ނަޞްރުގެ ދުވަހުގެ ޚާއްސަ އިހުތިފާލުތައް ފަތިސް ނަމާދުގެ ބޮޑު ޖަމާއަތަކުން ފަށައިފި
3 ނޮވެމްބަރު 2026 | އަންގާރަ 05:38ނަސްރުގެ ދުވަހުގެ މުނާސަބަތުގައި ބޭއްވި ޚާއްސަ ދުއާގައި ރައީސް އާއި ދައުލަތުގެ އިސްވެރިން ބައިވެރިވެވަޑައިގެން، 1988 ނޮވެންބަރު 3 ގެ އުދުވާނުގައި ޝަހީދުވި އަބްތާލުންގެ ޒިކުރާ އައުކުރައްވައިފި. މި ދުވަސް ފާހަގަކުރަނީ ބޭރުގެ ކުލީ ސިފައިން ދިން ނުރައްކާތެރި ހަމަލާއިން ގައުމު ސަލާމަތްކުރުމަށް 19 ދިވެހިން ވީ މަތިވެރި ގުރުބާނީގެ އަގުވަޒަންކުރުމަށް
އަންގާރަ ދުވަހު އިސްލާމީ މަރުކަޒުގައި ކުރެވުނު ފަތިސް ނަމާދުގެ ބޮޑު ޖަމާއަތް | މިނިސްޓްރީ އޮފް ޑިފެންސް
އަންގާރަ ދުވަހު ފާހަގަކުރަމުންދާ ރާއްޖޭގެ ނަސްރުގެ ދުވަހުގެ މުނާސަބަތުގައި ދިވެހި ސިފައިން ކުރިއަށްގެންދާ ޚާއްސަ އިހުތިފާލުތައް، ފަތިހު އިސްލާމީ މަރުކަޒުގައި ކުރެވުނު ފަތިސް ނަމާދުގެ ބޮޑު ޖަމާއަތަކުން ފަށައިފި އެވެ.
އެއް ޖަމާއަތެއްގައި ކުރެވުނު މި ފަތިސް ނަމާދުގެ ޖަމާއަތުގައި ރައީސް މުއިއްޒު ބައިވެރިވެވަޑައިގެންނެވި އެވެ. މީގެއިތުރުން، ދިފާއީ އަދި ވަތަނީ ޚިދުމަތާ ބެހޭ ވަޒީރު، ހަސަން ރަޝީދާއި، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ހިލްމީއާއި، ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަހްމަދު ޣިޔާޘްގެ އިތުރުން ސިފައިންގެ ޖެނެރަލް އޮފިސަރުންނާއި، އެކި ރޭންކުތަކުގެ އޮފިސަރުންނާއި، ގިނަ އަދަދެއްގެ ސިފައިން އަދި އާންމު ރައްޔިތުން މި ޖަމާއަތުގައި ބައިވެރިވި އެވެ.
ފަތިސް ނަމާދަށްފަހު، 3 ނޮވެންބަރު 1988 ގައި ރާއްޖެއަށް ކުރިމަތިވި އުދުވާނީ ހަމަލާގައި ޝަހީދުވި ޤައުމީ އަބްތާލުންގެ ޒިކުރާ އައުކުރުމުގެ ގޮތުން އިސްލާމީ މަރުކަޒުގައި ޚާއްސަ ދުއާއެއް ކުރުން އޮތެވެ.
ނޮވެންބަރު މަހުގެ 3 ވަނަ ދުވަހަކީ ދިވެހި ތާރީޚުގައި ފާހަގަކުރެވޭ އެންމެ ހިތާމަވެރި، އަދި އެހެންމެ އެންމެ ފަޚުރުވެރި އެއް ދުވަހެވެ. 1988 ނޮވެންބަރު 3 ގައި ދިވެހިންގެ ތެރެއިން ޚިޔާނާތްތެރިވި ބަޔަކު އަޑީގައި ތިބެ، ބޭރުގެ ކުލީ ހަނގުރާމަވެރި ޓެރަރިސްޓް ޖަމާއަތަކާ އެކު މާލެއަށް ދިން ނުރައްކާތެރި އުދުވާނީ ހަމަލާއިން ދިވެހިފަސްގަނޑާއި އިސްލާމްދީން ހިމާޔަތްކުރުމަށް ސިފައިންނާއި އާންމު ރައްޔިތުން ވަނީ މަތިވެރި ޤުރުބާނީތަކެއް ވެފަ އެވެ.
މި ބިރުވެރި އުދުވާނުގައި ދިވެހި ޤައުމުގެ ދިފާއުގައި ހަނގުރާމަކުރަނިކޮށް 8 ސިފައިންނާއި 11 އާންމުން ހިމެނޭހެން ޖުމްލަ 19 ދިވެހިން ޝަހީދުވި އެވެ. ރާއްޖޭގައި ކޮންމެ އަހަރަކުވެސް ނަސްރުގެ ދުވަސް ފާހަގަކުރަމުންދަނީ، އެ ބިރުވެރި ދުވަހު މާތް ﷲ ގެ ހަޟްރަތުން ދިވެހި އުއްމަތަށް މިންވަރުކުރެއްވި މަތިވެރި ނަސްރުގެ ހަނދާން އާކުރުމަށާއި، ޤައުމީ އަބްތާލުން ޤައުމަށްޓަކައި ވީ މަތިވެރި ޤުރުބާނީގެ ޒިކުރާ ދިރުވައި އާލާކުރުމުގެ މަގުސަދުގަ އެވެ.
