ލުބުނާނުގެ ބިންތަކުން އިސްރާއީލުގެ އިސްތިއުމާރީ ސިފައިން ބޭލޭނީ އިސްރާއީލާ މަޝްވަރާކޮށްގެން: ލުބުނާންގެ ޚާރިޖީ ވަޒީރު
1 އޮކްޓޯބަރު 2026 | ބުރާސްފަތި 05:44ލުބުނާނުގެ ހަމަޖެހުމަށް ޓަކައި ހިޒްބުﷲ އިން ހަތިޔާރު ބަހައްޓައި، ދައުލަތުގެ ބާރުގެ ދަށަށް ހުރިހާ ކަމެއް ގެންނަންޖެހޭ ކަމަށް އެ ގައުމުގެ ޚާރިޖީ ވަޒީރު ޔޫސުފް ރައްޖީ ވިދާޅުވި. އަދި ގައުމުގެ ދާޚިލީ ކަންކަމަށް އީރާނުން ނުފޫޒު ފޯރުވުން ހުއްޓާލަންޖެހޭކަން ފާހަގަކުރައްވައި، އިސްރާއީލާއެކު ވެފައިވާ އެއްބަސްވުންތައް ތަންފީޒުކުރުމަށް އެމެރިކާގެ އެހީތެރިކަމަށް އޭނާ އެދިވަޑައިގެންނެވި
އިސްރާއީލުގެ ދެކުނުގެ ރަށްތަކަށް އިސްރާއީލުގެ އަސްކަރިއްޔާއިން ވައިގެ ހަމަލާތަކެއް ދީފައިވާ ސަރަހައްދެއް | އެކްސް
އެމެރިކާގެ މެދުވެރިކަމުގެ ދަށުން އިސްރާއީލާއެކު ސީދާ މަޝްވަރާތައް ކުރުމަކީ ލުބުނާނުގެ ބިންތައް އަނބުރާ ހޯދައި، ރައްޔިތުންނަށް އެ މީހުންގެ އަވަށްތަކަށް އެނބުރި ދިއުމަށް މަގުފަހިކޮށްދޭނެ ހަމައެކަނި ގޮތް ކަމަށް ލުބުނާނުގެ ޚާރިޖީ ވަޒީރު ޔޫސުފް ރައްޖީ ބުދަ ދުވަހު ވިދާޅުވެއްޖެ އެވެ.
ވޮޝިންގޓަންގައި ކައުންސިލް އޮން ފޮރިން ރިލޭޝަންސްއިން އިންތިޒާމުކޮށްގެން ބޭއްވި މަޝްވަރާ ބައްދަލުވުމެއްގައި ރައްޖީ މި ފަދައިން ވިދާޅުވެފައިވާ ކަމަށް ލުބުނާނުގެ ޚާރިޖީ ވުޒާރާގެ ބަޔާނެއްގައި ބުނެފައިވެ އެވެ. އެމެރިކާގެ ކުރީގެ ޑިޕްލޮމެޓް އެލިއެޓް އަބްރަމްސް ރިޔާސަތު ބެލެހެއްޓެވި މި ބައްދަލުވުމުގައި ކައުންސިލްގެ މެމްބަރުންނާއި، ނޫސްވެރިންގެ އިތުރުން ދިރާސާކުރާ މަރުކަޒުތަކުގެ މަންދޫބުން ބައިވެރިވެވަޑައިގެންނެވި ކަމަށް އެ ވުޒާރާއިން ބުނެފައިވެ އެވެ.
މި ބައްދަލުވުމުގައި މަޝްވަރާކުރެވުނު ކަންތައްތަކުގެ ތެރޭގައި ލުބުނާނުގެ މިހާރުގެ ހާލަތާއި، ސުލްހައިގެ ފަހުމުނާމާ ތަންފީޒުކުރުން ލަސްވާ ސަބަބުތަކާއި، ހިޒްބުﷲ އިން ހަތިޔާރު ބެހެއްޓުމާއި، ލުބުނާނުގައި ތިބޭ އދ. ގެ ސުލްހަ ބަލަހައްޓާ ފައުޖުގެ މުސްތަގުބަލުގެ އިތުރުން ސޫރިޔާގެ އާ ސަރުކާރާއެކު އޮންނަ ގުޅުން ހިމެނޭ ކަމަށް ބަޔާނުގައި ބުނެފައިވެ އެވެ.
ދައުލަތުގެ ބާރާއި ހަމަޖެހުން
ލުބުނާނުގެ އެންމެ އިސްކަމެއް ދެނީ ހަމަޖެހުން ގާއިމުކުރުމަށް ކަމަށާއި، ލުބުނާނުގެ ރައްޔިތުން އެދެނީ އެ ގައުމަކީ އަނެއްކާ ވެސް ސަރަހައްދުގެ ސަގާފީ، ފަތުރުވެރިކަމުގެ އަދި އިގުތިސާދީ މަރުކަޒަކަށް ވުމަށް ކަމަށް ރައްޖީ ވިދާޅުވި އެވެ. ނަމަވެސް، ދައުލަތުގެ ބާރުގެ ދަށުގައި ނޫން ގޮތަކަށް ހަތިޔާރު ހުރެގެން މި ކަންކަން ހާސިލުނުކުރެވޭނެ ކަމަށް އޭނާ ވިދާޅުވި އެވެ.
ދައުލަތުގެ ކޮންޓްރޯލްގެ ދަށަށް ހަތިޔާރުތައް ގެނައުމަށް ލުބުނާނުގެ ސަރުކާރުން ނިންމި ނިންމުމަކީ "ހިތްވަރުގަދަ" ނިންމުމެއްގެ ގޮތުގައި ސިފަކުރައްވަމުން، ލުބުނާނުގެ ހަމަޖެހުމާއި ފާގަތިކަމަށް "އިސްތިއުމާރު ނިމުމަކަށް ގެނައުމާއި ހިޒްބުﷲ އިން އެ ޖަމާއަތުގެ ހަތިޔާރުތައް ބެހެއްޓުން" ބޭނުންވާކަމަށް އޭނާ ވިދާޅުވި އެވެ. "އަޅުގަނޑުމެން ބޭނުންވަނީ އަވައްޓެރި ހުރިހާ ގައުމުތަކަކާ އެކުވެސް ސުލްހަ،" ރައްޖީ ވިދާޅުވި އެވެ.
ލުބުނާންގެ ޚާރިޖީ ވަޒީރު ޔޫސުފް ރައްޖީ ބައިރޫތުގައި ނޫސްވެރިންނާ ވާހަކަފުޅު ދައްކަވަނީ | އަނަދޮލު އޭޖެންސީ
މީގެ އިތުރުން, ލުބުނާނުގެ ދާޚިލީ ކަންކަމުގެ ތެރެއަށް ވަނުން އީރާނުން ހުއްޓާލަން ޖެހޭނެކަން ފާހަގަކުރައްވައި، ލުބުނާނުގެ އަސްކަރިއްޔާއަކީ އެ ގައުމުގެ "ހަމައެކަނި އުއްމީދު" ކަމަށް އޭނާ ވިދާޅުވި އެވެ. ލުބުނާނުގެ އަސްކަރިއްޔާއަށް އެމެރިކާއިން ފޯރުކޮށްދޭ އެހީތެރިކަމަށް މަރުހަބާ ވިދާޅުވެ، އެ އެހީތެރިކަން ކުރިއަށްދާނެ ކަމަށް އުއްމީދުކުރައްވާ ކަމަށް ވެސް ރައްޖީ ވިދާޅުވި އެވެ.
މަޝްވަރާތަކާއި ކުރިމަތިވެފައިވާ ގޮންޖެހުންތައް
އެމެރިކާގެ މެދުވެރިކަމާއެކު އިސްރާއީލާއެކު ސީދާ މަޝްވަރާތައް ކުރުމަށް ސަރުކާރުން އޮތް ކޮމިޓްމަންޓް އޭނާ ތަކުރާރުކުރެއްވިއިރު، އެއީ "ބިންތައް އަނބުރާ ހޯދައި، ރައްޔިތުންނަށް އެ މީހުންގެ އަވަށްތަކަށް އެނބުރި ދިއުމަށް މަގުފަހިކޮށްދޭނެ ހަމައެކަނި ގޮތް" ކަމުގައި ރައްޖީ ސިފަކުރެއްވި އެވެ.
ލުބުނާނުގެ ކަމާބެހޭ ފަރާތްތަކުން "އިސްރާއީލާއެކު ކުރާ ސީދާ މަޝްވަރާތައް މަޑުޖައްސާލައި، ނުސީދާ މަޝްވަރާތަކަށް މިސްރާބު ބަދަލުކުރުމަށް" ހިޒްބުﷲ ގެ ސެކްރެޓަރީ ޖެނެރަލް ނައީމް ގާސިމް އާދީއްތަ ދުވަހު ވަނީ ގޮވާލައްވާފަ އެވެ. މިއީ، އޭނާ ސިފަކުރެއްވި ގޮތުގައި ދޫދިނުންތައް ހުއްޓުވައި، މަޝްވަރާތަކުގެ މިސްރާބު ރަނގަޅު ކުރުމަށް އެޅޭނެ ފިޔަވަޅެކެވެ.
ލުބުނާނާއި އިސްރާއީލާ ދެމެދު ސީދާ މަޝްވަރާތައް ފެށިފައިވަނީ 2026 ވަނަ އަހަރުގެ އޭޕްރީލް 14 ވަނަ ދުވަހު ވޮޝިންގޓަންގައި އެމެރިކާގެ މެދުވެރިކަމާއެކު ބޭއްވި ބައްދަލުވުމަކުންނެވެ. އޭގެ ފަހުން ބޭއްވި ބުރުތަކުގައި މަޝްވަރާކުރެވުނީ ހަމަލާބަދަލުކުރުން ހުއްޓާލުމާއި، ލުބުނާންގެ ބިންތަކުން އިސްރާއީލުގެ އިސްތިއުމާރީ ސިފައިން ފޭބުމާއި، ބޯޑަރުތަކާއި، އަސީރުންނާއި ގެއްލިފައިވާ މީހުންގެ މައްސަލަތަކާ ގުޅޭގޮތުންނެވެ.
ލުބުނާނުގެ ބިންތަކުން އިސްރާއީލު ސިފައިން ފޭބުމަށާއި، އިސްރާއީލްގެ ފައުޖުތައް ހުސްކުރާ ސަރަހައްދުތަކުގައި ލުބުނާނުގެ އަސްކަރިއްޔާ ރުކުރުވާލުމަށް މަގުފަހިކޮށްދޭ އެމެރިކާއިން ސްޕޮންސަރކުރާ "ފްރޭމްވަރކް ފޯމިއުލާ" އެއްގައި ޖޫން 26 ވަނަ ދުވަހު ވޮޝިންގޓަންގައި ބެއިރޫތާއި ތެލް އަވީވުން ވަނީ ސޮއިކޮށްފަ އެވެ.
މި އެއްބަސްވުން އޮތް ނަމަވެސް، ލުބުނާނުގެ ދެކުނަށް އިސްރާއީލުން ދެމުންގެންދާ ނިރުބަވެރި ހަމަލާތައް މެދުނުކެނޑި ކުރިއަށްދާއިރު، ދެކުނުގެ ބައެއް ސަރަހައްދުތައް އަދިވެސް އޮތީ އިސްރާއީލްގެ އަތްދަށުގަ އެވެ. އޭގެ ތެރޭގައި އެތައް އަހަރެއް ވަންދެން ހިފަހައްޓާފައިވާ ތަންތަނާއި ފަހުގެ ހަނގުރާމަތަކާއި އަސްކަރީ އޮޕަރޭޝަންތަކުގައި ހިފާފައިވާ ބިންތައް ހިމެނެ އެވެ.
މާރިޗު 2 ވަނަ ދުވަހުން ފެށިގެން ލުބުނާނަށް އިސްރާއީލުން ދިން ހަމަލާތަކުގައި ގާތްގަނޑަކަށް 4،386 މީހުން ޝަހީދުކޮށްލައި 12،413 މީހުން ޒަޚަމްކޮށްލާފައިވާއިރު، އެއް މިލިޔަނަށްވުރެ ގިނަ މީހުންގެ ގެދޮރު ގެއްލިފައިވާ ކަމަށް ލުބުނާނުގެ ކަމާބެހޭ ފަރާތްތަކުން ބުނެ އެވެ.
މަސްދަރު: އަނަދޮލު އޭޖެންސީ
