އެފްރިކާގައި ފެތުރެމުންދާ އިބޯލާ ރޯގާގައި މަރުވި މީހުންގެ އަދަދު 5،300 އިން މައްޗަށް، އެންމެ ބޮޑު ނުރައްކަލެއް ކޮންގޯއަށް

އެފްރިކާ ބައްރުގައި މި ފަހުން ފެތުރެން ފެށި ނުރައްކާތެރި އިބޯލާ ރޯގާގައި މަރުވި މީހުންގެ އަދަދު 5،300 އިން މައްޗަށް އަރައި، ބަލިމަޑުކަމުގެ ނުރައްކާ އިންތިހާއަށް ބޮޑުވެފައިވާ ކަމަށް އެފްރިކާ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަންއިން (އެފްރިކާ ސީޑީސީ) އިންޒާރުދީފި އެވެ. މި ރޯގާގެ ޝިކާރައަކަށް ވެގެން މަރުވި މީހުންގެ ބޮޑު އަޣުލަބިއްޔަތެއް ރެކޯޑުކުރެވިފައި ވަނީ ބަލިމަޑުކަމުގެ މައި މަރުކަޒު ކަމުގައިވާ ޑިމޮކްރެޓިކް ރިޕަބްލިކް އޮފް ދި ކޮންގޯއިން (ޑީއާރްސީ) ނެވެ.

މި އަހަރުގެ މެއި މަހުގެ މެދުތެރޭގައި ކޮންގޯއިން ވަނީ އެ ޤައުމުގެ ތާރީޚުގައި ވެސް މިހާތަނަށް ފެނުނު އެންމެ ބޮޑު، އަދި 17 ވަނަ އިބޯލާ ރޯގާ ރަސްމީކޮށް އިޢުލާނުކޮށްފަ އެވެ. އެފްރިކާ ސީޑީސީން ހޯމަ ދުވަހު އާންމުކުރި އެންމެ ފަހުގެ ތަފާސްހިސާބުތަކަށް ބަލާއިރު، މި ރޯގާގައި މިހާތަނަށް ޖުމުލަ 5،376 މީހުން ވަނީ މަރުވެފަ އެވެ. މީގެ ތެރެއިން 5،372 މަރު ރެކޯޑުކޮށްފައި ވަނީ ކޮންގޯއިން ކަމަށްވާއިރު، އަވައްޓެރި ކެންޔާ އަދި އުގާންޑާއިން ކޮންމެ ޤައުމަކުން ދެ މީހުން ވަނީ މަރުވެފަ އެވެ.

Advertisement

މި ފަހަރު ފެތުރެމުން ދަނީ މަދުން ނޫނީ ނުފެންނަ ވައިރަހުގެ ބާވަތެއް ކަމަށްވާ 'ބަންޑިބޫޖޯ' ސްޓްރެއިން އެވެ. މި ވޭރިއަންޓްގެ ސަބަބުން ކޮންގޯގެ އިތުރުން ޔުގާންޑާ އަދި ކެންޔާއިން ޖުމުލަ 10،444 މީހުންނަށް ބަލިޖެހިފައިވާއިރު، މި ބަލީގައި މަރުވާ މީހުންގެ ނިސްބަތް ހުރީ %50 އަށްވުރެ މަތީގަ އެވެ.

ފާއިތުވި މަސްތަކުގައި މި ވައިރަސް ވަނީ އެކި ފަހަރު މަތިން ބައިނަލްއަގުވާމީ ބޯޑަރުތައް ހުރަސްކޮށް ފެތުރިފަ އެވެ. މި ގޮތުން ކޮންގޯއާ އިންވެގެން އޮންނަ ޔުގާންޑާއިން އިބޯލާ ޖެހުނު 20 ކޭސް ފެނިފައިވާއިރު، އޭގެ ތެރެއިން ގާތްގަނޑަކަށް ހުރިހާ ކޭސްއަކީ ވެސް ކޮންގޯއިން އެ ޤައުމަށް ދަތުރުކުރި މީހުންނެވެ. ނަމަވެސް، ފިޔަވަޅުތައް ވަރުގަދަކުރުމަށް ފަހު ނިމިދިޔަ އޮގަސްޓު މަހު ޔުގާންޑާއަކީ އިބޯލާ ނެތް ޤައުމެއް ކަމަށް ވަނީ އިޢުލާނުކޮށްފަ އެވެ.

ހަމަމިއާއެކު، ކެންޔާއިން އޮކްޓޫބަރު މަހު ނުވަ މީހަކަށް އިބޯލާ ޖެހި، ދެ މީހަކު މަރުވެފައިވާއިރު، މިއީ އެ ޤައުމުގެ ތާރީޚުގައި ވެސް އިބޯލާ ބަލީގެ ކޭސްތަކެއް ރަސްމީކޮށް ރެކޯޑުކުރެވުނު ފުރަތަމަ ފަހަރެވެ.

އެފްރިކާގެ އެންމެ އާބާދީ ބޮޑު ޤައުމު ކަމަށްވާ ނައިޖީރިއާގެ އިރުއުތުރު ސަރަހައްދުން ޝައްކުކުރެވުނު ދެ ކޭހެއްގެ ސާމްޕަލް ދެ ފަހަރެއްގެ މަތިން ޓެސްޓުކުރުމަށް ފަހު، އެއީ ނެގެޓިވް ސާމްޕަލްތަކެއް ކަމަށް އެ ޤައުމުގެ ސިއްހީ އިދާރާތަކުން ވަނީ ކަށަވަރުކޮށްދީފަ އެވެ. ވެރިރަށް އަބޫޖާއިން އޮކްޓޫބަރު މަހު ބޭރުން އެތެރެވި އެއް ކޭސް ފެނިފައިވާއިރު، މިއީ ވޭތުވެދިޔަ ދިހަ އަހަރަށް ވުރެ ގިނަ ދުވަހުގެ ތެރޭގައި އެ ރަށުން އިބޯލާ ފެނުނު ފުރަތަމަ ފަހަރެވެ. ނަމަވެސް، އެ ޤައުމުގައި މި ބަލީގައި އެއްވެސް މީހަކު މަރުވެފައެއް ނުވެ އެވެ. ވިލާތުގެ ބައްރަށް ބަލާއިރު، ކޮންގޯއިން އެނބުރި ދިޔަ ސިއްހީ ޚިދުމަތްތެރިއެއްގެ ގައިން އިބޯލާ ފެނިގެން ޖުލައި މަހު ފަރަންސޭސިވިލާތުން ވެސް ވަނީ އެއް ކޭސް ރިޕޯޓުކޮށްފަ އެވެ.

ސިއްހީ މާހިރުން ފާހަގަކުރާ ގޮތުގައި، މިހާރު ފެތުރެމުންދާ ނުރައްކާތެރި ބުންޑުބޫޖޯ ސްޓްރެއިންއާ ދެކޮޅަށް ބޭނުންކުރުމަށް ފާސްކޮށްފައިވާ އެއްވެސް ވެކްސިނެއް ނުވަތަ ފަރުވާއެއް މިހާތަނަށް ހޯދިފައެއް ނުވެ އެވެ. މިއާއެކު، އާންމުކޮށް ފެންނަ 'ޒަޔީރް' ސްޓްރެއިންއާ ދެކޮޅަށް ކާމިޔާބު ކަމަށް ސާބިތުވެފައިވާ 'އެރްވެބޯ' ވެކްސިން ބޭނުންކޮށްގެން، މި ބާވަތަށް ފަރުވާއެއް ހޯދުމުގެ ކްލިނިކަލް ޓްރަޔަލްތައް މިހާރު ވަނީ ފަށާފަ އެވެ.