ރަޝީދުގެ މަރާއި ގުޅިގެން ބައިނަލްއަޤުވާމީ ތަހުޤީޤެއް ފެށުމަށް ގޮވާލައިފި
10 އޮކްޓޯބަރު 2017 | އަންގާރަ 18:42މައްސަލަތައް ތަހުޤީޤްކުރުމުގައި އެޗްއާރުސީއެމް ވަނީ ފެއިލްވެފައި
އަބްދުﷲ ރަޝީދު ކޯޓުން ނިކުންނަނީ - އޭނާ ވަނީ ޖަލުގައި ހުކުމް ތަންފީޒްކުރަނިކޮށް މަރުވެފައި
މޭޑޭގެ މުޒާހަރާއާއި ގުޅިގެން ހައްޔަރުކުރި އަބްދުﷲ ރަޝީދުގެ ކުއްލި މަރާއި ގުޅިގެން ބައިނަލް އަޤުވާމީ ޖަމިއްޔާތަކާއި ތަހުޤީޤީ އިދާރާތައް ހިމެނޭގޮތަށް ހާމަކަން ބޮޑު ތަހުޤީޤެއް ފެށުމަށް އެމްޑީޕީން ގޮވާލައިފި އެވެ.
އެމްޑީޕީން އިނގެރޭސި ބަހަން އާންމުކުރި ނޫސްބަޔާނެއްގައި ބުނެފައިވަނީ ހިއުމަން ރައިޓްސް ކޮމިޝަނަކީ، މިފަދަ މަރުގެ މައްސަލަތައް ތަހުޤީޤްކުރުމަށް އުފައްދާފައިވާ ޤާނޫނީ މިނިވަން ޝަހުސެއް ކަމަށެވެ. ނަމަވެސް މިފަދަ މައްސަލަތައް ތަހުޤީޤްކޮށް ހައްޤުތައް ކަށަވަރުކޮށްދިނުމުގައި އެ ކޮމިޝަން ފެއިލްވެފައިވާކަމަށް ބަޔާނުގައި ބުނެފައިވެއެވެ. އަދި ގޮތް ނޭނގޭ ގިނަ މަރުތަކެއް ހިނގަމުން އަންނަކަން އެމްޑީޕީގެ ބަޔާނުގައި ވަނީ ފާހަގަކޮށްފަ އެވެ.
އެހެންކަމުން, އެމްޑީޕީގެ ބަޔާނުގައި ބުނެފައިވަނީ، ބައިނަލްއަޤުވާމީ އިންސާނީ ހައްޤުތަކާއި ބެހޭ ޖަމިއްޔާތައް ހިމެނޭގޮތަށް، ބައިނަލްއަޤުވާމީ ހަމަތަކާއި އުސޫލުތަކުގެ މަތިން މިނިވަން ހާމަކަން ބޮޑު ތަހުޤީގެއް ކުރުމަށް ގޮވާލާކަމަށެވެ. އަދި ރަޝީދުގެ މަރުގެ މައްސަލައިގެ އިތުރުން ގޮތް ނޭނގޭ އެހެން މަރުތައްވެސް އެގޮތުގެމަތިން ތަހުޤީޤްކުރުމަށް ވަނީ ގޮވާލާފަ އެވެ.
އޭގެއިތުރުން އެމްޑީޕީގެ ބަޔާނުގައި ބުނެފައިވަނީ ދިރިހުރުމުގެ ހައްޤަކީ ދައުލަތުން ކޮންމެ އިންސާނަކަށްވެސް ކަށަވަރުކޮށްދޭންޖެހޭ އަސާސީ ހައްޤުތައް ކަމަށާއި، ލާއިންސާނީ އަނިޔާ ކުރުމާއި، ސިއްހީ ފަރުވާއިން މަހުރޫމްކުރުން ފަދަ ހައްޤުތަކަކީ ނިގުޅައިނުގަނެވޭނެ ފަދަ ހައްޤުތަކެއް ކަމަށެވެ. އަދި ރަޝީދުގެ މަރާއި، ދެންވެސް ގޮތް ނޭނގޭ ގޮތްގޮތަށް ހިނގާފައިވާ މަރުތައް ތަހުޤީޤް ނުކޮށްފާނެކަމުގެ ބިރުވެރިކަން އެބައޮތްކަމަށާއި، އަދި މި މަރުތަކާއި ގުޅިގެން ސަރުކަރުގެ މުއައްސަސާތައް ޖަވާބުދާރީ ނުކޮށްފާނެކަމުގެ ކަންބޮޑުވުންވެސް އެބައޮތް ކަމަށެވެ. އޭގެއިތުރުން ޖަލުތައް މަރާމާތުކުރުމަށް ބަޖެޓް ނެތް އިރު ދައުލަތުން އުޅެނީ މަރުގެ ހުކުމް ތަންފީޒްކުރާނެ ތަންތަން ޤާއިމްކުރުމަށް ތަންތަން ހެދުމަށް ބަޖެޓު ހޯދުމުގައިކަމަށް ބަޔާނުގައި ބުނެފައިވެއެވެ. އަދި ޖަލުތައް މަރާމާތުކޮށް، ކުށްވެރިންނަށް ރަނގަޅު ސިއްހަތެއްގައި ހުކުމް ތަންފީޒްކުރެވޭނެ ގޮތްތައް މަގުފަހިކޮށްދިނުމަކީ މުހިންމުކަމެއްކަން އެމްޑީޕީން ފާހަގަކޮށްފައިވެއެވެ.
މީގެ ދެ އަހަރު ކުރިން، 2015 ގެ މެއި އެއް ވަނަ ދުވަހު ސަރުކާރާ ދެކޮޅަށް ކުރި މުޒާހަރާގައި ހިންގި ހަމަނުޖެހުންތަކާ ގުޅިގެން ފަސް އަހަރަށް ޖަލަށްލާފައިވާ އަބްދުﷲ، 51، މަރުވީ އެތެރެހަށީގެ ބައްޔަކަށް އައިޖީއެމްއެޗުގައި ފަރުވާ ދެމުން އަންނަނިކޮށެވެ.
އެމްޑީޕީން ބުނީ "ނުހައްގުން ޖަލަށްލައި ހައްގުތަކުން މަހްރޫމްކުރި" އަބްދުﷲ އަކީ އެއްވެސް ބައްޔަކަށް ބޭސްކުރަމުން ނުދާ، ޖާނުން ވަރުގަދަ މީހެއް ކަމަށެވެ. އެކަމަކު ޖަލަށް ލީ ފަހުން ސިއްހީ ހާލަތު ދަށްވަމުންދާތީ، އެކި ފަހަރުމަތިން ފަރުވާ އަށް ކަރެކްޝަންސްގައި އެދުމުން ވެސް އަޅާލާފައި ނުވާ ކަމަށް އެ ބަޔާނުގައި ބުންޏެވެ. އެ ބަޔާނުގައި އާއިލާއާ ހަވާލާދީ ބުނީ އަބްދުﷲ އިއްޔެ މާލެ ގެނެސް ފަރުވާ ދޭން ފެށީ، އަނބުރައިގަނެގެން ގޮޅި ތެރެއަށް ވެއްޓުމުން، އެ ވަގުތު ގޮޅީގައި ތިބި މީހުން އަޑުގަދަކުރަން ފެށުމުން ކަމަށެވެ.
