އދ. ގެ ސުލްހަ ބަލަހައްޓާ ފައުޖުގެ ސިފައިންނަށް ލުބުނާނުގައި ބަޑީގެ ހަމަލާތަކެއް ދީފި
11 ނޮވެމްބަރު 2026 | ބުދަ 07:21ދެކުނު ލުބުނާނުގައި ހަރަކާތްތެރިވާ އދ. ގެ ސުލްހަ ބަލަހައްޓާ ފައުޖަށް އަމާޒުކޮށް ދިން ހަމަލާތަކަކީ ބައިނަލްއަގުވާމީ ޤާނޫނުތަކާ ޚިލާފު އަމަލެއް ކަމަށް ބުނެ، އެ ކަން ތަހުގީގު ކުރުމަށް ޔުނިފިލްއިން ލުބުނާނު ސަރުކާރަށް ގޮވާލައިފި. މި ހާދިސާ ހިނގާފައި ވަނީ އެ ސަރަހައްދުގެ މަސްރަހު ނުތަނަވަސްވެ، މިޝަންގެ މުއްދަތު ހަމަވުމުން ސަލާމަތީ ހުސްކަމެއް އަތުވެދާނެ ކަމުގެ ބިރު އޮތް ދަނޑިވަޅެއްގައި
އދ.ގެ ސުލްހަ ބަލަހައްޓާ ފައުޖުގެ ދެ ސިފައިން ލުބުނާނުގެ ދެކުނުގެ ސަރަހައްދެގެ މަގެއްގައި ފޯރިމަރަނީ | އަނަދޮލު އޭޖެންސީ
ދެކުނު ލުބުނާނުގެ ވާދީ ޖީލޫ ކައިރީގައި އާންމު އުސޫލުން ފޯރިމަރަމުން ކުރަމުންދިޔަ އދ. ގެ ސުލްހަ ބަލަހައްޓާ ފައުޖުގެ ސިފައިންނަށް އަންގާރަ ދުވަހުގެ އިރުއޮއްސި ހަވީރުގެ ވަގުތެއްގައި ބަޑީގެ ހަމަލާތަކެއް އަމާޒުވެއްޖެ ކަމަށް ލުބުނާނުގައި ހަރަކާތްތެރިވާ އދ. ގެ ވަގުތީ ފައުޖުން (ޔުނިފިލް) ބުނެފި އެވެ.
ފޯރިމެރުމުގެ ޑިއުޓީގައި ހަރަކާތްތެރިވަމުން ދިޔަ ސުލްހަ ބަލަހައްޓާ ސިފައިންނާ ދިމާއަށް ބާރަ ވަރަކަށް ފަހަރު ހަމަލާދީފައިވާ ކަމަށް އެ މިޝަނުން ނެރުނު ބަޔާނެއްގައި ބުންޏެވެ. ސުލްހަ ބަލަހައްޓާ ސިފައިންނަށް އަމާޒުކޮށް ބަޑިޖެހި ދިމާއިން އަލިކަން ފެނުމާއެކު ރައްދުގައި ހަމަލާދިން ކަމަށާއި، ބަޑީގެ ހަމަލާތައް ހުއްޓުނީ އޭގެ ފަހުން ކަމަށް ޔުނިފިލުން ބުންޏެވެ. މި ހާދިސާގައި ސުލްހަ ބަލަހައްޓާ ފައުޖުގެ އެއްވެސް މީހަކު ޒަޚަމުވެފައި ނުވާ ކަމަށް ވެސް އެ މިޝަނުން ބުންޏެވެ.
"ސުލްހަ ބަލަހައްޓާ ފަރާތްތަކަށް ގަސްދުގައި ދޭ ހަމަލާތަކަކީ ސަލާމަތީ މަޖިލީހުގެ 1701 ނަންބަރު ޤަރާރާއި ބައިނަލްއަގުވާމީ އިންސާނީ ޤާނޫނާ ކަނޑައެޅިގެން ޚިލާފު ކަމެއް،" ޔުނިފިލުން ބުންޏެވެ. މި ހަމަލާގެ ޒިންމާ އުފުލަންޖެހޭ ފަރާތްތައް ދެނެގަނެ، އެ ފަރާތްތައް ޖަވާބުދާރީ ކުރުވުމަށް ޓަކައި އަވަސް ތަހުގީގެއް ހިންގުމަށް ލުބުނާނުގެ ސަރުކާރަށް އެ މިޝަނުން ގޮވާލާފައިވާ ކަމަށް އެ ފައުޖުން ބުންޏެވެ. ހަމަމިއާއެކު ކޮންމެ ހާލަތެއްގައި ވެސް އދ. ގެ މުވައްޒަފުންނާއި މިލްކިއްޔާތު ރައްކާތެރިކުރުމަކީ ބައިނަލްއަގުވާމީ ޤާނޫނުގެ ދަށުން ހުރިހާ ފަރާތްތަކެއްގެ މައްޗަށް ލާޒިމުވެގެންވާ ކަމެއް ކަމަށް އެ މިޝަނުން ހަނދާންކޮށްދިނެވެ.
މި ހާދިސާ ހިނގާފައި މި ވަނީ މި އަހަރުގެ ނިޔަލަށް ޔުނިފިލްގެ ދައުރު ހަމަވުމުން، ދެކުނު ލުބުނާނުގައި ސަލާމަތީ ގޮތުން ހުސްކަމެއް އުފެދިދާނެ ކަމުގެ ކަންބޮޑުވުންތައް އެ ޤައުމުގައި އިތުރުވަމުންދާ ދަނޑިވަޅެއްގަ އެވެ. ދެކުނު ލުބުނާނުގައި ޔަހޫދީ އިސްރާއީލުން ދެމުންދާ ހަމަލާތަކާއި ހިންގަމުންދާ ލާއިންސާނީ ޖަރީމާތައް އަދިވެސް ހުއްޓުމެއްނެތި ކުރިއަށްދާއިރު، އެ މިޝަން އެ ސަރަހައްދުން ފޭބުމަށްފަހު އަމަލުކުރާނެ ބައިނަލްއަގުވާމީ ސަލާމަތީ އިންތިޒާމުތައް އަދިވެސް އޮތީ ސާފުނުވެ އެވެ.
2025 އޮގަސްޓު މަހު އދ. ގެ ސަލާމަތީ މަޖިލީހުން ވަނީ ޔުނިފިލްގެ ދައުރު އެންމެ ފަހު ފަހަރަށް 2026 ޑިސެންބަރު 31 ގެ ނިޔަލަށް އިތުރުކޮށްފަ އެވެ. އަދި، 2027 ވަނަ އަހަރުގެ ތެރޭގައި ރައްކާތެރިކަމާއެކު ފިޔަވަހިތަކަކަށް ބަހާލައިގެން އެ ފައުޖު އެ ސަރަހައްދުން ބޭލުމަށް ވަނީ ތާވަލުކޮށްފަ އެވެ.
ޔުނިފިލްގެ ފައުޖުތައް ދެކުނު ލުބުނާނުގައި ގާއިމުވެ ހަރަކާތްތެރިވަމުން އަންނަނީ 1978 ވަނަ އަހަރުން ފެށިގެންނެވެ. 2006 ވަނަ އަހަރު ހިނގި ހަނގުރާމައަށް ފަހު އެ ފައުޖުގެ ޒިންމާތައް ވަނީ އިތުރަށް ފުޅާކޮށްފަ އެވެ. މި ގޮތުން ހަމަލާތައް ހުއްޓާލުމަށް ވެފައިވާ އެއްބަސްވުންތަކަށް އަމަލުކުރާ މިންވަރު ބެލުމާއި، ދެކުނު ލުބުނާނުގައި ލުބުނާނުގެ އަސްކަރިއްޔާ ރުކުރުވާލުމަށް އެހީތެރިވުމާއި، އެއްބަސްވުންތަކާ ޚިލާފުވާ ކަންކަން ރިޕޯޓުކުރުމުގެ އިތުރުން ލުބުނާނާއި ޔަހޫދީ އިސްރާއީލާ ދެމެދު މުވާސަލާތީ ގުޅުން ދެމެހެއްޓުން އެ ޒިންމާތަކުގެ ތެރޭގައި ހިމެނެ އެވެ.
މަސްދަރު: އަނަދޮލު އޭޖެންސީ
