ބޮމުގެ އިންޒާރުތަކަކާ ގުޅިގެން ވިލާތުގެ ވައިގެ ދަތުރުފަތުރަށް ބުރޫއަރައިފި
4 ނޮވެމްބަރު 2026 | ބުދަ 04:01ވިލާތުގެ އެކި އެއާލައިންތަކުގެ ހަތް ފްލައިޓަކަށް އަމާޒުކޮށް އަންގާރަ ދުވަހު ދިން ބޮމުގެ އިންޒާރުތަކަކީ އެއްވެސް އަސްލެއް ނެތް ދޮގު އިންޒާރުތަކެއްކަން ކަމާބެހޭ ފަރާތްތަކުން ހާމަކޮށްފި. މި ހާދިސާތަކާ ގުޅިގެން ބައެއް އެއާޕޯޓުތައް ބަންދުކޮށް ސަލާމަތީ ފިޔަވަޅުތައް ވަރުގަދަކުރި ނަމަވެސް، އެއްވެސް ބޯޓަކުން ނުރައްކާތެރި އެއްޗެއް ފެނިފައެއް ނުވޭ. މި ސިލްސިލާ އިންޒާރުތަކުގެ ޒިންމާ އަދި އެއްވެސް ފަރާތަކުން އުފުލާފައެއް ނުވޭ
ސްޕެއިންގެ މުސްރިއާ އެއާޕޯޓަށް ޖައްސާފައިވާ ރަޔަންއެއަރގެ މަތިންދާބޯޓެއް ބަލައިފާސްކުރުމުގެ މަސައްކަތް ކުރަމުން ދަނީ | ރޮއިޓަރސް
ވިލާތުގެ އެކި ކަންކޮޅުތަކުގައި ފަސިންޖަރުން އުފުލާ މަތިންދާބޯޓުތަކަކަށް އަމާޒުކޮށް ބޮމުގެ އިންޒާރުތަކެއް ދިނުމާ ގުޅިގެން، ސަލާމަތީ ފިޔަވަޅުތައް އަޅައި މަތިންދާބޯޓުތައް ބަލައިފާސްކޮށް، ޕޮލެންޑުގެ ވެރިރަށް ވޯސޯގެ ބޭރުގައިވާ އެއާޕޯޓެއް ވަގުތީ ގޮތުން ބަންދުކޮށް، އަދި އިޓަލީވިލާތުގެ ވައިގެ ސިފައިންގެ އަސްކަރީ މަތިންދާބޯޓުތަކުގެ އެސްކޯޓާއެކު ރަޔަންއެއަރގެ ބޯޓެއް ރޯމްއަށް ޖައްސަން މަޖުބޫރުވެއްޖެ އެވެ.
ކަމާބެހޭ އޮފިޝަލުން ހާމަކުރެއްވި ގޮތުގައި، އަންގާރަ ދުވަހު ދިން މި ހުރިހާ އިންޒާރުތަކަކީ ވެސް އަސްލެއް ނެތް ދޮގު އިންޒާރުތަކެކެވެ. ރަސްމީ ފަރާތްތަކުން ބުނީ މި ސިލްސިލާ އިންޒާރުތަކުގައި ގާތްގަނޑަކަށް ހަތް ފްލައިޓަކަށާއި، ޔަހޫދީ އިސްރާއީލަށް ދަތުރުކުރަމުންދިޔަ ކްރޫޒްލައިނަކަށް އަމާޒުކޮށް ބިރުދައްކާފައިވާ ކަމަށެވެ. ނަމަވެސް، އިންޒާރު ލިބުނު ހުރިހާ ބޯޓެއް ވެސް އެއްވެސް ނުރައްކަލަކާ ނުލައި ރައްކާތެރިކަމާއެކު އެއާޕޯޓުތަކުގައި ޖައްސާފައިވާއިރު، ކުއްލި ހާލަތުގައި ބަލައިފާސްކުރުމުން، އެއްވެސް ބޯޓަކުން ގޮވާތަކެތި ފެނިފައެއް ނުވެ އެވެ.
މި އިންޒާރުތަކުގެ ނޭދެވޭ އަސަރު ފޯރި އެއާލައިންތަކުގެ ތެރޭގައި ރަޔަންއެއަރ، ވިޒް އެއަރ، ސްކެންޑިނޭވިއަން އެއާލައިންސް އަދި ޕޮލިޝް އެއާލައިން ލޮޓް ހިމެނެ އެވެ. މީގެ ތެރެއިން އެންމެ ބޮޑު ލޮޅުމެއް އެރީ އަޔަލެންޑުގެ ބަޖެޓް އެއާލައިން ކަމަށްވާ ރަޔަންއެއަރ އަށެވެ. މި ގޮތުން އެ އެއާލައިނުން އެކި މަންޒިލްތަކަށް ދަތުރުކުރި ހަތަރު ފްލައިޓަކަށް ވަނީ އިންޒާރު އަމާޒުވެފަ އެވެ.
މި ހާދިސާތަކުގެ ޒިންމާ އަދި މިހާތަނަށް އެއްވެސް ފަރާތަކުން އުފުލާފައެއް ނުވެ އެވެ. ހަމަމިއާއެކު، އޮފިޝަލުން ވެސް ވަކި ޖަމާޢަތަކަށް ނުވަތަ ބަޔަކަށް މި ކަމުގެ އިލްޒާމު އަޅުވާފައެއް ނުވެ އެވެ. މިއީ، ބަލްގޭރިއާއަށް ދަތުރުކުރަމުންދިޔަ ފަސިންޖަރުން އުފުލާ މަތިންދާބޯޓެއް ވައިގެ ތެރޭގައި އޮއްވައި މި ފަދަ ބޮމުގެ އިންޒާރެއް ލިބުމާ ގުޅިގެން، ކުއްލި ގޮތަކަށް ހަންގޭރީއަށް ޑައިވަރޓްކުރިތާ އެއް ދުވަސް ފަހުން ހިނގި ކަންތައްތަކެކެވެ.
ޕޮލެންޑާއި ވޯސޯއަށް ދަތުރުކުރި ދެ ފްލައިޓަކަށް އިންޒާރު އަމާޒުވި އެވެ. މި ގޮތުން ޑެންމާކުގެ ކޯޕަންހާގަނުން ފުރި ސްކެންޑިނޭވިއަން އެއާލައިންސްގެ ފްލައިޓް އެސްކޭ751 އެއްވެސް ހާދިސާއެއް ނުހިނގައި ވޯސޯގެ ޝޯޕެން އެއާޕޯޓަށް ޖައްސާފައިވާއިރު، ރައްކާތެރިކަމުގެ ފިޔަވަޅެއްގެ ގޮތުން އެ އެއާޕޯޓުގެ އެއް ރަންވޭ ވަގުތީ ގޮތުން ބަންދުކުރަން ޖެހުނު ކަމަށް އޮފިޝަލުން ވިދާޅުވި އެވެ.
މަސްދަރު: އަލް ޖަޒީރާ
