ޓެކްސްގެ ގޮތުގައި ނުލިބި 22 ބިލިއަންއެއްހާ ރުފިޔާ އެބައޮތް، ޓެކްސް ނުދެއްކުން އިތުރުވާ އެއް ސަބަބަކީ ސަރުކާރުން ކުންފުނިތަކަށް ދޭންޖެހޭ ފައިސާ ނުދީ ހުރުން: ނިޔާޒީ
10 ނޮވެމްބަރު 2026 | އަންގާރަ 11:38ދައުލަތުން ކުންފުނިތަކަށް ދައްކަންޖެހޭ ހަތް ބިލިއަނެއްހާ ރުފިޔާ ނުދީ އޮތުމަކީ ޓެކްސް ފައިސާ ނުލިބުމަށް ދިމާވާ މައިގަނޑު ސަބަބު ކަމަށް އޮޑިޓާ ޖެނެރަލް ހުސެއިން ނިޔާޒީ ވިދާޅުވެއްޖެ. އަންނަ އަހަރުގެ ބަޖެޓުގައި މި ބިލުތައް ދައްކާނެ ގޮތެއް ހިމަނާފައި ނުވާތީ، އެކަމަށް ހައްލެއް ހޯދުމަށް ފިނޭންސް މިނިސްޓްރީއަށް އޭނާ ވަނީ އިލްތިމާސްކުރައްވާފައި
އޮޑިޓާ ޖެނެރަލް ހުސެއިން ނިޔާޒީ | ރައްޔިތުންގެ މަޖިލިސް
ޓެކްސްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން ގާތްގަނޑަކަށް 22 ބިލިއަން ރުފިޔާ ނުލިބި އޮތް ކަމަށާއި ޓެކްސް ނުދެއްކުން އިތުރުވާ އެއް ސަބަބަކީ ސަރުކާރުން ކުންފުނިތަކަށް ދޭންޖެހޭ ފައިސާ ނުދީ ހުރުން ކަމަށް އޮޑިޓާ ޖެނެރަލް ހުސެއިން ނިޔާޒީ ވިދާޅުވެއްޖެ އެވެ.
ނިޔާޒީ މިފަދައިން ވިދާޅުވީ ބަޖެޓު ދިރާސާކުރާ ކޮމިޓީއިން އަންގާރަ ދުވަހު ބޭއްވި ބައްދަލުވުމުގައި ވާހަކަދައްކަވަމުންނެވެ. އެގޮތުން ނިޔާޒީ ވިދާޅުވީ ޓެކްސް ނުދެއްކުން އިތުރުވާ އެއް ސަބަބަކީ ދައުލަތުން ހަވާލުކުރާ އެކިއެކި މަސައްކަތްތައް ކުރާ ކުންފުނިތަކަށް ދޭންޖެހޭ ފައިސާ ނުދީ އޮތުން ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މައުލޫމާތު ދޭ ކަމަށެވެ.
މިއަހަރުގެ ސެޕްޓެމްބަރު މަހުގެ ނިޔަލަށް، ދައުލަތުގެ ޕަބްލިކް އެކައުންޓިން ސިސްޓަމްގެ ތެރެއިން މިހާތަނަށް ނުދައްކާ ހުރި ބިލުތަކުގެ އަދަދު 7 ބިލިއަނާއި ގާތްކުރާކަން ފާހަގަކުރައްވާ ނިޔާޒީ ވަނީ މިއަންނަ އަހަރަށް ލަފާކުރާ ބަޖެޓުގައި ވެސް ނުދެއްކި ހުރި ބިލުތައް ދައްކަން ފައިސާ ހޯދާނެ ގޮތް ހިމަނާފައިނުވާ ކަމަށް ވިދާޅުވެފަ އެވެ.
އަދި އެ ފައިސާ ދައްކާނެ ގޮތްތަކެއް ފިނޭންސް މިނިސްޓްރީން ހޯދުން ވަރަށް މުހިއްމު ކަމަށް ނިޔާޒީ ވިދާޅުވި އެވެ.
