ރައީސް މުއިއްޒުގެ "އިހުތިރާމު ކެމްޕޭން" އިފްތިތާހުކުރަން ބަންދު ދުވަހެއްގެ ރޭ ބާއްވާ ޖަލްސާއަށް ސިވިލް ސަރވިސް މުވައްޒަފުން ދޭތޯ ކަށަވަރުކުރަން ކޮމިޝަނުން ސަރުކާރު އޮފީސްތަކަށް އަންގައިފި
10 ނޮވެމްބަރު 2026 | އަންގާރަ 10:09ރައީސުލްޖުމްހޫރިއްޔާ އިފްތިތާހުކޮށްދެއްވާ އިހުތިރާމު އަދާކުރުމުގެ ގައުމީ ކެމްޕޭނުގެ ޖަލްސާގައި ސިވިލް ސަރވިސްގެ ހުރިހާ މުވައްޒަފުން ބައިވެރިވޭތޯ ކަށަވަރުކުރުމަށް ސިވިލް ސަރވިސް ކޮމިޝަނުން ސަރުކާރުގެ އޮފީސްތަކަށް އަންގައިފި. މި މަހުގެ 14 ވާ ހޮނިހިރު ދުވަހުގެ ރޭ ބާއްވާ މި ރަސްމިއްޔާތަށް މުވައްޒަފުން ހާޒިރުވޭތޯ ބެލުމަށް އެންގުމާ ގުޅިގެން، އާންމު ރައްޔިތުންގެ މެދުގައި ވަނީ އެކަމާ މެދު ސުވާލު އުފެދިފައި
ރައީސް ޑރ. މުހައްމަދު މުއިއްޒު | ރައީސް އޮފީސް
ރައީސް ޑރ. މުހައްމަދު މުއިއްޒު އިއުލާނުކުރައްވާފައިވާ އިހުތިރާމު އަދާކުރުމުގެ ޤައުމީ ކެމްޕޭން އިފްތިތާހުކުރުމުގެ ރަސްމީ ޖަލްސާއަށް ސިވިލް ސަރވިސްގެ މުވައްޒަފުން ބައިވެރިވޭތޯ ކަށަވަރުކުރުމަށް ސިވިލް ސަރވިސް ކޮމިޝަނުން ސަރުކާރުގެ އޮފީސްތަކަށް އަންގައިފި އެވެ.
ސިވިލް ސަރވިސް ކޮމިޝަނުން ސަރުކާރުގެ މަސްއޫލު އޮފީސްތަކާއި އިދާރީ ގޮތުން ވަކިން ހިންގާ އިދާރާތަކަށް ފޮނުވި ސިޓީގައި ބުނެފައިވަނީ މި ޖަލްސާ ބާއްވާނީ މި މަހުގެ 14 ވާ ހޮނިހިރު ދުވަހުގެ ރޭ 08:30 ގައި މާފަންނު ޓްރެކު ސަރަހައްދުގައި ކަމަށެވެ.
ކޮމިޝަނުން ފޮނުވި ސިޓީގައި ވަނީ މިއީ ޤައުމީ ފެންވަރުގައި ހިންގާ ޤައުމީ މަޝްރޫއެއް ކަމަށާއި އެހެންކަމުން މި މަޝްރޫއުގައި ސިވިލް ސަރވިސްގެ މުވައްޒަފުން ބައިވެރިވެ މިއީ ކާމިޔާބު ކެމްޕޭނަކަށް ހެދުމަށް ކޮމިޝަނުން ބޭނުންވާ ކަމަށެވެ.
މި ސިޓީގައި ކޮމިޝަނުން ވަނީ ސިވިލް ސަރވިސްގެ އެންމެހާ މުވައްޒަފުން މި ރަސްމިއްޔާތުގައި ބައިވެރިވުމަށް އަންގައި މުވައްޒަފުން ބައިވެރިވޭތޯ ކަށަވަރުކުރުމަށް އަންގާފަ އެވެ.
ރައީސް މުއިއްޒު ހިންގަވާ އިހުތިރާމު އަދާކުރުމުގެ ޤައުމީ ކެމްޕޭން އިފްތިތާހުކުރުމަށް ބަންދު ދުވަހެއްގެ ރޭ ބާއްވާ ޖަލްސާއަށް ސިވިލް ސަރވިސް މުވައްޒަފުން ދޭތޯ ކަށަވަރުކުރުމަށް ކޮމިޝަނުން އޮފީސްތަކަށް އަންގައިފައިވާއިރު މިއީ ސަރުކާރުން ރައްޔިތުންގެ މެދުގައި އިހުތިރާމާއި އަދަބުވެރިކަން އިތުރުކުރުމަށް ހިންގާ ޤައުމީ ފެންވަރުގެ ކެމްޕޭން ހިންގަންވީ ގޮތްތޯ ގިނަ ބަޔަކު ދަނީ ސުވާލު ކުރަމުންނެވެ.
