ނަޞްރުގެ ދުވަސް ފާހަގަކުރުމަށް ކުޅުދުއްފުށި ސިޓީގައި ޚާއްސަ ރަސްމިއްޔާތެއް ބާއްވައިފި
3 ނޮވެމްބަރު 2026 | އަންގާރަ 09:35ނަޞްރުގެ ދުވަހުގެ ޒިކުރާ އާކުރުމަށް ކުޅުދުއްފުށި ސިޓީ ކައުންސިލާއި ހދ. އަތޮޅު ތައުލީމީ މަރުކަޒު ގުޅިގެން އެ ރަށުގައި ޚާއްސަ ޖަލްސާއެއް ބާއްވައިފި. ނޮވެމްބަރު ތިނެއްގެ އުދުވާނާ ދެކޮޅަށް މަސައްކަތް ކުރެއްވި ޖައުފަރު އަބްދުއްރަހުމާން ޝަރަފުވެރިކޮށްދެއްވި މި ޖަލްސާގައި، ޤައުމީ ސަލާމަތަށްޓަކައި ޝަހީދުވި އަބްތާލުންގެ ޒިކުރާ އާކޮށް ދުވަހުގެ މުހިންމުކަމާ ގުޅޭގޮތުން މައުލޫމާތު ދީފައިވޭ
ނަސްރުގެ ދުވަހުގެ މުނާސަބާގައި ކުރިއަށް ގެންދިޔަ ޖަލްސާގެ ތެރެއިން | ކުޅުދުއްފުށި ސިޓީ ކައުންސިލް
1988 ވަނަ އަހަރުގެ ނޮވެންބަރު 3 ވަނަ ދުވަހު ދިވެހިރާއްޖެއަށް ކުރިމަތިވި ނުރައްކާތެރި އުދުވާނީ ހަމަލާއިން ދިވެހިރާއްޖެ ސަލާމަތްކުރުމަށް ލެޔާއި ފުރާނައިން ޤުރުބާންވި ބަތަލުންގެ ހަނދާނުގައި، ކުޅުދުއްފުށި ސިޓީގައި ޚާއްސަ ޖަލްސާއެއް ބާއްވައިފި އެވެ.
ފަޚުރުވެރި ނަޞްރުގެ ދުވަހުގެ ޒިކުރާ އާކުރުމުގެ ގޮތުން ކުޅުދުއްފުށި ސިޓީ ކައުންސިލުން އިސްނަގައިގެން ކޮންމެ އަހަރަކުވެސް ބާއްވަމުން އަންނަ މި ޖަލްސާ މިއަހަރު ކުރިއަށްގެންގޮސްފައިވަނީ ހދ. އަތޮޅު ތައުލީމީ މަރުކަޒާ ގުޅިގެން، އެ މަރުކަޒުގަ އެވެ.
ނަސްރުގެ ދުވަހުގެ މުނާސަބާގައި ކުރިއަށް ގެންދިޔަ ޖަލްސާގެ ތެރެއިން | ކުޅުދުއްފުށި ސިޓީ ކައުންސިލް
މި ޚާއްސަ ޖަލްސާ ޝަރަފުވެރިކޮށްދެއްވީ ނޮވެމްބަރު ތިނެއްގެ އުދުވާނާ ދެކޮޅަށް ޤައުމީ ޚިދުމަތުގައި އަގުހުރި މަސައްކަތްތަކެއް ކުރައްވާފައިވާ، މޯލްޑިވްސް ނޭޝަނަލް ޑިފެންސް ފޯސްގެ ވޮރަންޓް އޮފިސަރ ގްރޭޑް 3 (ރިޓަޔާޑް) ޖައުފަރު އަބްދުއްރަހުމާނެވެ. ޖަލްސާގެ ތެރެއިން ޤައުމުގެ މިނިވަންކަމާއި ސިޔާދަތަށްޓަކައި ޝަހީދުވި އަބްތާލުންގެ ޒިކުރާ އާކޮށް، ދުވަހުގެ މުހިންމުކަމުގެ މައްޗަށް ވަނީ އަލިއަޅުވާލާފަ އެވެ.
ކުޅުދުއްފުށި ސިޓީ ކައުންސިލުން އިސްނަގައިގެން ބޭއްވި މި ޖަލްސާގައި އެ ސިޓީގެ މޭޔަރު މުހައްމަދު އާތިފާއި، ކައުންސިލް މެންބަރުންގެ އިތުރުން ސަރުކާރުގެ އެކި މުއައްސަސާތަކުގެ އިސްވެރިން ބައިވެރިވެވަޑައިގެންނެވި އެވެ. މީގެއިތުރުން ހދ. އަތޮޅު ތައުލީމީ މަރުކަޒުގެ ޓީޗަރުންނާއި ގިނަ އަދަދެއްގެ ދަރިވަރުން ވެސް މި ޖަލްސާގައި ބައިވެރިވެފައިވެ އެވެ.
