ރަސްމާލެ މަޝްރޫއަށް އަނެއްކާވެސް ކޮންސަލްޓެންޓެއް ހޯދަނީ، މިފަހަރު ހޯދަނީ މަޝްރޫއުގެ މާސްޓަރ ޕްލޭން ތައްޔާރުކޮށްދޭނެ ކޮންސަލްޓެންޓެއް!
11 ނޮވެމްބަރު 2026 | ބުދަ 07:35ފުށިދިއްގަރުފަޅުގައި ތަރައްގީކުރާ ރަސްމާލެ މަޝްރޫއުގެ މާސްޓަރ ޕްލޭން ތައްޔާރުކުރުމަށް ބޭނުންވާ ކޮންސަލްޓެންސީ ފޯރުކޮށްދޭނެ ފަރާތެއް ހޯދުމަށް ހައުސިންގ މިނިސްޓްރީން ހުޅުވާލައިފި. މި މަސައްކަތަށް ޝައުގުވެރިވާ ފަރާތްތަކުން ޑިސެމްބަރު 2 ވަނަ ދުވަހުގެ ކުރިން ޕްރޮޕޯސަލް ހުށަހަޅަންޖެހޭއިރު، މީގެ ކުރިން ވެސް މި މަޝްރޫއުގެ އެކި ދިރާސާތައް ކުރުމަށް ސަރުކާރުން ވަނީ އިއުލާނުކޮށްފައި
ރައީސް މުއިއްޒު ރަސްމާލެ ހިއްކުމުގެ މަސައްކަތް ބައްލަވާލެއްވުން | ރައީސް އޮފީސް
ފުށިދިއްގަރުފަޅު ހިއްކައިގެން ތަރައްގީކުރާ ރަސްމާލެ މަޝްރޫއުގެ މާސްޓަރ ޕްލޭން ތައްޔާރުކުރުމަށް ބޭނުންވާ ކޮންސަލްޓެންސީ ޚިދުމަތް ފޯރުކޮށްދޭނެ ފަރާތެއް ހޯދުމަށް މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓުން ހުޅުވާލައިފި އެވެ.
އެ މިނިސްޓްރީން ކުރި އިއުލާނެއްގައި ބުނެފައިވަނީ މި މަސައްކަތަށް ޝަރުތު ހަމަވާ އަދި ޝައުގުވެރިވާ ފަރާތްތަކުން ކަނޑައެޅިފައިވާ އުސޫލުތަކާ އެއްގޮތަށް ޕްރޮޕޯސަލް ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ.
މި ބިޑާ ގުޅޭގޮތުން މައުލޫމާތު ދިނުމަށް ބާއްވާ ޕްރީ-ބިޑް މީޓިންގއެއް ނޯންނާނެ ކަމަށް ހައުސިންގ މިނިސްޓްރީން ބުނެ އެވެ. ނަމަވެސް، ޕްރޮޕޯސަލް ތައްޔާރުކުރުމުގައި އެއްވެސް ސުވާލެއް ނުވަތަ އިތުރު މައުލޫމާތެއް ސާފުކުރަން ބޭނުންވާނަމަ، 2026 ނޮވެމްބަރު 16 ވާ ހޯމަ ދުވަހުގެ މެންދުރު 12:00 ގެ ކުރިން އެ މިނިސްޓްރީގެ އީމެއިލް އެޑްރެސްއަށް ފޮނުވުމަށް ވަނީ އެދިފަ އެވެ.
މި މަޝްރޫއުގެ ބިޑް ހުށަހެޅުން އޮންނާނީ 2026 ޑިސެމްބަރު 2 ވާ ބުދަ ދުވަހުގެ ހެނދުނު 09:00 ގަ އެވެ. ބިޑް ހުށަހެޅުން ކުރިއަށްދާނީ މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓްގަ އެވެ.
މި މަސައްކަތަށް ހޮވޭ ފަރާތަކުން އަމަލުކުރަންޖެހޭނެ ތަފްސީލީ އުސޫލުތައް ނުވަތަ ޓާމްސް އޮފް ރިފަރެންސް (ޓީއޯއާރު) މިހާރު ވަނީ އާންމުކޮށްފަ އެވެ.
ރަސްމާލެ މަޝްރޫއާ ގުޅޭ އެކި ދިރާސާތަކާއި ޕްލޭންތައް އެކުލަވާލުމުގެ މަސައްކަތް ސަރުކާރުން މީގެ ކުރިން ވެސް ވަނީ ފަށާފަ އެވެ. އެގޮތުން 2025 ވަނަ އަހަރުގެ އޮކްޓޫބަރު މަހުގެ ތެރޭގައި މިނިސްޓްރީ އޮފް ފައިނޭންސްއިން ވަނީ ރަސްމާލެ ތަރައްގީކުރުމުގެ ތަފްސީލީ މާސްޓަރ ޕްލޭން ފަރުމާކޮށް އެކުލަވާލާނެ ކޮންސަލްޓެންސީ ފާމެއް ހޯދުމަށް އިއުލާނުކޮށްފަ އެވެ.
މީގެ އިތުރުން، 2025 ވަނަ އަހަރުގެ ޑިސެމްބަރު މަހުގެ ތެރޭގައި ރަސްމާލެ ޓްރާންސްޕޯޓް މާސްޓަރ ޕްލޭންގެ ފީޒިބިލިޓީ ސްޓަޑީ ނުވަތަ މަސައްކަތް ކުރެވިދާނެތޯ ބެލުމުގެ ދިރާސާ ހެދުމަށާއި، މަޝްރޫއު ތައްޔާރުކުރުމުގެ ކޮންސަލްޓެންސީ ޚިދުމަތް ހޯދުމަށް ވެސް ފިނޭންސް މިނިސްޓްރީން ވަނީ އިއުލާނުކޮށްފަ އެވެ.
