރައީސް މުއިއްޒު މިފަދަ ބޮޑު މަޝްރޫއެއް ކުރިއަށް ގެންދިއުމުގެ އަސްލު ބޭނުމަކީ ކޮބައިތޯ އެވެ؟
ތުރުކީވިލާތް، ސައުދީ އަރަބިއްޔާ އަދި ޕާކިސްތާން ފަދަ ގައުމުތަކުގެ ސިޔާސީ ނިޒާމުތައް ބައްޓަންވެފައިވަނީ، ޒަމާންވީ އަދި ބާރުގަދަ ވެރިކަމުގެ ނުފޫޒު ދެމެހެއްޓުމަށް ބާރުއަޅާ އުސޫލުތަކެއްގެ މައްޗަށެވެ. ހަމައެފަދައިން، ޗައިނާއަކީ ވެސް ވެރިކަމުގެ ބާރުތައް އެއްފަސްކޮށް، ދައުލަތުގެ ނުފޫޒު މުޅި މުޖުތަމައުގެ މައްޗަށް ވަރުގަދަކުރުމުގެ ސިޔާސަތެއް ގެންގުޅޭ ގައުމެކެވެ. އެހެންކަމުން، މިފަދަ ގައުމުތަކުގެ މަސްލަހަތު އެންމެ ބޮޑަށް ގުޅިފައި އޮންނާނީ، ރައީސް ޑރ. މުއިއްޒުގެ ވެރިކަން ދިގު މުއްދަތަކަށް ދެމިއޮތުމަށް ތާއީދުކުރުމާ ކަމުގައި ބެލެވެ އެވެ.
ދިވެހިރާއްޖޭގެ ވެރިރަށް މާލެއާއި މާލެ ކައިރި ސަރަހައްދުތަކުގެ އިތުރުން ރާއްޖޭގެ އެކި ކަންކޮޅުތަކުގައި ތުރުކީގެ ބާރުގަދަ ފަރާތްތަކުންނާއި ނުފޫޒުގަދަ ކުންފުނިތަކުން ހިންގަމުންދާ ބޮޑެތި ވިޔަފާރިތަކާއި ރިސޯޓު މަޝްރޫއުތަކުގެ ހަގީގީ ބޭނުމާ މެދު ގިނަ ބަޔަކު ސުވާލު ކުރެ އެވެ.
މާލެ ކައިރީގައި ތަރައްގީ ކުރަމުން އަންނަ "މެކްސް ރޯޔަލް މޯލްޑިވްސް" ރިސޯޓަކީ ތުރުކީވިލާތުގެ ވަޒީރަކާ ގުޅުން އޮންނަ މަޝްރޫއެއް ކަމަށް އަޑުފެތުރިފައިވާއިރު، އެ ރަށުގައި މަސައްކަތްކުރުމަށް އެތައް ހާސް އަފްޣާނިސްތާނު މީހުން ގެނެސް ހަރަކާތްތެރިވަމުންދާ މައްސަލައިގައި ގިނަ ބަޔަކު ސުވާލު އުފައްދައެވެ. ވެރިރަށް މާލެއާ މިހާ ކައިރީގައި ބޭރުގެ ގަބީލާތަކެއް ފަދައިން ވަކި ބަޔަކު އެއްވެ ތިބުމުގެ އަޑީގައި އޮތީ ކޮން ކަމެއްތޯ އެވެ.
މީގެ އިތުރުން، ރާއްޖޭގެ ދެކުނުން އައްޑޫ ސިޓީގެ މަޝްހޫރު ހަންކެޑެ ޕްރޮޖެކްޓް ތުރުކީގެ ކުންފުންޏަކާ ހަވާލުކޮށްގެން ކުރިއަށްގެންދާއިރު، އެ ސަރަހައްދަށް ތުރުކީގެ ބޮޑު ނުފޫޒެއް ވަދެގެންދާ މަންޒަރު ދަނީ ފެންނަމުންނެވެ. ހަމައެއާއެކު، މަސްފެން އެނަރޖީ ޕްރޮޖެކްޓާއި، މަޝްހޫރު އަސްތަސް ހޯލްޑިންގގެ ވިޔަފާރިތަކުގެ އިތުރުން ތެއުސް ގްރޫޕާއި އައެދިޒް ގްރޫޕް ފަދަ ތުރުކީގެ ބޮޑެތި ވިޔަފާރިތަކުން މާލެ ވަށައިގެން ފައިތިލަ ސާބިތުކުރަމުން ދަނީ ކޮން ސަބަބަކާ ހުރެތޯ އެވެ.
ޗައިނާ ސަރުކާރުން ރާއްޖޭގެ ރައީސުލްޖުމްހޫރިއްޔާ އަށް ސިޔާސީ އަދި މާލީ ގޮތުން ބޮޑެތި އެހީތަކެއް ނުވަތަ "ހެވިލީ އިންވެސްޓް" ދެމުންދާ ކަމުގެ އަޑުތައް އާންމުންގެ މެދުގައި ދަނީ ގަދަވަމުންނެވެ. މިގޮތުން، ޗައިނާގެ ސީއާރުސީސީ އަދި ސީއެޗްއީސީ ފަދަ ބިޔަ ކުންފުނިތަކުގެ ނުފޫޒާއި އެހީތެރިކަން ސަރުކާރަށް ލިބެމުންދާކަން ގިނަ ބަޔަކު ތުހުމަތު ކުރެ އެވެ. ހަމައެއާއެކު، ރަސްމާލެ މަޝްރޫއުގެ ތެރެއިން ޗައިނާގެ ޕައިނިއަރ ގްރޫޕް ގާއިމުކުރުމުގެ މަސައްކަތް ކުރެވެމުންދާއިރު، ދިރާސާކުރުމުގެ ނަމުގައި ކާށިދޫއިން ބޮޑު ބިމެއް ދީ، މާލެ ސަރަހައްދުގައި ޗައިނާގެ ނުފޫޒު ވަރުގަދަކުރަމުންދާ ކަމުގެ ކަންބޮޑުވުންތައް ވެސް ދަނީ ފާޅުކުރެވެމުންނެވެ.
މީގެ އިތުރުން، އުތުރުތިލަފަޅުން (ޔޫޓީއެފް) ދަނޑުވެރިކަމަށް ދޫކޮށްފައިވާ 60 ހެކްޓަރުގެ ބިމުގެ ބަދަލުގައި، ރަސްމާލެއިން ޗައިނާއަށް ބޮޑު ބިމެއް ހަމަޖެއްސުމަށް މަޝްވަރާތައް ކުރިއަށްދާ ކަމަށް ވެސް އަޑުފެތުރިފައިވެ އެވެ. މިފަދަ ކަންކަމާ ގުޅިގެން، ރާއްޖޭގެ މައި ވިޔަފާރި ބަނދަރާއި ވިލިމާލޭގައި ޗައިނާއިން ހިންގަން ފަށާފައިވާ ބޮޑެތި މަޝްރޫއުތަކުގެ އަސްލު މަގުސަދާމެދު ގިނަ ބަޔަކު މިހާރު ދަނީ ސުވާލު އުފައްދަމުންނެވެ.
ގުޅިފަޅަކީ ޕާކިސްތާނުގެ ޚާއްސަ އަމާޒަކަށް ވެގެންދާނެ ކަމަށް ބުނެ ދެކެވޭ ވާހަކަތައް މިހާރު ވަނީ ވަރަށް ބޮޑަށް އިތުރުވެފަ އެވެ. އެ ރަށުގައި ތަރައްގީކުރާ ކްރިކެޓް ސްޓޭޑިއަމްގެ މަސައްކަތް ނިމުމުން މިކަމުގެ ހަގީގަތް ވަރަށް ސާފުކޮށް ހާމަވެގެންދާނެ އެވެ. ހަމައެއާއެކު، ސައުދީ އަރަބިއްޔާގެ ބިޔަ މަޝްރޫއުތަކުގެ ސަބަބުން، ރައީސުލްޖުމްހޫރިއްޔާއަށް މި މައްސަލައިގައި ސިޔާސީ ގޮތުންނާއި އިގްތިސާދީ ގޮތުން ފުރިހަމަ ރައްކާތެރިކަމެއް ލިބިގެންދާނެ ކަމަށް ބެލެވެ އެވެ.
ދިވެހިރާއްޖޭގެ ސިޔާސީ މަސްރަހު ދިރާސާކުރައްވާ ބައެއް ފަރާތްތަކުން ލަފާކުރާ ގޮތުގައި، ރައީސް ޑރ. މުޙައްމަދު މުއިއްޒު އިސްވެ ހުންނަވައި، ޒަމްޒަމް ފާރިޝް ފަދަ އެމަނިކުފާނުގެ އަރިސް ބޭފުޅުން ބޭނުންކުރައްވައިގެން ގައުމުގެ ދާޚިލީ ހަމަޖެހުން ނަގާލުމަށް މަސައްކަތްޕުޅު ކުރެއްވުމަކީ އެކަށީގެންވާ ކަމެކެވެ. އަދި އުފެދިގެންދާ މިފަދަ ހަމަނުޖެހުންތަކުގެ ނާޖާއިޒު ފައިދާ ނަންގަވައި، ވެރިކަމުގެ ބާރުތައް ދާއިމީ ގޮތެއްގައި ދެމެހެއްޓުމަށް އެމަނިކުފާނު މަސައްކަތްޕުޅު ކުރައްވަފާނެ ކަމަށްވެސް އެ ފަރާތްތަކުން ތުހުމަތުކުރެ އެވެ. މީގެއިތުރުން، ރައްޔިތުންގެ ފެންނަ ނުފެންނަ ވޯޓަކުން ދާއިމީކޮށް ވެރިކަން ދެމެހެއްޓޭނެ މަގު ބަންދުވުމާ ގުޅިގެން، ކޮންމެވެސް އެހެން ގޮތަކުން ވެރިކަމުގައި ތާއަބަދު ދެމިހުންނެވޭނެ އުކުޅުތަކެއް އެމަނިކުފާނު ހޯއްދަވަމުން ގެންދަވާ ކަމުގެ އަޑުތައް ވެސް އާންމުންގެ ތެރޭގައި ވަނީ ގަދަވެފަ އެވެ.
މިއީ ނުހަނު ކަންބޮޑުވާންޖެހޭ ފަދަ، އަދި އެހާމެ ބޮޑާކަން އެކުލެވިގެންވާ ވާހަކަތަކެކެވެ. އެހެންކަމުން، ދުރާލައި ރައްކާތެރިކަމުގެ ފިޔަވަޅު އެޅުމަކީ ނުހަނު ބޭނުންތެރި ކަމެކެވެ.
މިއަދު މިކަންކަމަށް ސަމާލުވެ، ރައްކާތެރިވެ ނުތިބެއްޖެނަމަ، މާދަމާ އޭގެ ހިތި ނަތީޖާއާ ކުރިމަތިލާން ޖެހުމަކީ އެކަށީގެންވާ ކަމެކެވެ.
"ރައްކާވެ ތިބިއްޔާ ދަތުރެވެ" މި ބަހުގެ ހަގީގީ މާނަ މިއަދު ފެންނަމުންދާއިރު، މިފަދަ ނުރައްކާތެރި ވާހަކަތަކުން މިންޖުވެ ތިބުމަށްޓަކައި ދުރާލާ ރައްކާތެރިކަމުގެ ފިޔަވަޅު އެޅުމަކީ ކޮންމެ ފަރުދެއްގެ ވެސް ޒިންމާ އެކެވެ.
